အာရပ်စော်ဘွားများပြည်ထောင်စု၏ ဘဏ္ဍာရေးအချက်အချာမြို့ဖြစ်သည့် ဒူဘိုင်းမြို့တွင် စံချိန်တင်မိုးရွာသွန်းခဲ့မှုကြောင့် မြို့တွင်းလမ်းမများ ရေမြုပ်သွားခဲ့သည်။ သဲကန္တာရနိုင်ငံဖြစ်သည့် အာရပ်စော်ဘွားများပြည်ထောင်စု(ယူအေအီး)တွင် ဧပြီ ၁၆ ရက်နေ့က မိုးကြီးခဲ့မှုသည် နှစ်နှစ်ခန့်မိုးရွာသွန်းမှုနှင့်ညီခဲ့သည်။

ဒူဘိုင်းရဲတပ်ဖွဲ့ထုတ်ပြန်ချက်အရ လူတစ်ဦးသေဆုံးထားပြီး ကားနှင့်အတူမျောပါသွားသည့် အသက် ၇၀ အရွယ် အမျိုးသားတစ်ဦးဟု သိရသည်။ အာဏာပိုင်တစ်ဦးအဆိုအရ ကမ္ဘာ့အစည်ကားဆုံး လေဆိပ်တစ်ခုဖြစ်သည့် ဒူဘိုင်းလေဆိပ်သို့ မဖြစ်မနေအခြေအနေမျိုးမှအပ ခရီးသည်များ လာရောက်ခြင်းမပြုရန် သတိပေးချက်ထုတ်ပြန်ထားသည်။

လေကြောင်းခရီးစဉ်များလည်း အချိန်နှောင့်နှေးခြင်း ၊ လမ်းလွှဲပျံသန်းခြင်းများပြုလုပ်ထားရပြီး လုပ်ငန်းများ အမြန်လည်ပတ်နိုင်ရန် ကြိုးစားနေသည်ဟု ဒူဘိုင်းလေဆိပ်ပြောခွင့်ရှိသူတစ်ဦးကဆိုသည်။ ဒူဘိုင်းလေကြောင်းလိုင်း အမ်းမရိတ်စ်ကမူ  ဧပြီ ၁၇ ရက်တွင် check-ins အားလုံးကို ဖျက်သိမ်းလိုက်သည်။

အိုမန်နိုင်ငံတွင် မုန်တိုင်းကျမှုကြောင့် ကလေးများအပါအဝင် လူ ၁၈ ဦးသေဆုံးထားပြီး ၊ ဧပြီ ၁၅ ရက်နှင့်  ၁၆ ရက်တို့တွင် အာရပ်စော်ဘွားများပြည်ထောင်စုနှင့် ဘာရိန်းနိုင်ငံတို့ကို မုန်တိုင်းဝင်ရောက်လာခြင်းဖြစ်သည်။မိုးလေဝသပညာရှင်များကမူ ယခုကဲ့သို့ကြုံနေရခြင်းမှာ ကမ္ဘာကြီးပူနွေးလာမှုကြောင့် အများဆုံးဖြစ်နိုင်သည်ဟု သုံးသပ်ကြသည်။

၁၉၇၁ ခုနှစ်တွင် အာရပ်စော်ဘွားများပြည်ထောင်စုကို မတည်ထောင်မီကတည်းက မှတ်သားလာသည့် မိုးရွာမှုမှတ်တမ်းများအရ ယခုမိုးကြီးမှုသည် အဆိုးဝါးဆုံးဖြစ်သည်။

Ref:AFP