၂၀၁၈-၂၀၁၉ ဘဏ္ဍာနှစ် ပြည်ထောင်စု၏ အခွန်အကောက် ဥပဒေကြမ်းတွင် လစာဝင်ငွေခွန် ပေးဆောင်ရမည့် ပမာဏအား ယခင်နှစ်အတိုင်း သတ်မှတ်ထားကြောင်း သိရသည်။
လစာမှ နှစ်တစ်နှစ်အတွင်း ဝင်ငွေကျပ် ၄၈ သိန်းအထက်ရရှိသူဖြစ်လျှင် သက်သာခွင့်များ ခုနှိမ်ပြီး ဝင်ငွေခွန် ထမ်းဆောင်ရမည်ဟု ၂၀၁၈-၂၀၁၉ ခုနှစ် ပြည်ထောင်စု၏ အခွန်အကောက် ဥပဒေကြမ်းတွင် ပါရှိသည်။
သြဂုတ် ၂၄ ရက်က ပြုလုပ်သည့် ပြည်ထောင်စုလွှတ်တော် အစည်းအဝေးတွင် အဆိုပါ ဥပဒေကြမ်းအား စီမံကိန်းနှင့် ဘဏ္ဍာရေး ဝန်ကြီးဌာန ဒုတိယဝန်ကြီး ဦးမောင်မောင်ဝင်းက တင်သွင်းခဲ့ခြင်းဖြစ်သည်။
ဥပဒေကြမ်း၏ အခန်း (၇) ဝင် ငွေခွန်အခန်းတွင် လစာမှနှစ်တစ်နှစ်အတွင်း ဝင်ငွေကျပ် ၄၈ သိန်း အထိ ရရှိသူဖြစ်လျှင် မည်သူ့ကိုမျှ ဝင်ငွေခွန်စည်းကြပ်ခြင်းမပြုရဟု ပါရှိပြီး ထိုသို့ စည်းကြပ်ခြင်းမပြု သဖြင့် ကင်းလွတ်ခွင့်ရသည့် လစာ ဝင်ငွေဆိုင်ရာ သက်သေခံအထောက် အထား တောင်းခံလာပါက သတ်မှတ်ချက်များနှင့်အညီ ပြည်တွင်းအခွန်များ ဦးစီးဌာနက ထုတ်ပေးရမည်ဖြစ်ကြောင်း၊ သို့ရာတွင် လစာမှ နှစ်တစ်နှစ်အတွင်း ဝင်ငွေကျပ် ၄၈ သိန်းအထက် ရရှိသူဖြစ်လျှင် ရရှိသည့် လစာဝင်ငွေ စုစုပေါင်း အပေါ်တွင် ဝင်ငွေခွန် ထမ်းဆောင်ရမည်ဟု ဥပဒေကြမ်းတွင် ပါရှိသည်။
ထို့အတူ လစာမှ နှစ်တစ်နှစ်အတွင်း ဝင်ငွေကျပ် ၄၈ သိန်းအထက် ရရှိသူဖြစ်လျှင် သို့မဟုတ် အသက်မွေးဝမ်းကျောင်းပညာ လုပ်ငန်း၊ စီးပွားရေး လုပ်ငန်းနှင့် အခြားရလမ်းများမှ ဝင်ငွေဖြစ်လျှင် မည်သူ့ကိုမဆို စုစုပေါင်းဝင်ငွေမှ ဝင်ငွေခွန်ဥပဒေပုဒ်မ ၆ အရ သက်သာခွင့်များ ခုနှိမ်ပြီးနောက် ကျန်ဝင်ငွေအပေါ် ဝင်ငွေအလွှာအလိုက် စည်းကြပ်ရမည့် ဝင်ငွေခွန် နှုန်းထားများအဖြစ် တစ်ကျပ်မှ သိန်း ၂၀ အထိ ၀ ရာခိုင်နှုန်း၊ ကျပ် ၂,၀၀၀,၀၀၁ မှ ၅,၀၀၀,၀၀၀ အထိ ငါးရာခိုင်နှုန်း၊ ကျပ် ၅,၀၀၀,၀၀၁ မှ ၁၀,၀၀၀,၀၀၀ အထိ ၁၀ ရာခိုင်နှုန်း၊ ၁၀,၀၀၀,၀၀၁ မှ ၂၀,၀၀၀,၀၀၀ အထိ ၁၅ ရာခိုင် နှုန်း၊၂၀,၀၀၀,၀၀၁ မှ ၃၀,၀၀၀,၀၀၀ အထိ ၂၀ ရာခိုင်နှုန်း၊ ၃၀,၀၀၀,၀၀၁ နှင့် အထက် ၂၅ ရာခိုင်နှုန်းအဖြစ် သတ်မှတ်သည်ဟု ဥပဒေကြမ်းတွင် ဖော်ပြထားသည်။
ထို့ပြင် ဝင်ငွေခွန်ဥပဒေတွင် မည်သို့ပင် ပြဋ္ဌာန်းစေကာမူ မည်သူမဆို မြေငှားရမ်းခြင်း၊ အဆောက်အအုံ ငှားရမ်းခြင်းနှင့် အခန်းငှားရမ်းခြင်းတို့မှ ရရှိသော စုစုပေါင်းငှား ရမ်းခရငွေအပေါ် ပုဒ်မ ၆ အရ သက်သာခွင့်များ နုတ်ပယ်ပြီး ကျန်ငွေအပေါ် ၁၀ ရာခိုင်နှုန်းဖြင့် ဝင်ငွေခွန် သီးခြားစည်းကြပ်ရမည်ဖြစ်ပြီး အခြားဝင်ငွေများနှင့် ပူးပေါင်း၍ ထပ်မံစည်းကြပ်ခြင်း မပြုရဟု ဥပဒေကြမ်းတွင် ပါရှိသည်။
နိုင်ငံတော်စီးပွားရေး အဖွဲ့အစည်းများ၊ မြန်မာနိုင်ငံ ရင်းနှီးမြှုပ်နှံမှု ကော်မရှင်က ထုတ်ပေးသည့် ခွင့်ပြုမိန့်ဖြင့် ဆောင်ရွက်သော လုပ်ငန်းများ၊ ကုမ္ပဏီများ၊ သမဝါယမ အသင်းများဖြစ်ပါက အခွန်ထမ်း အမျိုးအစားအလိုက် သီးခြားသတ် မှတ်ပေးထားသော ဝင်ငွေခွန်နှုန်းထားများအတိုင်း ထမ်းဆောင်ရမည်ဖြစ်ကြောင်း၊ အစုစပ်လုပ်ငန်း ဖြစ်ပါက ဝင်ငွေခွန် ဥပဒေပုဒ်မ ၆ အရ သက်သာခွင့် နုတ်ပယ်ပြီးနောက် ပုဒ်မ(ဂ) ဇယားပါဝင်ငွေခွန် နှုန်းထားများအတိုင်း ထမ်းဆောင်ရမည်ဖြစ်ကြောင်း၊ ဤပုဒ်မပါဝင် ငွေခွန်နှုန်းများသည် ဝင်ငွေရရှိသူ တစ်ဦးဦး သို့မဟုတ် ဝင်ငွေအမျိုး အစားတစ်ရပ်ရပ်နှင့် စပ်လျဉ်း၍ သီးခြားဝင်ငွေခွန်နှုန်း သတ်မှတ်ထားသည့် အခွန်ထမ်းများနှင့် သက်ဆိုင်ခြင်း မရှိစေရဟု ဥပဒေကြမ်းတွင် ဖော်ပြထားသည်။
ဝင်ငွေခွန်ဥပဒေအရ အခြေခံသက်သာခွင့် ခွင့်ပြုငွေသည် ဝင်ငွေ အမျိုးအစားတစ်ခုစီ၏ ရာခိုင်နှုန်း ၂၀ နှင့်ညီမျှသောငွေ ဖြစ်ရမည် ဖြစ် ကြောင်း၊ သို့ရာတွင် နှစ်တစ်နှစ်အ တွက် အခြေခံသက်သာခွင့် ခွင့်ပြု ငွေ စုစုပေါင်းသည် ကျပ်သိန်း ၁၀၀ ထက်မပိုစေရဟုလည်းကောင်း၊ ဝင် ငွေခွန်ဥပဒေပါ တစ်ဦးချင်းပုဂ္ဂိုလ် ၏ စုစုပေါင်းဝင်ငွေမှ နုတ်ပယ်၍ ကျန်ဝင်ငွေအပေါ်တွင် ဝင်ငွေခွန် စည်းကြပ်ရမည်ဟုလည်းကောင်း၊ အတူနေမိဘတစ်ဦးလျှင် ကျပ် ၁၀ သိန်းစီ၊ အိမ်ထောင်ဖက်တစ်ဦးအ တွက်သာလျှင် ကျပ် ၁၀ သိန်း၊ သား သမီးတစ်ဦးလျှင် ကျပ်ငါးသိန်းစီဖြစ် ကြောင်း ၂၀၁၈-၂၀၁၉ ခုနှစ် ပြည် ထောင်စု၏ အခွန်အကောက်ဥပ ဒေကြမ်းတွင် ဖော်ပြထားသည်။
ထို့ပြင် ဝင်ငွေခွန်ဥပဒေအရ သက်သာခွင့်များမနုတ်မီ စည်းကြပ် မှုမှလွတ်ကင်းနေသော ဝင်ငွေအ ပေါ် ရာခိုင်နှုန်း ၃၀ ဖြင့် ဝင်ငွေခွန် စည်းကြပ်ရမည်ဖြစ်ကြောင်း၊ သို့ရာ တွင် နိုင်ငံသားမည်သူမဆို အခြေ ပစ္စည်းတစ်ရပ်ရပ်ကို ဝယ်ယူခြင်း၊ တည်ဆောက်ခြင်း၊ ရယူခြင်းနှင့် လုပ်ငန်းအသစ် တည်ထောင်ခြင်း၊ လုပ်ငန်းထပ်မံ တိုးချဲ့ဆောင်ရွက် ခြင်းတို့အတွက် အသုံးပြုသည့်ဝင် ငွေမှ ဝင်ငွေရလမ်းတင်ပြနိုင်သည့် ဝင်ငွေရှိပါက ယင်းဝင်ငွေအား နုတ် ပယ်ပြီး ကျန်စည်းကြပ်မှုမှ လွတ်ကင်း နေသော ဝင်ငွေအပေါ်တွင်လည်း ကောင်း၊ ဝင်ငွေရလမ်းတင်ပြနိုင်ခြင်း မရှိပါက အသုံးပြုသည့်ဝင်ငွေအ ပေါ်တွင်လည်းကောင်း၊ ဝင်ငွေခွန် စည်းကြပ်ရမည်ဖြစ်ကြောင်း၊ အသုံး ပြုသည့် ဝင်ငွေအားလုံးအပေါ် ဝင် ငွေရလမ်းအတိအကျ တင်ပြနိုင်ပါ က ဝင်ငွေခွန်ထမ်းဆောင်ရန် မလိုကြောင်း ဥပဒေကြမ်းတွင် ဖော်ပြ ထားသည်။
ထို့ပြင် အခွန်စည်းကြပ်ခြင်း သည် တရားမဝင်ရရှိသည့် ပစ္စည်း များပိုင်ဆိုင်ခြင်း၊ ရောင်းဝယ်ခြင်း တို့နှင့်လည်းကောင်း၊ ငွေကြေးခဝါ ချမှုတိုက်ဖျက်ရေး ဥပဒေအရ အရေးယူသည့် ကိစ္စရပ်များနှင့် သက်ဆိုင်ခြင်း မရှိစေရဘဲ ဝင်ငွေကျပ် ၁-၃၀,၀၀၀,၀၀၀ အထိ ဝင်ငွေခွန် ၁၅ ရာခိုင်နှုန်း၊ ၃၀,၀၀၀,၀၀၁-၁၀၀,၀၀၀,၀၀၀ အထိ ရာခိုင်နှုန်း ၂၀၊ ၁၀၀,၀၀၀,၀၀၁ နှင့်အထက် အား ရာခိုင်နှုန်း ၃၀ ဖြင့် စည်းကြပ်ရမည်ဖြစ်ကြောင်း ဥပဒေကြမ်းတွင် ဖော်ပြထားသည်။
