ဧပြီ ၂၇ ရက်က ကိုရီးယားနှစ်နိုင်ငံ၏ သမိုင်းဝင်ထိပ်သီး ညစာစားပွဲ၌ နိုင်ငံခေါင်းဆောင်များနှင့် ၎င်းတို့၏ဇနီးများအား တွေ့ရစဉ် (Photo: AFP)

ကိုရီးယားနှစ်နိုင်ငံအကြား စစ်မဲ့ဇုန်တွင် ဧပြီ ၂၇ ရက်က ကျင်းပခဲ့သော သမိုင်းဝင်ကိုရီးယားထိပ်သီးမှ အသေးစိတ် အချက်အလက်များကို တောင်ကိုရီးယားပြည်သူများက ဧပြီ ၂၈ ရက်တွင် လေ့လာခဲ့ကြပြီး မြောက်ကိုရီးယားခေါင်းဆောင် ကင်ဂျုံအွန်၏ ထူးခြားသော နှစ်လိုဖွယ်ကောင်းမှုကို မင်တက်မိခဲ့ကြသည်။

တောင်ကိုရီးယားတွင် လူသန်းပေါင်းများစွာအား တိုက်ရိုက် ထုတ်လွှင့်သော ထိုထိပ်သီးသို့ ကင်က တက်ရောက်မှုသည် လျှို့ဝှက်ပြီး ပဟေဠိများဖြင့် ဖုံးကွယ်ထားသော ၎င်း၏နိုင်ငံတွင် လေးစားခံခဲ့ရသည့် အာဏာရှင်တစ်ဦးကို ပထမဆုံးအကြိမ် အချိန်ကြာမြင့်စွာ မြင်တွေ့လိုက်ရခြင်းဖြစ်သည်။

တောင်ကိုရီးယားပြည်သူများနှင့် ကမ္ဘာတစ်ဝန်းက ကင်အား လှောင်ပြောင်မှုနှင့် ထိတ်လန့်မှု ရောပြွမ်း၍ ကာလရှည်ကြာ ရှုမြင်ခဲ့ကြပြီး ဒုံးပစ်လွှတ်မှုများနှင့် စစ်ရေးပြပွဲများအား ၎င်းက ကြီးကြပ်နေမှုများကို မြင်တွေ့နေကျဖြစ်ခဲ့သည်။ သို့သော် ဧပြီ ၂၇ ရက်က ကမ္ဘာ့စင်မြင့်တွင်မူ ကင်ကို အလွန်အမင်း ကွဲပြားသည့်ပုံစံဖြင့် မြင်တွေ့ခဲ့ရသည်။

အသက် ၃၀ ကျော်ရှိပြီဟု ယူဆရသော ကင်သည် ထိုထိပ်သီးတွင် အနောက်တိုင်း၌ ရွေးကောက်ပွဲ အနိုင်ရရန် ကြိုးပမ်းနေသည့် နိုင်ငံရေးသမားကဲ့သို့ပင် မကြာခဏ ပြုံးပြခြင်း၊ ရယ်စရာများပြောခြင်းနှင့် ကလေးများအား ညင်ညင်သာသာ ပြုမူဆက်ဆံခြင်း စသည့် ၎င်း၏အကောင်းဆုံး အပြုအမူများကို ပြသခဲ့သည်။

“ကင်ဂျုံအွန်က ဟာသတစ်ခု ပြောခဲ့တယ်လို့ ပြောသံကြားလိုက်တော့ သူလည်း လူသားတစ်ယောက်ပါပဲဆိုတာ သိလိုက်ပါတယ်” ဟု အခမ်းအနားများ စီစဉ်သူတစ်ဦးဖြစ်သော အသက် ၂၄ နှစ်ရှိ ချွိုင်ဟွန်းအာက ပြောကြားခဲ့သည်။

အထီးကျန်နေထိုင်သော မြောက်ကိုရီးယားသည် ကင်အား တင်းကျပ်သော၊ ဇာတ်ညွှန်း ကြိုတင်ရေးထားသော၊ အပြုအမူများအား ထိန်းချုပ်ထားသောပုံစံများဖြင့် ကိုးကွယ်ကြကြောင်း ကိုရီးယားတိုင်းမ်က ဖော်ပြခဲ့သည်။ သို့သော် ၎င်း၏မျက်နှာ အမူအရာများ၊ လမ်းလျှောက်ပုံ၊ လက်ဟန်ခြေဟန်၊ အသံ၊ အနက်ရောင် မော်ဝတ်စုံနှင့် ဆံပင်ပုံစံတို့ အပါအဝင် ၎င်း၏ အကြောင်းအရာ အားလုံးကို ကမ္ဘာ့မီဒီယာများက တိုက်ရိုက်ထုတ်လွှင့်ခဲ့ကြသည်။

ကိုရီးယားတိုင်းမ်က ၎င်း၏ အယ်ဒီတာ့အာဘော်တွင် ကင်သည် အထီးကျန်ခေါင်းဆောင်တစ်ဦး မဟုတ်တော့ကြောင်း၊ သူသည် တောင်ကိုရီးယားသမ္မတမွန်းဂျေအင်းကို နယ်စပ်ကိုကျော်၍ မြောက်ကိုရီးယားသို့ ခဏတာခြေချရန် လက်တန်းဖိတ်ကြားခဲ့မှုနှင့်အတူ စွမ်းဆောင်ရည်ကောင်းမွန်သူ တစ်ဦးဖြစ်ကြောင်းကို ပြသခဲ့ကြောင်း ရေးသားခဲ့သည်။

ကာတွန်းဇာတ်ကောင်

ကင်သည် အလျင်အမြန်ပင် ခြေလှမ်းကျဲကျဲဖြင့် လမ်းလျှောက်ခဲ့ပြီး မြောက်ကိုရီးယားမှ ခေါက်ဆွဲအကြောင်းကိုပြော၍ တောင်ကိုရီးယားကိုယ်စားလှယ်အဖွဲ့အား ပွဲကျစေခဲ့ပြီး တစ်ခါတစ်ရံ စိတ်မြူးနေပုံရသည်။ ကိုရီးယားစစ်မဲ့ဇုန်ရှိ သစ်တောဖုံးလွှမ်းနယ်မြေတွင် ကင်နှင့် မွန်းတို့က လက်ဖက်ရည်သောက်၍ မိနစ် ၃၀ ကြာ စကားပြောမှုများကို ကင်မရာများက တည်ထားခဲ့သည်။ သို့သော် သစ်ပင်များတွင် နားနေသော ငှက်များ၏ သီချင်းသံများမှလွဲ၍ မည်သည့်စကားသံမျှ မကြားခဲ့ရပေ။ သို့သော် ကင်သည် ၎င်းထက် အသက်ကြီးသူ မွန်း၏စကားများအား အာရုံစိုက်၍ နားထောင်နေပုံရပြီး ညင်သာစွာ ခေါင်းညှိတ်ကာ ရံဖန်ရံခါ လက်ဟန်ခြေဟန်ဖြင့် အမူအရာများ ပြသခဲ့သည်။

ကင်၏လက်ရေးမူကို လေ့လာဆန်းစစ်နိုင်ရန် Korea Herald က ဧည့်သည်တော်မှတ်တမ်းစာအုပ်မှ ၎င်း၏လက်ရေးကိုပင် စစ်ဆေးခဲ့ပြီး ၎င်း၏အဘိုးနှင့် မြောက်ကိုရီးယား ထူထောင်သူဖြစ်သူ ကင်အီဆွန်းကို ပုံစံတူပြုထားသော အပြင်ပန်း သရုပ်သကန်များ၏ လက္ခဏာသွင်ပြင် အများအပြားနှင့် တူနေကြောင်း တွေ့ခဲ့ရသည်။ လက်ရေးမူပညာအရ ကင်သည် တက်ကြွပြီး တစ်ကိုယ်ကောင်းဆန်သော ကိုယ်ရည်ကိုယ်သွေးရှိပြီး ဧည့်သည်တော်မှတ်တမ်း၌ လက်မှတ်ထိုးချိန်တွင် အလွန်အမင်း ဂုဏ်ယူနေကြောင်း လေ့လာတွေ့ရှိခဲ့သည်။

ကင်ဂျုံအွန်၏အသံကို ရုပ်သံတွင် ကြားခဲ့ရမှုသည် အလွန့်အလွန် ထူးဆန်းကြောင်း ဆိုးလ်ရှိ အသက် ၃၂ နှစ်ရှိ မိခင်ဖြစ်သူ ကင်ယန်းအာက ပြောကြားခဲ့သည်။ “ကျွန်မပြောချင်တာက သူရှိတယ်ဆိုတာ ကျွန်မသိထားပြီးသား။ ဒါပေမဲ့ ဒီနေ့က ပထမဆုံးအကြိမ်လေ။ ဘယ်လိုဖြစ်သွားလဲဆိုတော့။ တကယ်ပဲ ကင်ဂျုံအွန်က တကယ့်လူသားတစ်ယောက်ပဲလို့ ခံစားလိုက်ရတယ်” ဟု ၎င်းက Korea Herald သို့ ပြောကြားခဲ့သည်။ “ဒီနေ့မတိုင်ခင်အထိ ကင်ဆိုတာ ကာတွန်းဇာတ်ကောင်တစ်မျိုးလို့ အမြဲပဲယူဆထားတာ။ အခု သူက နျူကလီးယားလက်နက်တွေ ဒါမှမဟုတ် စစ်ပွဲအကြောင်းတွေ မပြောဘဲ ခေါက်ဆွဲအေးလိုမျိုး ပုံမှန်အကြောင်းအရာတွေကိုပဲပြောတော့ ထူးခြားနှစ်သက်စရာပဲလေ” ဟု ၎င်းက ပြောကြားခဲ့သည်။

သဘာဝအလှ

တောင်ကိုရီးယားပြည်သူများသည် ကင်ဂျုံအွန်၏ဇနီး ရီဆိုဂျုနှင့် ဧပြီ ၂၇ ရက်က ကင်နှင့်အတူ အချိန်အတန်ကြာ အတူရှိနေသော ၎င်း၏ ညီမဖြစ်သူ ကင်ယိုဂျုံတို့ကိုလည်း စိတ်ဝင်စားခဲ့ကြသည်။

ပြီးခဲ့သောဖေဖော်ဝါရီတွင် တောင်ကိုရီးယားနိုင်ငံ ပြုံချန်၌ ဆောင်းရာသီအိုလံပစ်ပြိုင်ပွဲသို့ ကင်၏သံတမန်အဖြစ် တက်ရောက်ခဲ့သော ကင်ယိုဂျုံသည် ဧပြီ ၂၇ ရက်တွင် တောင်ကိုရီးယားသမ္မတမွန်းအား နှုတ်ဆက်စဉ် ပေါ်ပေါ်လွင်လွင် ပြုံးပြခဲ့သည်။ မွန်းက ကင်ယိုဂျုံအား ထင်ရှားသူတစ်ဦး ဖြစ်လာနေကြောင်း ပြောကြားခဲ့ရာ ကင်သည် ရှက်သွေးဖြန်းသွားကြောင်း အစိုးရတာဝန်ရှိသူများက နောက်ပိုင်းတွင် ထုတ်ဖော်ပြောခဲ့သည်။

ရီသည်လည်း တောင်ကိုရီးယား အင်တာနက်ဝက်ဘ်ဆိုက်များတွင် ရှာဖွေမှုအများဆုံး၌ ရှိနေခဲ့ပြီး အင်တာနက် အသုံးပြုသူများက ရီသည် သဘာဝအလှရှိသူ၊ ထောင်လွှားမှုမရှိဘဲ အမူအကျင့်ကောင်းသူနှင့် ကျက်သရေရှိသူအဖြစ် ခိုင်းနှုန်းခဲ့ကြသည်။

သို့သော် ဧပြီ ၂၈ ရက် မွန်းလွဲပိုင်း၌ ထိပ်သီးတွင် ကိုရီးယားဇာတ်ကား Delta Boys က ထိပ်တန်းအကြောင်းအရာအဖြစ် ပြောင်းသွားခဲ့သည်။ ယင်းနောက် မြောက်ကိုရီးယားသည် အစိုးရထောက်ပံ့မှုဖြင့် လူ့အခွင့်အရေး ချိုးဖောက်နေကြောင်း စွပ်စွဲခံရမှုနှင့်အတူ အချို့ကပြုံးပြရန်နှင့် ပွေ့ဖက်ရန် ငြင်းဆန်ခဲ့ကြသည်။

ထိုသမိုင်းဝင်ထိပ်သီးအား ဆန့်ကျင်သည့် မြောက်ကိုရီးယား ဆန့်ကျင်ရေးအဖွဲ့တစ်ဖွဲ့၏ခေါင်းဆောင် မင်ဂျောင်းဟုံက ပြုံယမ်းသည် လူသတ်မှု၊ ညှဉ်းပန်းနှိပ်စက်မှုနှင့် ထောင်သွင်းအကျဉ်းချမှုတို့ အပါအဝင် လူသားများ၏ အခြေခံအခွင့်အရေးများအား ဆက်လက်ချိုးဖောက်နေချိန်တွင် ဆိုးလ်က ၎င်းတို့နှင့် ညိနှိုင်းဆွေးနွေးမှု မလုပ်သင့်ကြောင်း Korea Herald သို့ ပြောကြားခဲ့သည်။

Ref: AFP