မတ် ၂၇ ရက်တွင် ဖက်ဆစ်တော်လှန်ရေးနေ့ အခမ်းအနား ရန်ကုန်မြို့ NLD ပါတီရုံးချုပ်၌ ပြုလုပ်စဉ်
တပ်မတော်နှင့် နိုင်ငံရေးပါတီများ ပူးပေါင်းဆောင်ရွက်မှုတွင် အမျိုးသားရင်ကြားစေ့ရေးကို အပြည့်အ၀ မဖော်ဆောင်နိုင်သေးဘဲ တပ်မတော်၏ အကျိုးစီးပွားနှင့် နိုင်ငံသူနိုင်ငံသားများ၏ အကျိုးစီးပွား တစ်ထပ်တည်းကျရန်လိုနေကြောင်း အမျိုးသားဒီမိုကရေစီအဖွဲ့ချုပ်ပါတီ (NLD) ၏ ပြောရေးဆိုခွင့်ရှိသူ ဒေါက်တာမျိုးညွန့်က ပြောကြားသည်။
ရန်ကုန်မြို့ရှိ အမျိုးသားဒီမိုကရေစီအဖွဲ့ချုပ်ပါတီ ဗဟိုရုံးချုပ်၌ မတ် ၂၇ ရက်က ပြုလုပ်သည့် (၇၃) နှစ်မြောက် ဖက်ဆစ်တော်လှန်ရေးနေ့ (တပ်မတော်နေ့) အခမ်းအနားအပြီး မီဒီယာများနှင့်တွေ့ဆုံစဉ် ထိုကဲ့သို့ ပြောကြားခဲ့ခြင်းဖြစ်သည်။
ဒေါက်တာမျိုးညွန့်က “မြန်မာ့နိုင်ငံရေးမှာ တပ်မတော်နဲ့ နိုင်ငံရေးပါတီများ ပူးပေါင်းဆောင်ရွက်မှုမှာ အမျိုးသားရင်ကြားစေ့ရေးကို အပြည့်အဝမဖော်ဆောင်နိုင်သေးတာ ကျွန်တော်တို့တွေ့ရမှာပါ။ တပ်မတော်ရဲ့ အကျိုးစီးပွားနဲ့ နိုင်ငံသူနိုင်ငံသားတွေရဲ့ အကျိုးစီးပွား တစ်ထပ်တည်းဖြစ်အောင်လုပ်ဖို့ လိုပါသေးတယ်လို့ ပြောချင်ပါတယ်” ဟုပြောကြားသည်။
လက်ရှိတွင် မတ် ၂၇ ရက်ကို တပ်မတော်နေ့ဟု ခေါ်ဝေါ်သုံးနှုန်းနေသော်လည်း အမျိုးသားဒီမိုကရေစီအဖွဲ့ချုပ်ပါတီအနေဖြင့် ဖက်ဆစ်တော်လှန်ရေးနေ့အဖြစ် အမည်တပ်၍ အခမ်းအနားပြုလုပ်ခြင်းဖြစ်သဖြင့် အမည်နာမအသုံးအနှုန်း ကွဲပြားမှုရှိနေသည့်အပေါ် “ဒါကတော့ အမျိုးသားရင်ကြားစေ့ရေးအရ လုပ်သွားရမှာပါ။ ဒါပေမဲ့ ကျွန်တော်တို့က စကားလုံးအသုံးအနှုန်းတစ်ခုတည်းထက် ကျွန်တော်တို့ရဲ့အနှစ်သာရအရ လုပ်ဆောင်မှုတွေမှာ ပိုပြီးတော့ ပူးပေါင်းဆောင်ရွက်မှုရှိစေချင်တဲ့ သဘောရှိပါတယ်” ဟု ဒေါက်တာမျိုးညွန့်က ပြောကြားသည်။
“ကျင်းပတာက သာမန်လုပ်ရိုးလုပ်စဉ်ပဲလို့ မြင်ပါလိမ့်မယ်။ အဲဒီတော့ ကျွန်တော်မေးမယ်။ ဒီကနေ့ ကျွန်တော်တို့မကျင်းပရင်ရော ဘယ်လိုဖြစ်မလဲ။ အဲဒါဆိုရင် ဒီနေ့ဘာကြောင့် ကျင်းပရသလဲဆိုတာ ပေါ်လွင်လာပါလိမ့်မယ်။ ကျွန်တော်တို့ဟာ ကျွန်တော်တို့ရဲ့ရည်မှန်းချက်ကို တစိုက်မတ်မတ် လုပ်နေတယ်ဆိုတာကို ပြနိုင်တာဖြစ်ပါတယ်။ နောက်တစ်ခုက ဒါကို ဖက်ဆစ်တော်လှန်ရေးနေ့လို့ သတ်မှတ်ထားတယ်။ ဘာကြောင့်လဲ။ ဖက်ဆစ်တော်လှန်ရေးဟာ တပ်မတော်တစ်ခုတည်း မဟုတ်ပါဘူး။ ပြည်သူ့ရင်က ပေါက်ဖွားလာတဲ့ တပ်မတော်သားတွေရော၊ ပြည်သူတွေအားလုံးရော ပြည်သူဆိုတာမှာ ဘာသာယုံကြည်မှုပေါင်းစုံက ပြည်သူတွေ ဗမာတွေတင်မက တိုင်းရင်းသားပေါင်းစုံပါတဲ့ အားလုံးကို အားလုံးပါဝင်နိုင်မှုရှိတဲ့ အမည်နာမဖြစ်တဲ့အတွက် ဖက်ဆစ်တော်လှန်ရေးဆိုတာ ကျွန်တော်တို့ ခိုင်ခိုင်မြဲမြဲ ကိုင်ထားတာဖြစ်ပါတယ်။ ဒီကနေ့ကျင်းပခြင်းအားဖြင့် မြန်မာနိုင်ငံမှာ ဖြစ်ပေါ်နေတဲ့ နိုင်ငံရေးအကျပ်အတည်းဟာ ပိုပြီးတော့ မီးမောင်းထိုးပြသလိုဖြစ်ပါတယ်။ ဘာဖြစ်လို့တုံး။ ကျွန်တော်တို့ ပြည်သူအားလုံး ပြည်သူတွေကနေပြီးတော့ ပြည်သူရဲ့ဆန္ဒကို ဖော်ဆောင်ရမယ့်နိုင်ငံရေးပါတီများ ပြည်သူရဲ့ရင်ကပေါက်ဖွားပြီး ပြည်သူကို လုံခြုံရေးပေးရမယ့် တပ်မတော်များ ဒါတွေဟာ ပေါင်းစည်းဖို့လိုပြီ” ဟု ဒေါက်တာမျိုးညွန့်က (၇၃) နှစ်မြောက် ဖက်ဆစ်တော်လှန်ရေးနေ့ အခမ်းအနားပြုလုပ်ရခြင်းနှင့် ပတ်သက်၍ ပြောကြားသည်။
ဆက်လက်၍ အမျိုးသားဒီမိုကရေစီအဖွဲ့ချုပ်ပါတီ၏ လုပ်ဆောင်ချက်များကိုလည်း ပြည်သူများအနေဖြင့် အကဲဖြတ်ကြရန်လိုကြောင်း၊ အဖွဲ့ချုပ်အနေဖြင့် မိမိတို့အဖွဲ့ချုပ်ကသာ အမြဲတမ်းအသာစီးရရမည်၊ မိမိတို့အဖွဲ့ချုပ်ကသာ အုပ်စီးရမည်ဟူသည့် မူဝါဒများမရှိကြောင်း၊ မိမိတို့ပါတီအဖွဲ့ဝင်များသည် လူသားများဖြစ်သည့်အတွက် တချို့သောပြောဆိုမှုများ၌ ချွတ်ချော်မှုများ ရှိကောင်းရှိနိုင်ကြောင်း၊ သို့သော် အမျိုးသားဒီမိုကရေစီအဖွဲ့ချုပ်၏ မူဝါဒဖြစ်သည့် အမျိုးသားရင်ကြားစေ့ရေးကသာ မယိမ်းမယိုင် တစ်သမတ်တည်းဖြစ်ကြောင်း ၎င်းက ပြောကြားသည်။
