ခြောက်နာရီ ကြာမြင့်သည့် ရန်ကုန်-တောင်ငူ ခရီးစဉ်အား သုံးနာရီဖြင့် ရောက်ရှိရန် ရထားလမ်းများ အဆင့်မြှင့်မည် ဖြစ်ကြောင်း မြန်မာ့မီးရထားမှ သိရသည်။
အဆိုပါ လမ်းပိုင်းတွင် ရထားပြေးဆွဲမိုင်နှုန်းမှာ ကီလိုမီတာ ၆၄ သာ ခုတ်မောင်းလျက်ရှိပြီး အဆင့်မြှင့်တင်ခြင်း ပြီးစီးပါက ကီလိုမီတာ ၁၀၀ အထိ ပြေးဆွဲနိုင်မည် ဖြစ်ကြောင်း မြန်မာ့မီးရထားစီမံကိန်းပရောဂျက် ဒါရိုက်တာ ဦးဘမြင့်က ပြောကြားသည်။
“အဆင့်မြှင့်တင်ခြင်း လုပ်ငန်းက မကြာခင်ကာလမှာ စတော့မယ်။ ဒီရထားလမ်းတွေ အဆင့်မြှင့်ပြီးရင်တော့ ခရီးသွား ပြည်သူတွေအတွက် အဆင်ပြေမယ်။ ပိုပြီးကောင်းလာမှာပေါ့”ဟု ၎င်းက ပြောကြားသည်။
အဆင့်မြှင့်တင်ခြင်းလုပ်ငန်း ဆောင်ရွက်ရာတွင် အချက်ပြစနစ်များ လဲလှယ်ခြင်း၊ သံလမ်း၊ ကွန်ကရစ်များ ပြုပြင်ခြင်း စသည်တို့ ဆောင်ရွက်သွားမည် ဖြစ်ကြောင်း၊ အဆင့်မြှင့်တင်ခြင်း စီမံကိန်းကို ဆောင်ရွက်ရာတွင် ရန်ကုန်-တောင်ငူ လမ်းပိုင်း၊ ရန်ကုန်-ပဲခူး လမ်းပိုင်းတို့ကို ကနဦး ဆောင်ရွက်သွားမည် ဖြစ်ကြောင်း သိရသည်။
အဆိုပါ စီမံကိန်းမှာ ရန်ကုန်-မန္တလး ရထားလမ်းပိုင်း အဆင့်မြှင့်တင်ခြင်းတွင် ပါဝင်ခြင်းဖြစ်ပြီး လမ်းပိုင်းတစ်ခုလုံး အဆင့်မြှင့်တင်ခြင်း စီမံကိန်းအတွက် ဂျပန်အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ (JICA) မှ ချေးငွေ အမေရိကန်ဒေါ်လာ ၂၇၁ ဒသမ ၆၄ ဘီလျံ သုံးမည်ဖြစ်ကြောင်း သိရသည်။
ရန်ကုန်-တောင်ငူ ရထားလမ်းပိုင်းမှာ ဂျပန်ချေးငွေ ယန်းဘီလျံ ၇၀ (အမေရိကန် ဒေါ်လာ သန်း ၆၃၀) ကျော် ကုန်ကျမည်ဖြစ်ပြီး လက်ရှိတွင် ချေးငွေဖြစ် ဂျပန်ယန်းဘီလျံ ၄၀ ကျော် ရရှိထားကြောင်း သိရသည်။
ရန်ကုန်-မန္တလေး ရထားလမ်းပိုင်း၏ အရှည်မှာ ၃၈၅ ဒသမ ၅ မိုင်ရှိပြီး ၎င်းခရီးစဉ်မှာ ၁၄ နာရီ ကြာမြင့်ကာ လမ်းပိုင်းအဆင့်မြှင့်တင်မှု ပြီးစီးပါက ရှစ်နာရီဖြင့် သွားရောက်နိုင်မည် ဖြစ်ကြောင်း သိရသည်။
