Facebook သည် မြန်မာနိုင်ငံ၌ အမုန်းစကားများကို တိုက်ဖျက်ရာ၌ နှေးကွေးလွန်းနေကြောင်းနှင့် ပြဿနာဖြစ်စေသော အကြောင်းအရာများကို ဖော်ထုတ်ရန် နည်းပညာ၌ ရင်းနှီးမြှုပ်နှံခြင်းနှင့် မြန်မာစကားပြော ဝန်ထမ်းများကို ပို၍ငှားရမ်းခြင်းတို့အားဖြင့် ပြဿနာကို ကုစားရန် ဆောင်ရွက်နေကြောင်း Facebook ကုမ္ပဏီက သြဂုတ် ၁၆ ရက်တွင် ထုတ်ပြန်သော ကြေညာချက်တစ်ရပ်၌ ပြောကြားထားသည်။

ဘင်္ဂါလီမွတ်စလင်များနှင့် ပတ်သက်သည့် ခါးသီးသော ပို့စ်တစ်လှေကြီးအား ကိုင်တွယ်ရန် Facebook အနေဖြင့် အဘယ့်ကြောင့် ပျက်ကွက်ရသနည်းဟူသည့် အချက်ကို ဖော်ပြသော ရိုက်တာသတင်းဌာန၏ ဆန်းစစ်ချက်တစ်ရပ် ထွက်ပေါ်လာပြီးနောက် တစ်ရက်အကြာတွင် ယခုကဲ့သို့ Facebook က ဝန်ခံခဲ့ခြင်းဖြစ်သည်။

လွန်ခဲ့သည့်နှစ်အတွင်း အမေရိကန်က လူမျိုးစုလိုက် သုတ်သင်မှုဟု ခေါ်ဆိုသော မြန်မာတပ်မတော်၏ စစ်ဆင်ရေးတစ်ရပ်ပြီးနောက် ဘင်္ဂါလီမွတ်စလင် ၇၀၀,၀၀၀ ခန့် သည် နေအိမ်များကို စွန့်ခွာထွက်ပြေးသွားကြပြီး ယခုအခါ ဘင်္ဂလားဒေ့ရှ်နိုင်ငံရှိ ဒုက္ခသည်စခန်းများတွင် နေထိုင်လျက်ရှိသည်။

“မြန်မာနိုင်ငံက လူမျိုးရေးအကြမ်းဖက်မှုဟာ ကြောက်မက်ဖွယ်ကောင်းပြီး Facebook ပေါ်မှာ သတင်းမှားတွေနဲ့ အမုန်းစကား ဖြန့်ချိမှုတွေကို ကာကွယ်ဖို့ရာ ကျွန်တော်တို့ နှေးကွေးလွန်းခဲ့ပါတယ်” ဟု Facebook က ပြောကြားခဲ့သည်။

လူမှုမီဒီယာကုမ္ပဏီကြီးဖြစ်သော Facebook သည် မြန်မာနိုင်ငံတွင် အမုန်းစကား ဖြန့်ချိမှုကို တိုက်ဖျက်ရန် ယင်းမြစ်ထောက်ပံ့ထားမှု နှစ်အတန်အကြာထိအောင် နည်းပါးခဲ့ကြောင်းနှင့် မြန်မာနိုင်ငံသည် Facebook က လွှမ်းမိုးထားသော ဈေးကွက်ကြီးတစ်ခုနှင့် လူမျိုးစု အကြမ်းဖက်မှုများ ထပ်ကာထပ်ကာ ဖြစ်ပွားသည့်နိုင်ငံတစ်ခုဖြစ်ကြောင်း ရိုက်တာသတင်းဌာက ဖော်ပြခဲ့သည်။

ဥပမာအားဖြင့် ၂၀၁၅ ခုနှစ် အစောပိုင်းက Facebook တွင် ပြဿနာဖြစ်စေနိုင်သည့် ပိ့ုစ်များကို ထိန်းချုပ်စောင့်ကြည့်သည့် ဝန်ထမ်းသည် နှစ်ဦးသာ ရှိသည်ဟု ဆိုသည်။

သြဂုတ် ၁၆ ရက်က အွန်လိုင်းသို့တင်သည့် ထုတ်ပြန်ချက်တွင် Facebook က ၎င်းတို့သည် တည်ထောင်သူ မက်ဇက္ကာဘတ်က ဧပြီလအတွင်း အမေရိကန်အထက်လွှတ်တော်တွင် ကတိပြုခဲ့ပြီးနောက် အမုန်းစကားများကို အလိုအလျောက် စုံစမ်းတွေ့ရှိနိုင်သည့် လက်နက်ကိရိယာများကို အသုံးပြုကြောင်းနှင့် မြန်မာစကားပြော ဝန်ထမ်းများကို ပိုမိုငှားရမ်းထားကြောင်း ပြောကြားခဲ့သည်။

Facebook ကုမ္ပဏီက ၎င်းတု့ိသည် ဇွန်လအတွင်း မြန်မာဘာသာစကားကျွမ်းကျင်သူ ၆၀ ကျော် ခန့်ထားခဲ့ပြီး ယခုနှစ်ကုန်သို့အရောက်တွင် အနည်းဆုံး ၁၀၀ ပြည့်အောင် ခန့်ထားရန် စီစဉ်ထားကြောင်း ပြောကြားခဲ့သည်။

ဘင်္ဂါလီများနှင့် အခြားမွတ်စလင်များကို လူမှုမီဒီယာပလက်ဖောင်းပေါ်တွင် လွန်ခဲ့သည့် သီတင်းပတ်အတွင်း အပုပ်ချပြီး တိုက်ခိုက်သည့် ပို့စ်များ၊ ရုပ်ပုံများနှင့် ဗီဒီယိုများအား နမူနာအားဖြင့် ၁၀၀၀ ကျော် တွေ့ရှိရမှုကို ရိုက်တာက တင်ပြခဲ့သည်။

မွတ်စလင်ဆန့်ကျင်ရေး ညစ်ညမ်းပုံများ ပါဝင်သည့် အရာအချို့ကို Facebook ပေါ်တွင် ခြောက်နှစ်ခန့် ကြာသည်အထိ တွေ့ရှိနေရသေးသည်ဟု ရိုက်တာက ဆိုသည်။

ဘင်္ဂါလီ (မူရင်း၌ ရိုဟင်ဂျာဟုဖော်ပြ) နှင့် အခြားမွတ်စလင်များကို ခွေးများနှင့် မုဒိမ်းကောင်များဟု ခေါ်ဆိုကာ ၎င်းတို့အား မျိုးဖြုတ်ပစ်ရန် တောင်းဆိုသည့် ပို့စ်ပေါင်းများစွာ ရှိသည်ဟုလည်း ဆိုသည်။

Facebook သည် ယခုလက်ရှိ၌ မြန်မာနိုင်ငံတွင် ဝန်ထမ်းတစ်ဦးမျှ ရှိမနေကြောင်းနှင့် အမုန်းစကားများနှင့် အခြားပြဿနာဖြစ်စေသော ပို့စ်များကို ထိန်းချုပ်ကြီးကြပ်ရန် Honey Badger စီမံချက်ဟုခေါ်သော ကွာလာလမ်ပူရှိ လျှို့ဝှက်စီမံချက်တစ်ခုအပေါ်၌သာ အားကိုးနေကြောင်း ရိုက်တာ၏ ဆန်းစစ်ချက်က ဖော်ပြခဲ့သည်။

Facebook ၏ စနစ်များသည် မြန်မာစာလုံးများကို ဖွင့်ဆိုရန် ရုန်းကန်နေရသောကြောင့် မြန်မာနိုင်ငံမှ အသုံးပြုသူများက အမုန်းစကားဖြစ်ကြောင်း သတင်းပို့မှုအပေါ်၌သာ အကြီးအကျယ် မှီခိုနေရသည်ဟုဆိုသည်။

Facebook ပလက်ဖောင်းအား မြန်မာနိုင်ငံရှိ ဘင်္ဂါလီများနှင့် အခြားမွတ်စလင်များအပေါ် အမုန်းစကားများ ဖြန့်ချိရန်အတွက် အသုံးပြုနေပုံနှင့်ပတ်သက်၍ ၎င်းတို့သည် နှစ်အတန်ကြာကတည်းက Facebook အား သတိပေးခဲ့ကြောင်း သုတေသနပြုသူများနှင့် လူ့အခွင့်အရေး တက်ကြွလှုပ်ရှားသူူများက ပြောကြားခဲ့သည်။

သြဂုတ် ၁၆ ရက်က ထုတ်ပြန်သည့် ကြေညာချက်တွင် Facebook က ၎င်းတို့သည် အမုန်းစကား ဖြန့်ချိသည့် လူပုဂ္ဂိုလ်နှင့် အဖွဲ့အစည်းများစွာတို့ကို ပလက်ဖောင်းမှ ဖယ်ရှားခဲ့ပြီးဖြစ်ကြောင်း ပြောကြားခဲ့သည်။

Ref: Reuters