မြောက်ကိုရီးယားနိုင်ငံသည် ဂျပန်နှင့် ဆက်ဆံရေးများ တိုးတက်ကောင်းမွန်စေရန် လမ်းဖွင့်ပေးသွားမည်ဖြစ်ကြောင်း မြောက်ကိုရီးယားခေါင်းဆောင် ကင်ဂျုံအွန်၏ သြဇာကြီးမားသည့် ညီမဖြစ်သူ ကင်ယိုဂျုံက ဖေဖော်ဝါ ရီ ၁၅ ရက်တွင် ပြောကြားခဲ့သည်။

ထို့ပြင် ကင်ယိုဂျုံက အနာဂတ်ကာလတွင် ဂျပန်ခေါင်းဆောင်ကို မြောက်ကိုရီးယားသို့ လာရောက်ရန် ဖိတ်ကြားမည့်အခြေအနေကိုပါ အရိပ်အမြွက် ဖော်ပြခဲ့သည်။

ပြီးခဲ့သည့် သီတင်းပတ်အတွင်း ဂျပန်ဝန်ကြီးချုပ် ဖူမီယို ကီရှီဒါက မြောက်ကိုရီးယားနှင့် ဂျပန်အကြားလက်ရှိ ဆက်ဆံရေးများကို ပြောင်းလဲရန် အခိုင်အမာလိုအပ်သည်ဟု ယူဆရကြောင်း ပြောကြားခဲ့ပြီးနောက် ကင်ယိုဂျုံ၏ မှတ်ချက်စကားများ ထွက်ပေါ်လာခဲ့ခြင်းဖြစ်သည်။

“မကြာသေးခင်က သူ(ကီရှီဒါ)ပြောခဲ့တဲ့ မိန့်ခွန်းဟာ အပြုသဘောဆောင်တဲ့ ပြောကြားချက်ဖြစ်တယ်ဆိုတာကို အသိအမှတ်မပြုစရာ အကြောင်းမရှိပါဘူး။ ဒါဟာသူ့ရဲ့စစ်မှန်တဲ့ ရည်ရွယ်ချက်ဖြစ်ခဲ့မယ်ဆိုရင်ပေါ့”ဟု ကင်ယိုဂျုံက ပြောကြားခဲ့ကြောင်း နိုင်ငံပိုင် KCNA သတင်းအေဂျင်စီက ဖော်ပြခဲ့သည်။

၁၉၇၀ ပြည့်နှစ်နှင့် ၁၉၈၀ ပြည့်နှစ်များက ဂျပန်နိုင်ငံသားများကို မြောက်ကိုရီးယားက ပြန်ပေးဆွဲမှုများကို အတိတ်တွင် ချန်ထားခဲ့မှုအပါအဝင် ဂျပန်၏ လုပ်ဆောင်ချက်များအပေါ်မူတည်ပြီး မိမိတို့နှစ်နိုင်ငံအနေနှင့် အနာဂတ်သစ်တစ်ခုကို အတူတကွ ဖွင့်လှစ်နိုင်ကြောင်း ကင်ယိုဂျုံက ပြောကြားခဲ့သည်။

“နှစ်နိုင်ငံစလုံးအတွက် မရင်းနှီးလာစရာ ဘာအကြောင်းမှမရှိပါဘူး။ ဂျပန်ဝန်ကြီးချုပ်ရဲ့ ပြုံယမ်းခရီးစဉ် ဖြစ်ပေါ်လာမယ့်နေ့ကလည်း ရောက်လာမှာပါ”ဟု ၎င်းက ပြောသည်။မြောက်ကိုရီးယားက ဂျပန်နိုင်ငံသား များကိုပြန်ပေးဆွဲခဲ့သည့် ဖြစ်စဉ်များသည် ဂျပန်နိုင်ငံတွင် ထိလွယ်ရှိလွယ်ရှိသည့် ပြဿနာတစ်ခုအဖြစ် ဆက်လက်တည်ရှိနေဆဲဖြစ်သည်။

မြောက်ကိုရီးယားနိုင်ငံကလည်း ၁၉၇၀ ပြည့်နှစ်နှင့် ၁၉၈၀ ပြည့်နှစ်များတွင် ဂျပန်နိုင်ငံသား ၁၃ ဦးကို ပြန်ပေးဆွဲရန် အေးဂျင့်များ ဖြန့်ကြက်ခဲ့ပြီး ထိုဂျပန်နိုင်ငံသားများကို  ဂျပန်နိုင်ငံတွင်ရှိသည့် မြောက်ကိုရီးယားစ ပိုင်များအား ဂျပန်ဘာသာစကားနှင့် ထုံးတမ်းစဉ်လာများ လေ့ကျင့်သင်ကြားပေးရန် ဖိအားပေးခဲ့ကြောင်း ၂၀၀၂ ခုနှစ်က ဝန်ခံခဲ့သည်။

သို့သော် မြောက်ကိုရီးယားသည် တရားဝင်အသိအမှတ်ပြုထားသည့် လူအရေအတွက်ထက်ပိုသည့် ဂျပန်နိုင်ငံသားများကို ပြန်ပေးဆွဲခဲ့ဖွယ်ရှိသည်ဟု ဂျပန်တွင် သံသယများ ဖြစ်ပွားနေဆဲဖြစ်သည်။

ပြီးခဲ့သည့်နှစ်က ကုလသမဂ္ဂအထွေထွေညီလာခံတွင် မိန့်ခွန်းပြောချိန်က ကီရှီဒါသည်သူ့အနေဖြင့် မြောက်ကိုရီးယားခေါင်းဆောင်နှင့် သတ်မှတ်ချက်များမပါဘဲ တွေ့ဆုံလိုကြောင်းနှင့် ဂျပန်အစိုးရအနေဖြင့် ပြန်ပေးဆွဲမှုများအပါအဝင် ပြဿနာအားလုံးကို ဖြေရှင်းရန် ဆန္ဒရှိကြောင်း ပြောကြားခဲ့သည်။

ဂျပန်ဝန်ကြီးချုပ်ဟောင်း ဂျူနီချီရို ကိုအီဇူမီသည် ၂၀၀၂ ခုနှစ်က ပြုံယမ်းသို့ သွားရောက်ခဲ့ပြီး ကင်၏ဖခင် ကင်ဂျုံအီလ်နှင့်တွေ့ဆုံခဲ့ကာ နှစ်နိုင်ငံအကြား ဆက်ဆံရေးများ ပုံမှန်ပြန်လည်ထူထောင်ရေးနှင့် ဂျပန်က စီး ပွားရေးအထောက်အပံ့များပေးမည့်အစီအစဉ်များကို ဆွေးနွေးခဲ့သည်။

ထိုခရီးစဉ်အပြီးတွင် မြောက်ကိုရီးယားက ဂျပန်နိုင်ငံသားငါးဦးကို ပြန်လွှတ်ပေးခဲ့သော်လည်း မြောက်ကိုရီးယားသည် ၎င်းတို့ ပြန်ပေးဆွဲထားသူများနှင့်ပတ်သက်ပြီး ရှင်းချက်မထုတ်ခဲ့မှုအပေါ် ဂျပန်က စိုးရိမ်မှုများကြောင့် နှစ်နိုင်ငံသံတမန်ဆက်ဆံရေး ပြတ်တောက်ခဲ့သည်။

ထို့ပြင်မကြာသေးမီက ဂျပန်သည် အမေရိကန်၊ တောင်ကိုရီးယားတို့နှင့် ပူးပေါင်းဆောင်ရွက်မှုများ တိုးမြှင့်ခဲ့သဖြင့် မြောက်ကိုရီးယားနှင့် ဆက်ဆံရေးတင်းမာခဲ့သည်။

Ref: AFP