ရှမ်းပြည်နယ်တောင်ပိုင်း ဆီဆိုင်၊ ညောင်ရွှေ၊ ဟိုပုံးနှင့် ပင်လောင်းမြို့နယ်တို့တွင် လက်နက်ကိုင်ပဋိပက္ခများကြောင့် သုံးလကျော်အတွင်း အရပ်သား ၆၆ ဦး သေဆုံးကာ ၇၉ ဦး ဒဏ်ရာရရှိခဲ့ကြောင်း ပအိုဝ်းလူငယ်အစည်းအရုံး (PYO) က ဧပြီ ၂၀ ရက်တွင် သတင်းထုတ်ပြန်သည်။
ပြီးခဲ့သည့် ဇန်နဝါရီ ၂၁ ရက်မှ ဧပြီ ၂၀ ရက်အထိ ရှမ်းပြည်နယ်တောင်ပိုင်း ဆီဆိုင်မြို့နယ်၊ ညောင်ရွှေမြို့နယ် ဟိုပုံးမြို့နယ်နှင့် ပင်လောင်းမြို့နယ်တို့တွင် တိုက်ပွဲများဖြစ်ပွားသည့်အခြေအနေများကို စစ်တမ်းကောက်ယူပြီး ပအိုဝ်းလူငယ်အစည်းအရုံး (PYO) က ထုတ်ပြန်ရာတွင် အထက်ပါအချက်ကို ထည့်သွင်းဖော်ပြထားသည်။
ရှမ်းပြည်နယ် တောင်ပိုင်း ဆီဆိုင်မြို့နယ်တွင် စစ်ဘေးရှောင်ဦးရေ ၅၃၀၀၀၊ ညောင်ရွှေမြို့နယ်တွင် စစ်ဘေးရှောင်ဦးရေ ၂၁၅၀၊ ဟိုပုံးမြို့နယ်တွင် စစ်ဘေးရှောင်ဦးရေ ၁၀၀၀ နှင့် ပင်လောင်းမြို့နယ်တွင် စစ်ဘေးရှောင်ဦးရေ ၁၅၀၀၀ ရှိကြောင်း ပအိုဝ်းလူငယ်အစည်းအရုံး (PYO) ၏ ထုတ်ပြန်ချက်တွင် ဖော်ပြထားသည်။
စစ်ဘေးရှောင်ဦးရေ ၇၁၁၅၀ ကျော်ရှိသည့်အနက် လူဦးရေ ၂၃၀၀၀ ကျော်မှာ ၂၀၂၂-၂၀၂၃ ခုနှစ်ကတည်းက ကယားပြည်နယ်မှ ရှမ်းပြည်နယ်တောင်ပိုင်းသို့ စစ်ရှောင်လာသူများဖြစ်ကြောင်း ပအိုဝ်းလူငယ်အစည်းအရုံး (PYO) က ဆိုသည်။
ရှမ်းပြည်တောင်ပိုင်းတွင် တပ်မတော်၊ ပအိုဝ်းပြည်သူ့စစ် (PNA) ပူးပေါင်းတပ်နှင့် ပအိုဝ်း အမျိုးသားလွတ်မြောက်ရေးတပ်မတော် (PNLA) မဟာမိတ်တပ်တို့အကြား လက်နက်ကိုင်ပဋိပက္ခများကြောင့် အရပ်သား ၆၆ ဦး သေဆုံးပြီး ၇၉ ဦး ဒဏ်ရာရရှိခဲ့ကြောင်း PYO က ထုတ်ပြန်သည်။
အရပ်သားများ ထိခိုက်သေဆုံးဒဏ်ရာရသည့် အကြောင်းရင်းများထဲတွင် လေကြောင်းတိုက်ခိုက်မှု၊ လက်နက်ကြီးပစ်ခတ်မှုနှင့် ဒရုန်းနှင့် ဗုံးကြဲမှုများပါဝင်ကြောင်း ပအိုဝ်းလူငယ်အစည်းအရုံး (PYO) က ဆိုသည်။
ရှမ်းပြည်နယ်တောင်ပိုင်း လက်နက်ကိုင်ပဋိပက္ခအတွင်း လေကြောင်းတိုက်ခိုက်မှု ၄၆၂ ကြိမ်၊ လက်နက်ကြီးပစ်ခတ်မှု ၂၉၂၉ ကြိမ်၊ အဆောက်အအုံထိခိုက်ပျက်စီးမှု ၆၀၆ လုံးရှိကြောင်း PYO ၏ ထုတ်ပြန်ချက်တွင် ဖော်ပြထားသည်။
အဆောက်အအုံထိခိုက်ပျက်စီးမှု၏ ၉၀ ရာခိုင်နှုန်းသည် လေကြောင်းတိုက်ခိုက်မှု၊ လက်နက်ကြီးပစ်ခတ်မှုနှင့် ဒရုန်းနှင့် ဗုံးကြဲမှုများကြောင်းဖြစ်ကြောင်း ပအိုဝ်းလူငယ်အစည်းအရုံး (PYO) က ပြောကြားသည်။
ပအိုဝ်းလူငယ်အစည်းအရုံး (PYO) အနေဖြင့် လက်လှမ်းမှီရရှိသည့် မြေပြင်သတင်းအချက်အလက်များနှင့် အွန်လိုင်းသတင်းအချက်အလက်များအပေါ်တွင် အခြေခံ၍ ထုတ်ပြန်ခြင်းဖြစ်ပြီး မြေပြင်တွင် ယင်းကိန်းဂဏန်းများထက် ပိုမိုများပြားနိုင်ကြောင်း ပအိုဝ်းလူငယ်အစည်းအရုံး (PYO) က ဆိုသည်။
