<

ဆီးချို၊ သွေးချို၊ နှလုံးနှင့် ကင်ဆာရောဂါများသည် ကျန်းမာရေးနှင့်သေဆုံးမှုကို တစ်ပြိုက်နက်တည်း ခြိမ်းခြောက်နေပြီး ကျန်းမာရေးအသုံးစရိတ် တစ်နေ့တခြား ပို၍ကျခံသုံးစွဲနေရ

တော်ဝင်လူငယ်ဆရာဝန်အဖွဲ့မှ ဆရာဝန်များက အခမဲ့ ကျန်းမာရေးစောင့်ရှောက်မှုပေးနေစဉ်

မြန်မာနိုင်ငံ အပါအ၀င် ကမ္ဘာ့နိုင်ငံ အသီးသီးတွင် ကူးစက်တတ်သော ရောဂါများကို အလေးပေး တိုက်ဖျက်နေစဉ်တွင် မကူးစက်နိုင်သောရောဂါများဖြစ်သည့် ဆီးချို၊ သွေးချို၊ နှလုံးနှင့် သွေးကြောဆိုင်ရာ ရောဂါ၊ သွေးတိုးရောဂါနှင့် ကင်ဆာရောဂါတို့သည် ကျန်းမာရေးနှင့် သေဆုံးမှုများကို တစ်ပြိုင်နက်တည်း ခြိမ်းခြောက်နေပြီး နိုင်ငံတိုင်း၏ ကျန်းမာရေး အသုံးစရိတ်များသည် တစ်နေ့တခြားပို၍ ကျခံသုံးစွဲနေရကြောင်း ရန်ကုန်မြို့တော် စည်ပင်သာယာရေး ကော်မတီ အတွင်းရေးမှူးဒေါ်လှိုင်မော်ဦးက ပြောကြားသည်။

အဆိုပါ ပြောကြားချက်ကို စက်တင်ဘာ ၅ ရက်က ရန်ကုန်မြို့တော်စည်ပင်သာယာရေးကော်မတီ၊ မြို့တော်ခန်းမတွင် ပြုလုပ်သော “ရန်ကုန်တိုင်းတစ်ခွင် ဆေးလိပ်ငွေ့ကင်းစင်နယ်မြေများ ထူထောင်ရေး အသိပေးအလုပ်ရုံ ဆွေးနွေးပွဲ” တွင် ပြောကြားခဲ့ခြင်း ဖြစ်သည်။

အထူးသဖြင့် မြန်မာနိုင်ငံကဲ့သို့ ၀င်ငွေနည်းပါးသော တိုင်းပြည်များဖြစ်သည့် ဖွံ့ဖြိုးစတိုင်းပြည်များတွင် ကြီးမားသောကျန်းမာရေးစိန်ခေါ်မှု တစ်ရပ်ဖြစ်ကြောင်းနှင့် မြန်မာနိုင်ငံ အနေဖြင့် အလေးပေး ဆောင်ရွက်ရသည့် နိုင်ငံတော်ဖွံ့ဖြိုးရေး လုပ်ငန်းများနှင့်အတူ ကြီးမားသော ကျန်းမာရေး အသုံးစရိတ် အချိုးအစားများစွာကိုလည်း သုံးစွဲနေကြရကြောင်း ၎င်းက ပြောကြားသည်။

“နိုင်ငံတော် ဖွံ့ဖြိုးတိုးတက်ရေးက ပြည်သူလူထုရဲ့ ကျန်းမာရေး ဖွံ့ဖြိုးတိုးတက်မှု၊ ကြံ့ခိုင်ကျန်းမာမှုတွေနဲ့ တိုက်ရိုက်အချိုးကျနေတာကို တွေ့ရတယ်။ ဒါကြောင့်လည်း နိုင်ငံတော်အစိုးရအနေနဲ့ ကျန်းမာရေးကဏ္ဍ ဖွံ့ဖြိုးတိုးတက်မှုအတွက် အရှိန်အဟုန်မြှင့် ဆောင်ရွက်နေတာဖြစ်တယ်။ ဒီလို နိုင်ငံတော် ဖွံ့ဖြိုးမှုတွေလုပ်နေတဲ့အချိန်မှာ ကာကွယ်လို့ရတဲ့ မကူးစက်နိုင်တဲ့ရောဂါတွေဟာ ဖွံ့ဖြိုးတိုးတက်မှုကို တုံ့နှေးလာစေတာကို တွေ့ရတယ်” ဟု ၎င်းကပြောကြားသည်။

မြန်မာနိုင်ငံတွင် ကူးစက်တတ်သည့် ရောဂါများထက် မကူးစက်တတ်သည့် ရောဂါများ ပို၍ဖြစ်ပွားလေ့ရှိနေပြီး မကူးစက်တတ်သည့် ရောဂါများကြောင့် နှစ်စဉ် လူဦးရေ တစ်သန်းကျော်ခန့် အသက်ဆုံးရှုံးနေရကြောင်း သိရသည်။

ကမ္ဘာ့ကျန်းမာရေးအဖွဲ့၏ ခန့်မှန်းချက်အရ ၂၀၁၂ ခုနှစ်တွင် ကင်ဆာဖြစ်ပွားမှုနှုန်း ၁၄ သန်း ရှိခဲ့ရာမှ ၂၀၃၀ ပြည့်နှစ်ထက်ဝက် မတိုင်ခင်တွင် ကင်ဆာဖြစ်ပွားမှုနှုန်း ၂၁ သန်းခန့်အထိ မြင့်တက်နိုင်ဖွယ်ရှိကြောင်း သိရသည်။

မြန်မာနိုင်ငံတွင် ကျန်းမာရေးနှင့်မညီညွတ်သော နေထိုင်စားသောက်မှုများကြောင့် လူလေးဦးလျှင်တစ်ဦးမှာ အချိန်မတိုင်မီစော၍ သေဆုံးနိုင်ပြီး အများစုမှာ ကင်ဆာရောဂါများကြောင့် ဖြစ်နေကြောင်း သိရသည်။

September 5, 2018














Copy Protected by Chetan's WP-Copyprotect.