ဘင်္ဂလားဒေ့ရှ်နိုင်ငံမှ မောင်တောမြို့နယ်အတွင်း ထွက်ပြေး ရောက်ရှိနေသည့် ရခိုင်မျိုးနွယ်စုဝင် မြိုတိုင်းရင်းသားများအား ဘင်္ဂလားဒေ့ရှ်နိုင်ငံ ကောင်စစ်ဝန်နှင့်အဖွဲ့က လာရောက်တွေ့ဆုံပြီး ကောင်စစ်ဝန်ရေးရာ လုပ်ငန်းများ ဆောင်ရွက်ခဲ့ကြောင်း သိရသည်။
အဆိုပါ ရခိုင် မျိုးနွယ်စုဝင်များသည် ၂၀၁၇ ခုနှစ် သြဂုတ် ၂၅ ရက် ဖြစ်စဉ်နောက်ပိုင်း ဘင်္ဂလားဒေ့ရှ်နိုင်ငံမှ မောင်တောမြို့နယ်သို့ ဝင်ရောက် နေထိုင်သူများဖြစ်ကြပြီး ၂၀၁၈ ခုနှစ် သြဂုတ် ၂ ရက် မွန်းလွဲပိုင်းမှစ၍ မောင်တောမြို့ သီရိမင်္ဂလာခန်းမတွင် ဘင်္ဂလားဒေ့ရှ် သမ္မတနိုင်ငံ၊ စစ်တွေအခြေစိုက် ကောင်စစ်ဝန်နှင့်အဖွဲ့က လာရောက် တွေ့ဆုံကာ ကောင်စစ်ဝန်ရေးရာ လုပ်ငန်းများ ဆောင်ရွက်ခဲ့ခြင်း ဖြစ်ကြောင်း သိရသည်။
သြဂုတ် ၂ ရက်က မြိုတိုင်းရင်းသား ၁၆၆ ဦးအား ကောင်စစ်ဝန်အဖွဲ့က တွေ့ဆုံမေးမြန်းခဲ့ပြီး သြဂုတ် ၃ ရက်တွင်လည်း ဘင်္ဂလားဒေ့ရှ်နိုင်ငံမှ မောင်တောမြို့နယ်အတွင်းသို့ ပြန်လည်ရောက်ရှိ နေထိုင်ကြသည့် ကျန်ရှိ ဘင်္ဂလားဒေ့ရှ်နိုင်ငံသား ခံယူထားသော ရခိုင်မျိုးနွယ်စုဝင်များနှင့် ဆက်လက် တွေ့ဆုံမည်ဖြစ်ကြောင်း သိရသည်။
ဘင်္ဂလားဒေ့နိုင်ငံမှ မောင်တောမြို့နယ်သို့ ဝင်ရောက် နေထိုင်ကြသူများမှာ ဘင်္ဂလားဒေ့ရှ်နိုင်ငံသား ခံယူထားသော ရခိုင်မျိုးနွယ်စုဝင် တိုင်းရင်းသားများဖြစ်ပြီး လက်ရှိတွင် မောင်တောမြို့နယ် မြောက်ပိုင်း သစ်တုန်းနားခွဆုံ၊ နန်းရာကိုင်း၊ မင်္ဂလာညွန့်၊ မြဝတီကျေးရွာများတွင် လာရောက် နေထိုင်နေကြခြင်း ဖြစ်ကြောင်း သိရသည်။
နိုင်ငံနယ်နိမိတ် စာချုပ်ပါ သတ်မှတ်ချက်များ ချိုးဖောက်ရာ ရောက်သည့် သဲအိတ်၊ အိုဗာဟက်ပစ်ကျင်းနှင့် ဘန်ကာများ ဘင်္ဂလားဒေ့ရှ်ဘက်ခြမ်း၌ ပြုလုပ်ထားသည့် ကိစ္စနှင့် ပတ်သက်၍ ပြည်ထောင်စုဝန်ကြီး ဦးကျော်တင်က မေ ၈ ရက်တွင် မြန်မာနိုင်ငံဆိုင်ရာ ဘင်္ဂလားဒေ့ရှ်နိုင်ငံ သံအမတ်ကြီး Mr. Manjurul Karim Khan Chowdhury အား ခေါ်ယူတွေ့ဆုံပြီး ကန့်ကွက်စဉ်က လွန်ခဲ့သော လများအတွင်း ဘင်္ဂလားဒေ့ရှ်နိုင်ငံဘက်မှ မြန်မာနိုင်ငံသို့ ဝင်ရောက်လာကြသည့် ဘင်္ဂလားဒေ့ရှ်နိုင်ငံသားဟု ယူဆရသော ရခိုင်၊ မြို၊ ခမီ၊ ဒိုင်းနက်လူမျိုး ၃၆၈ ဦးတို့နှင့် ပတ်သက်၍ အသိပေးပြောကြားခဲ့ပြီး ၎င်းတို့အား လိုအပ်သော နိုင်ငံသားစိစစ်မှုများ ဆောလျင်စွာ ပြုလုပ်ရေးနှင့် ၎င်းတို့ဆန္ဒအလျောက် ဘင်္ဂလားဒေ့ရှ်နိုင်ငံရှိ နေရပ်သို့ ပို့ဆောင်ရေးအတွက် ဆောင်ရွက်ရန် ပြောကြားခဲ့ကြောင်း သတင်းထုတ်ပြန်ချက်အရ သိရသည်။
၂၀၁၈ ခုနှစ် ဖေဖော်ဖော်ဝါရီ လကုန်ပိုင်းမှစ၍ ဘင်္ဂလားဒေ့ရှ်နိုင်ငံမှ ထွက်ပြေးလာသူများ မြန်မာနိုင်ငံ မောင်တောမြို့နယ်သို့ ဝင်ရောက်လာကြခြင်းဖြစ်ပြီး မတ် ၂၃ ရက်အထိ ရခိုင်နှင့် မြို၊ ဒိုင်းနက်လူမျိုး ၃၄၀ ကျော် ရောက်ရှိနေပြီဖြစ်ပြီး ၎င်းတို့သည် မောင်တောမြို့နယ် မြောက်ပိုင်းရှိ ကျေးရွာ ငါးရွာတွင် နေထိုင်လျက်ရှိကြောင်း သိရသည်။
၂၀၁၈ နှစ်ဆန်းပိုင်း ဖေဖော်ဝါရီ ၂၁ ရက်မှစ၍ လက်ရှိ အချိန်အထိ မောင်တောမြို့နယ် မြောက်ပိုင်း အောင်သပြေကျေးရွာ စာသင်ကျောင်းတွင် ဘင်္ဂလားဒေ့ရှ်နိုင်ငံ၊ ဘန်ဒရာဘန်ခရိုင်၊ တန်းဆိပ်မြို့နယ်၊ မော်တုတ်ကြီးကျေးရွာမှ ရခိုင်အိမ်ထောင်စု ၂၄ စု၊ စုစုပေါင်း လူဦးရေ ၈၁ ဦး၊ သစ်တုံးနားခွဆုံ ကျေးရွာသစ်တွင် ဘင်္ဂလားဒေ့ရှ်နိုင်ငံ၊ ဘန်ဒရာ ဘန်ခရိုင်၊ တန်းဆိပ်မြို့နယ်၊ လမားကျေးရွာမှ မြိုမိသားစု ၃၀ စု၊ လူဦးရေ ၁၅၅ ဦးနှင့် ဒိုင်းနက် မိသားစု ၄ စု လူဦးရေ ၂၇ ဦး စုစုပေါင်း လူဦးရေ ၁၈၂ ဦး နှင့် သုပဏ္ဏက ကျေးရွာတွင် ဘင်္ဂလားဒေ့ရှ်နိုင်ငံ၊ အလယ်ခေါ်တော်ခရိုင်၊ ဘော်ဘီတီကျေးရွာမှ မြိုမိသားစု ၁၁ စု လူဦးရေ ၆၃ ဦး၊ တောင်ပြိုနယ်စပ် နံ့သာတောင် ကျေးရွာတွင် ရခိုင်လူမျိုး ခြောက်ဦးနှင့် မီးတိုက်ကျေးရွာတွင် ဘင်္ဂလားဒေ့ရှ်နိုင်ငံ ဘန်ဒရာဘန်ခရိုင် အလီခေါ်တောင်မြို့နယ် ရွမ်ဘို (ဒိုင်းနက်) ရွာမှ ဒိုင်းနက်လူမျိုး ၁၃ ဦး ရောက်ရှိနေခြင်းဖြစ်ပြီး စုစုပေါင်း ၃၄၅ ဦး ရောက်ရှိနေခြင်း ဖြစ်ကြောင်း သတင်းထုတ်ပြန်ချက်အရ သိရသည်။
