နေပူရှိန်ပြင်းနေသည့် မွန်းလွဲပိုင်းအချိန်တွင် တောင်ဥက္ကလာပမြို့နယ်၌ ဦးဇင်းတပါး ရုတ်တရက်လဲကျပြီး ပျံလွန်တော်မူပြီး အင်းစိန်မြို့နယ်တွင်လည်း လူတစ်ဦး ရုတ်တရက်လဲကျသေဆုံးကြောင်း သိရသည်။
ဖြစ်စဉ်မှာ ဧပြီ ၉ ရက် မွန်းလွဲ ၂ နာရီခန့်တွင် တောင်ဥက္ကလာပမြို့နယ် ပါရမီလမ်း ပင်းယမှတ်တိုင်အနောက် အမှတ် ၃ဝိုင်း ဝမ်းတော်ပြည့်ဘုန်းကြီးကျောင်းဘေး တွင် ဦးဇင်းတစ်ပါး နေပူထဲတွင် ရုတ်တရက်လဲကျပြီး ပျံလွန်တော်မူသွားကြောင်း ပတ်ဝန်းကျင်မှ လူများ အကြောင်းကြားသဖြင့် သွားရောက်ခဲ့ပြီး Dead Body အား မြောက်ဥက္ကလာဆေးရုံ သို့ ကူညီပို့ဆောင်ပေးခဲ့သည်ဟု အဆိုပါအသင်းမှ သိရသည်။
" သူ့မှာရောဂါအခံရှိမရှိတော့ မသိရသေးဘူး။ ဆေးရုံမှာတော့ ဆေးစာထွက်ရင်တော့ သိရမယ်။ ဒီတိုင်းလမ်းသွားရင်းနဲ့ လဲကျပြီး ပျံလွန်တော် မူသွားတာပါ" ဟု မေတ္တာသီတာရေစင် လူမှုကူညီရေးအသင်းမှ တာဝန်ရှိသူတစ်ဦးက ပြောကြားသည်။
ထို့ပြင် အင်းစိန်မြို့နယ် ဘုရင့်နောင်လမ်းမကြီး စိတ္တသုခလမ်းထိပ်တွင် အမျိုးသားတစ်ဦး လဲကျသေဆုံးနေကြောင်း ပတ်ဝန်းကျင်လူများက အကြောင်း ကြားသဖြင့် တွဲလက်လူမှုကူညီရေးအသင်းက သွားရောက်ကူညီခဲ့ကြောင်း သိရသည်။
ဧပြီ ၉ ရက် ညနေ ၄ နာရီ ၄၀ မိနစ်တွင် အသက် ၄၅နှစ် ဝန်းကျင်ခန့်ရှိ အမျိုးသားတစ်ဦးမှာ ပြင်ပဒဏ်ရာမရှိဘဲ အပူချိန်မြင့်တက်မှုကြောင့် ဦးနှောက်သွေးကြောပြတ် လဲကျ သေဆုံးခဲ့သည်ဟု ယူဆရကြောင်း၊ အဆိုပါအမျိုးသား၏ ရုပ်အလောင်းအား အင်းစိန်ပြည်သူ့ဆေးရုံ ရင်ခွဲရုံသို့ ပို့ဆောင်ခဲ့ကြောင်း တွဲလက် လူမှုကူညီရေးအသင်းထံမှ သိရသည်။
