Blackpink အဖွဲ့ဝင်လီဆာ အင်စတာဂရမ်တွင် ပို့စ်တစ်ခုတင်လိုက်သည်နှင့် အမေရိကန်ဒေါ်လာ ၅၇၅,၀၀၀ ရနေပြီးသားဟု ဆိုရှယ်မီဒီယာမားကတ်တင်းပလက်ဖောင်း Hopper HQ က ထုတ်ပြန်သည့် အင်စတာ ဂရမ်ဖြင့် ချမ်းသာနေသူများစာရင်းတွင် ဆိုထားသည်။
လီဆာက ထိုစာရင်း၏ အဆင့်(၂၆)တွင် ရပ်တည်နေပြီး အာရှအနုပညာရှင်များထဲတွင် ဝင်ငွေအကောင်းဆုံးဖြစ်နေသည်။ အသက် ၂၆ နှစ်ရှိပြီဖြစ်သည့် လီဆာသည် အင်စတာဂရမ်တွင် ဖော်လိုဝါပရိသတ် ၉၆.၆ သန်းကျော်ရှိသည်။
အိန္ဒိယရုပ်ရှင်မင်းသမီး ပရီယန်ကာ ချိုပရာက အဆင့် (၂၉) ဖြစ်ပြီး ပို့စ်တစ်ခုတင်သည်နှင့် အမေရိကန်ဒေါ်လာ ၅၃၂,၀၀၀ ရနေသည်။အမေရိကန်အဆိုတော် နစ်ဂျိုးနက်စ်နှင့် အိမ်ထောင်ကျထားသည့် လက်ရှိ အသက် ၄၁ နှစ်အရွယ်ရှိ ပရီယန်ကာသည် အင်စတာဂရမ်တွင် ဖော်လိုဝါ ၈၈.၈ သန်းကျော် ပိုင်ဆိုင်ထားသည်။
တောင်ကိုရီးယားမင်းသားလီမင်ဟိုက ပို့တစ်ခုလျှင် အမေရိကန်ဒေါ်လာ ၂၀၀,၀၀၀ ဝင်နေပြီး စာရင်း၏အဆင့် (၅၅)တွင် ရပ်တည်နေသည်။ အသက် ၃၆ နှစ်အရွယ်ရှိလီမင်ဟို၏ အင်စတာဂရမ်ဖော်လိုဝါဦးရေက ၃၃.၆ သန်းကျော်ရှိသည်။
ပို့စ်တစ်ခုလျှင် အမေရိကန်ဒေါ်လာ ၁၀၀,၀၀၀ ဝင်ငွေဖြင့် စာရင်း၏အဆင့်(၉၃) တွင် ရပ်တည်နေသူက The Glory ဇာတ်လမ်းတွဲဖြင့် အောင်မြင်မှုအထွတ်အထိပ် ရောက်သွားသည့် မင်းသမီးဆောင်းဟေကို ပင်ဖြစ်သည်။သူ့အင်စတာဂရမ်တွင် ဖော်လိုဝါ ၁၆.၈ သန်းကျော်ရှိသည်။
ပေါ်တူဂီဘောလုံးကစားသမား ရော်နယ်ဒိုက စာရင်း၏ထိပ်ဆုံးနေရာကို ဗိုလ်စွဲ ထားပြီး ပို့စ်တစ်ခုလျှင် အမေရိကန်ဒေါ်လာ ၃.၂ သန်းရနေသည်။ဆော်ဒီဘောလုံးအသင်း Al-Nassr သို့ရောက်သွားသည့် အသက် ၃၈ နှစ်အရွယ်ရှိ ရော်နယ်ဒိုသည် ဖော်လိုဝါ ၆၀၁ သန်းကျော်ဖြင့် အင်စတာဂရမ်တွင် ဖော်လိုဝါ အများဆုံး ပိုင်ဆိုင်ထားသူလည်းဖြစ်သည်။
အဆင့်(၂)နေရာတွင် ရှိနေသူက အာဂျင်တီးနား ဘောလုံးကစားသမား မက်ဆီဖြစ်ပြီး ပို့စ်တစ်ခုလျှင် အမေရိကန်ဒေါ်လာ ၂.၆ သန်းရနေသည်။သူ့တွင် အင်စတာဂရမ် ဖော်လိုဝါ ၄၈၃ သန်းကျော်ရှိသည်။
အမေရိကန်အဆိုတော်၊သရုပ်ဆောင် ဆယ်လီနာဂိုးမတ်ဇ်က အဆင့်(၃)နေရာတွင် ရပ်တည်နေကာ ပို့စ်တစ်ခုလျှင် အမေရိကန် ဒေါ်လာ ၂.၅၆ သန်းရနေသည်။
