ရန်ကုန်မြို့ ကမ်းနားလမ်းရှိ အပြည်ပြည်ဆိုင်ရာ ဆိပ်ကမ်းတစ်ခုကို တွေ့ရစဉ် (ဓာတ်ပုံ-ကျော်ဇင်ဖြိုး)

၂၀၁၇-၂၀၁၈ ဘဏ္ဍာနှစ်အတွင်း ပြည်ပသို့ ပဲမျိုးစုံတန်ချိန် ၁၃ သိန်းကျော် တင်ပို့ခဲ့ပြီး ဒေါ်လာ ၈၈၃ သန်းကျော်ရရှိခဲ့ကာ ယခင်ဘဏ္ဍာနှစ်နှင့်နှိုင်းယှဉ်ပါက တန်ချိန်တစ်သိန်းကျော်၊ ရငွေဒေါ်လာသန်း ၅၀၀ ကျော် လျော့နည်းခဲ့ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ ထုတ်ပြန်သော ကုန်သွယ်ရေးစာရင်းများအရ သိရသည်။

၂၀၁၇-၂၀၁၈ ဘဏ္ဍာနှစ်အတွင်း အိန္ဒိယနိုင်ငံ၏ ပဲတင်သွင်းမှု ကန့်သတ်ခံခဲ့ရခြင်းကြောင့် တင်ပို့မှုပမာဏလျော့နည်းခဲ့ပြီး နိုင်ငံတကာပဲဈေးများ ကျဆင်းမှုကြောင့် တင်ပို့မှုမှရငွေလည်း သိသိသာသာ ကျဆင်းခဲ့သည်။ ၂၀၁၆-၂၀၁၇ ဘဏ္ဍာနှစ်တွင် ပြည်ပသို့ ပဲမျိုးစုံတန်ချိန် ၁၄ သိန်းနီးပါးအထိ တင်ပို့နိုင်ခဲ့ပြီး ဒေါ်လာ ၁ ဒသမ ၄၂၄ ဘီလျံအထိ ရရှိခဲ့ခြင်းဖြစ်သည်။

၂၀၁၇-၂၀၁၈ ဘဏ္ဍာနှစ်အတွင်း တင်ပို့မှုအများဆုံး ပဲအမျိုးအစားနှင့် ရငွေမှာ မတ်ပဲတန်ချိန် ၅၂၇၂၈၅ တန်တင်ပို့မှုမှ ဒေါ်လာ ၃၄၃ ဒသမ ၆၉၈ သန်း၊ ပဲတီစိမ်းတန်ချိန် ၃၄၈၃၁၇ တန်တင်ပို့မှုမှ ဒေါ်လာ ၂၉၉ ဒသမ ၂၄၈ သန်း၊ ပဲစင်းငုံတန်ချိန် ၂၂၄၅၆၆ တန်တင်ပို့မှုမှ ဒေါ်လာ ၉၉ ဒသမ ၂၃၉ သန်း ရရှိခဲ့သည်။

ယခင် ၂၀၁၆-၂၀၁၇ ဘဏ္ဍာနှစ်တွင် မတ်ပဲတန်ချိန် ၅၆၁၇၆၆ တန် (တန်ဖိုး ဒေါ်လာ ၆၇၂ ဒသမ ၂၈၉ သန်း)၊ ပဲတီစိမ်းတန်ချိန် ၄၀၇၅၉၅ တန် (တန်ဖိုးဒေါ်လာ ၃၄၉ ဒသမ ၈၀၂ သန်း)၊ ပဲစင်းငုံတန်ချိန် ၁၈၄၆၁၀ တန် (တန်ဖိုးဒေါ်လာ ၁၅၉ ဒသမ ၇၈၈ သန်း) တင်ပို့နိုင်ခဲ့ရာ ပို့ကုန်ပမာဏရော၊ ရငွေတန်ဖိုးပါ ယခင်ဘဏ္ဍာနှစ်ထက် လျော့နည်းခဲ့ခြင်းဖြစ်သည်။

၂၀၁၇-၂၀၁၈ ဘဏ္ဍာနှစ်အတွင်း ပြည်ပတင်ပို့သော ပဲအမျိုးအစားများဖြစ်သော ကုလားပဲဖြူလုံးကြီး၊ ပဲလွမ်းဖြူ၊ မြေထောက်ပဲ၊ ထောပတ်ပဲ၊ ပဲယင်း၊ ပဲကြီး၊ ပဲကတ္တီပါ (စွန်တာနီ/ပြာ)၊ ပဲဖြူလေး၊ ဗိုလ်ကိတ်ပဲ၊ ပဲပုပ်၊ ပဲနီကျား၊ နိုင်လွန်ပဲ၊ မြေပဲဆန် စသည့်ပဲများတွင်လည်း အများစုမှာ တင်ပို့မှုပမာဏ လျော့ကျခဲ့ကြောင်း သိရသည်။

အခြားလယ်ယာစိုက်ပျိုးရေး ထွက်ကုန်များဖြစ်သည့် ပြောင်းနှင့် နှမ်းတင်ပို့မှုမှာမူ ၂၀၁၆-၂၀၁၇ ဘဏ္ဍာနှစ်ထက် တင်ပို့မှုပမာဏရော ရငွေပါ ပိုမိုများပြားခဲ့သည်။ ၂၀၁၇-၂၀၁၈ ဘဏ္ဍာနှစ်အတွင်း ပြောင်းတင်ပို့မှု တန်ချိန် ၁၄၃၇၄၈၃ တန် (တန်ဖိုးဒေါ်လာ ၂၉၄ ဒသမ ၄၈၁ သန်း)၊ နှမ်းတင်ပို့မှုတန်ချိန် ၁၂၀၉၉၉ တန် (တန်ဖိုးဒေါ်လာ ၁၄၆ ဒသမ ၉၉၈ သန်း) တင်ပို့နိုင်ခဲ့သည်။ ၂၀၁၆-၂၀၁၇ ဘဏ္ဍာနှစ်တွင် ပြောင်းတင်ပို့မှု တန်ချိန် ၁၂၉၂၁၇၉ တန် (တန်ဖိုးဒေါ်လာ ၂၅၂ ဒသမ ၅၉၁ သန်း)၊ နှမ်းတင်ပို့မှုတန်ချိန် ၁၀၇၈၁၁ တန် (တန်ဖိုးဒေါ်လာ ၁၄၅ ဒသမ ၆၉၅ သန်း) သာ တင်ပို့နိုင်ခဲ့ခြင်းဖြစ်ရာ ၂၀၁၇-၂၀၁၈ ဘဏ္ဍာနှစ်တွင် ပြောင်းနှင့် နှမ်းတင်ပို့မှုပမာဏ တိုးတက်ခဲ့ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၏ ကုန်သွယ်ရေးစာရင်းများအရ သိရသည်။

မြန်မာနိုင်ငံသည် ကမ္ဘာ့ပဲအများဆုံးတင်ပို့သည့် နိုင်ငံတစ်နိုင်ငံဖြစ်ပြီး ၂၀၁၇-၂၀၁၈ ဘဏ္ဍာနှစ်အတွင်း ဈေးကွက်အဓိကအားထားနေသည့် အိန္ဒိယနိုင်ငံ၏ တင်သွင်းခွင့် ကန့်သတ်ခံရခြင်းကြောင့် ပို့ကုန်ပမာဏနှင့် ဝင်ငွေလျော့ကျခဲ့ကာ ပြည်တွင်းပဲဈေးကွက်တွင်လည်း ဈေးများထိုးဆင်းနေဆဲဖြစ်သည်။