နာဂကိုယ်ပိုင်အုပ်ချုပ်ခွင့်ရဒေသ ပန်ဆောင်မြို့ရှိ နောင်ယန်းအင်းသို့ အိန္ဒိယနိုင်ငံဘက်မှ ပြည်သူများ လာရောက်လည်ပတ်နေသည်ကို တွေ့ရစဉ်
နာဂကိုယ်ပိုင် အုပ်ချုပ်ခွင့်ရဒေသ ပန်ဆောင်မြို့ပေါ်ရှိ နောင်ယန်းအင်းသို့ အိန္ဒိယနိုင်ငံဘက်မှ ဒေသခံများက ပိုမိုစိတ်ဝင်စားပြီး လာရောက် လည်ပတ်လေ့ရှိသည်ဟု သိရသည်
“နောင်ယန်းအင်းကို အိန္ဒိယနိုင်ငံဘက်က နာဂတွေများပါတယ်။ အိန္ဒိယနိုင်ငံဘက်က ပြည်နယ်ပေါင်းစုံက လာကြတယ်။ နောင်ယန်းအင်းကို အိန္ဒိယဘက်က ပိုပြီးစိတ်ဝင်စားတယ်။ လာတဲ့သူတွေက ဓာတ်ခွဲဖို့ဆိုပြီး ရေယူသွားတယ်။ ဘယ်လို အဖြေထွက်သလဲဆိုတာကိုတော့ မသိရဘူး။ အခု နောက်ပိုင်းတော့ အင်းကိုဓာတ်ပုံ၊ ဗွီဒီယိုကို ကင်မရာအကြီးကြီးတွေနဲ့ ရိုက်ခွင့်မပြုတော့ဘူး။ ဘာကြောင့်လာတယ်ဆိုတာ မသိပေမယ့် အဲဒီအင်းကို လူတိုင်းလာချင်ကြပါတယ်။ ဒီအင်းက သမိုင်းအနေနဲ့ အတိုချုပ်ဆို ဒီအင်းနေရာက အရင်က ကျေးရွာတစ်ရွာပေါ့။ သူတို့က နဂါးသတ်လိုက်လို့ ဒီရွာကိုဖြိုပြီး အင်းလုပ်လိုက်တယ်ဆိုတဲ့ သမိုင်းရှိတယ်။ ဒီအင်းက ဒဏ္ဍာရီဆန်တယ်။ ဒီအင်းလာတဲ့သူတွေကို ဗီဇာနဲ့တော့မဟုတ်ဘူး။ ယာယီလည်ပတ်ခွင့်ဆိုပြီးတော့ အချိန်အကန့်အသတ်နဲ့ လည်ပတ်ခိုင်းတယ်။ အိန္ဒိယဘက်က ဒီအင်းကိုလာဖို့ဆိုပြီး လက်မှတ်ယူလာပါတယ်။ အဲဒါကို မြန်မာဘက်ပြတယ်။ အဲဒါကို ဘယ်နေရာအထိဆိုပြီး ခွင့်ပြုပါတယ်။ ဇန်နဝါရီ ၂၀ ရက်၊ ၂၁ ရက်၊ ၂၂ ရက်တွေမှာ ကျင်းပတဲ့ အိန္ဒိယနိုင်ငံ နန်ပေါင်ဘက်မှာလုပ်တဲ့ ဆောင်းရာသီပွဲတော်မှာဆိုရင် အိန္ဒိယနိုင်ငံဘက်က ဧည့်သည်တွေ အလာပိုများတယ်။ ကျွန်တော်တို့ ပန်ဆောင်မှာ ၁၀ ရက် တစ်ဈေးဖွင့်တယ်လေ။ အဲဒီလို ဈေးဖွင့်တဲ့ အချိန်ကျရင်လည်း ဈေးလာကြရင်းနဲ့ နောင်ယန်းအင်းကို လာကြတာပဲလေ။ ဒါကတော့ ပုံမှန်လာကြတာပေါ့။ တစ်နှစ် တစ်နှစ်ဆိုရင် ဧည့်သည် ထောင်ဂဏန်းလောက်တော့ လာကြတယ်။ အိန္ဒိယနိုင်ငံ ပြည်တွင်းကလည်း လာကြတာတွေလည်းရှိနေပြီ။ နောင်ယန်းအင်းကို တိမ်ကော မသွားအောင် သဘာဝပတ်ဝန်းကျင် မပျက်သွားအောင် ထိန်းသိမ်းဖို့ လိုအပ်ပါတယ်။ အင်းထဲမှာ ရေတွေ မခန်းခြောက်အောင် အဆိပ်ငွေ့တွေ မသန်းအောင် ဓာတုဆေးတွေမကျအောင် လုပ်ဖို့လိုတယ်။ အမှိုက်တွေ ပလတ်စတစ်တွေ မကျဖို့လိုတယ်။ ဒါကတော့ ဒေသခံတွေက လုပ်ရမှာပါ ထိန်းသိမ်းရမှာပါ။ မထိန်းသိမ်းဘူးဆိုရင် မိုးတွင်ကာလ အတွင်းရေရှိပြီး နွေရာသီ၊ ဆောင်းရာသီဆိုရင် ရေမရှိဘဲ ဖြစ်သွားမှာပါ။ နောင်ယန်းအင်း ထိန်းသိမ်းဖို့အတွက် အစိုးရကိုတင်ပြတာ မရှိသေးပါဘူး။ အဓိက လိုအပ်တာကဒေသခံတွေကို နားလည်သဘောပေါက်မှု ရှိလာအောင် အရင်လုပ်ရမှာ။ ဒေသခံတွေက နားလည်သဘော ပေါက်တယ်ဆိုရင် နောင်ယန်းအင်းကို သူတို့ဘာသာသူတို့ ထိန်းသိမ်းသွားလိမ့်မယ်” ဟု တိုင်းဒေသကြီးလွှတ်တော်ကိုယ်စားလှယ် ဦးစိမ်းမောင်က ပြောကြားသည်။
နာဂကိုယ်ပိုင်အုပ်ချုပ်ခွင့်ရဒေသ၊ အိန္ဒိယ - မြန်မာနယ်စပ် ပန်ဆောင်မြို့ပေါ်ရှိ နောင်ယန်းအင်း အကျယ်သည် အရှေ့နှင့် အနောက် သုံးမိုင်ခန့်၊ တောင်နှင့် မြောက်တစ်မိုင်ခန့် ကျယ်ဝန်းသည်ဟု သိရပြီး တောင်ပေါ်ဒေသတွင် တည်ရှိသော အင်းဖြစ်သည်။
“နောင်ယန်းအင်းကို ဒဏ္ဍာရီဆန်တဲ့ ပုံပြင်တွေ အများကြီးရှိတယ်။ သူတို့က ပြန်လမ်းမဲ့အင်း (Lake of No Return) ဆိုပြီးတော့ အိန္ဒိယဘက်က ပိုပြီး စိတ်ဝင်စားတယ်။ အရင်နှစ်တွေက ကားအစီး ၇၀၀ လောက်လာတယ်။ ဒီနှစ်တော့ တစ်ရက်ကို ကားအစီး ၄၀၀ လောက်လာတယ်” ဟု ပန်ဆောင်မြို့ခံတစ်ဦးက ပြောကြားသည်။
