အစိုးရနှင့် ပူးပေါင်းဆောင်ထားခြင်း မရှိသော ပြည်တွင်းပြည်ပ စီးပွားရေး လုပ်ငန်းရှင်များ၏ အခမ်းအနားများသို့ ပြည်ထောင်စုအဆင့်နှင့် တိုင်းဒေသကြီး၊ ပြည်နယ်အစိုးရ အဖွဲ့ဝင်များ မတက်ရောက်ရန် နိုင်ငံတော်သမ္မတရုံးမှ ဇွန်လအတွင်းက ညွှန်ကြားစာ ပေးပို့ခဲ့ကြောင်း သိရသည်။
“ညွှန်ကြားစာ ထုတ်ထားတယ်ဆိုတာ ဟုတ်ပါတယ်။ အဓိက,ကတော့ တချို့က မဆိုင်တဲ့ လုပ်ငန်းရှင်တွေ ဖိတ်တဲ့ဟာတွေကို သွားသွားပြီး တက်နေလို့။ အဓိကကိုတော့ မပြောတော့ဘူးဗျာ။ ဘာဖွင့်ပွဲ ညာဖွင့်ပွဲ ဆိုတာတွေကို သွားသွားတက်နေလို့” ဟု နိုင်ငံတော်သမ္မတရုံး ညွှန်ကြားရေးမှူးချုပ် ဦးဇော်ဌေးက ပြောကြားသည်။
ညွှန်ကြားစာတွင် ပြည်ထောင်စုအဆင့် အစိုးရအဖွဲ့အစည်း အားလုံး၊ ပြည်ထောင်စု ဝန်ကြီးဌာန အားလုံး၊ နေပြည်တော်ကောင်စီ နှင့် တိုင်းဒေသကြီး၊ ပြည်နယ်အစိုးရအဖွဲ့ အားလုံးအား လိပ်မူပြီး နိုင်ငံတော်အစိုးရရုံး (သို့မဟုတ်) တိုင်းဒေသကြီး၊ ပြည်နယ်အစိုးရနှင့် ပူးပေါင်း လုပ်ကိုင် ဆောင်ရွက်ထားခြင်း မရှိသော ပြည်တွင်းပြည်ပ ပုဂ္ဂလိက စီးပွားရေးလုပ်ငန်းရှင်များ၏ အစီအစဉ်ဖြင့် ကျင်းပပြုလုပ်သည့် အခမ်းအနားများသို့ တက်ရောက်ရန် ဖိတ်ကြားမှုများကို လက်ခံ တက်ရောက်ခြင်း မပြုရန် လမ်းညွှန်မှုအရ အကြောင်းကြားအပ်ကြောင်း ဖော်ပြထားသည်။
ယခုကဲ့သို့ ညွှန်ကြားစာနှင့် ပတ်သက်ပြီး Yangon Watch မှ ဒေါ်ညိုညိုသင်းက “အစိုးရအဖွဲ့ဝင် တချို့ပေါ့။ တိုင်းဒေသကြီးနဲ့ ပြည်နယ် အစိုးရအဖွဲ့ဝင်တွေ ကြားထဲမှာ ကြားတာပေါ့နော်။ အခမ်းအနားတွေ တက်တာနဲ့ပဲ အချိန်ကုန်နေတယ်ဆိုပြီး ဝေဖန်သံတွေ ကြားနေရတယ်။ အစိုးရအဖွဲ့ဝင်တွေက ကိုယ့်ရဲ့အလုပ်မှာ ဇောက်ချလုပ်တာ မဟုတ်ဘဲနဲ့ အခမ်းအနား တက်တာတွေ၊ ဖဲကြိုးဖြတ်တာတွေက ပြည်သူလူထုရဲ့ ဝေဖန်သံတွေ မြင့်တက်လာလို့ သမ္မတရုံးက ညွှန်ကြားစာ ထုတ်တယ်လို့ မြင်တယ်။ အဲဒီတော့ ပြည်သူ့အသံ နားထောင်တဲ့ သဘောပေါ့။ စီးပွားရေး လုပ်ငန်းရှင်တွေက လုပ်တဲ့ပွဲတွေမှာ အစိုးရအဖွဲ့ဝင်တွေ သွားခြင်းအားဖြင့် အဂတိလိုက်စားမှုတွေ ဖြစ်လာနိုင်တယ်လို့ သမ္မတရုံးက စိုးရိမ်တာလည်း ဖြစ်ရင်ဖြစ်မှာပေါ့။ ဒီညွှန်ကြားချက်ကို ကြိုဆိုရမှာပဲ။ စီးပွားရေး လုပ်ငန်းရှင် ဆိုတဲ့ သဘောက အာဏာရှိသူကို ပေါင်းပြီး သူ့ရဲ့အမြတ်ရရှိရေးကို ကြိုးစားတဲ့အတွက်ကြောင့် ဒီလိုညွှန်ကြားချက် ထုတ်လိုက်ခြင်းအားဖြင့် အစိုးရအဖွဲ့ဝင်နဲ့ စီးပွားရေး လုပ်ငန်းရှင်တွေ နီးစပ်ပတ်သက်မှုကို ထိန်းချုပ်ထားနိုင်တဲ့ သဘောပေါ့။ ဘာကြောင့်လဲဆိုတော့ ကြားနေရတာက အစိုးရအဖွဲ့ဝင် အချို့ရဲ့အိမ်ကို စီးပွားရေး လုပ်ငန်းရှင်အချို့က တံခါးမရှိ ဓားမရှိ သွားနေ၊ ဝင်ထွက်နေတယ် ဆိုတာ ကြားနေရတယ်။ ဒီညွှန်ကြားချက် ထွက်လာတော့ နည်းနည်းလေး ထိန်းမိသွားမယ် ထင်တယ်” ဟု ပြောကြားသည်။
ယခုအစိုးရ လက်ထက်တွင် ပြည်နယ် နှင့် တိုင်းဒေသကြီး အစိုးရအဖွဲ့ဝင်အချို့သည် ယခင် ဦးသိန်းစိန်အစိုးရ လက်ထက်ကကဲ့သို့ စီးပွားရေး လုပ်ငန်းရှင်များ၏ ဖိတ်ကြားသည့် ပွဲများသို့ တက်ရောက်ပြီး ဖဲကြိုးဖြတ်ခြင်းများ ပြုနေမှုများ ရှိသဖြင့် ပြည်သူများအကြား ဝေဖန်မှုများလည်း မြင့်တက်နေကြောင်း သိရသည်။
