လမ်းပန်းဆက်သွယ်မှုခက်ခဲသည့် နာဂကိုယ်ပိုင်အုပ်ချုပ်ခွင့်ရဒေသတစ်နေရာကို တွေ့ရစဉ်
စစ်ကိုင်းတိုင်းဒေသကြီး နာဂကိုယ်ပိုင်အုပ်ချုပ်ခွင့်ရဒေသတွင် နိုင်ငံတော်က ဘတ်ချက်ခွဲဝေပေးမှုနည်းပါးသောကြောင့် ထင်သလောက်ဒေသဖွံ့ဖြိုးရေး လုပ်ငန်းများအား အကောင်အထည် မဖော်ပေးနိုင်သေးကြောင်း နာဂကိုယ်ပိုင်အုပ်ချုပ်ခွင့်ရဒေသ တိုင်းလွှတ်တော်ကိုယ်စားလှယ်များက ပြောကြားသည်။
နာဂကိုယ်ပိုင်အုပ်ချုပ်ခွင့်ရဒေသတွင် နာဂရိုးရာပွဲတော်သာဝန်ကြီးများ လာရောက်ကြကြောင်း အခြားအချိန်များတွင် ဝန်ကြီးများ မလာကြကြောင်း နာဂကိုယ်ပိုင်အုပ်ချုပ်ခွင့် ရဒေသဦးစီးအဖွဲ့သည်လည်း နယ်မြေကွင်း ဆင်းတာမရှိကြောင်း လွှတ်တော်ကိုယ်စားလှယ်များသာ နယ်မြေအားကွင်းဆင်းတာရှိကြောင်း လဟယ်မြို့နယ် မဲဆန္ဒနယ်မြေ အမှတ် (၂) တိုင်းဒေသကြီးလွှတ်တော်ကိုယ်စားလှယ် ဦးကယ်က ဆိုသည်။
“ကျွန်တော်တို့ဒေသမှာ ဖွံ့ဖြိုးရေးတွေ လုပ်တယ်။ လမ်းတံတားတွေလုပ်တယ်ဆိုတဲ့ဟာက ဘတ်ဂျက်က အဓိကရှိပါတယ်။ ကျွန်တော်တို့ စစ်ကိုင်းတိုင်းမှာ မြို့နယ်ပေါင်း ၃၇ မြို့နယ် ရှိပါတယ်။ အဲဒီထဲကမှ အရွယ်အစား ချင်းလည်း မတူပါဘူး။ ဖွံ့ဖြိုးမှုတိုးတက်မှု အဆင့်အတန်းချင်းလည်း မတူပါဘူး။ အဲဒီတော့ ဖွံ့ဖြိုးမှုနည်းနေတဲ့နေရာမှာ ဘတ်ချက်က ပိုပြီးတော့ထည့်ရမှာ။ အဲဒီလိုကြမှ စီမံကိန်းရဲ့ မူဝါဒအကောင်အထည်ဖော်နိုင်မှာ။ အခုတော့ အဲဒီလိုမဟုတ်ဘဲနဲ့ ကျွန်တော်တို့ဒေသကို ဘတ်ဂျက်ပိုပြီးတော့ ပေးရမယ့်နေရာမှာ ပိုပြီးတော့ လျော့ပြီးပေးနေတယ်လို့မြင်တယ်။ ဌာန ၁၀ ခုရဲ့ဘတ်ဂျက်တွေကို ကျွန်တော်ကြည့်လိုက်တဲ့အခါမှာ ဘီလျံပေါင်း ၉၀ လောက်ရှိတယ်။ ကျွန်တော်တို့ဒေသမှာကျတော့ တစ်ဘီလျံတောင် မရှိတဲ့အနေအထားမှာ ရှိတယ်။ ဒေသခံတွေရဲ့ တောင်းဆိုချက်အရ ဘတ်ဂျက် ထည့်သွင်းရေးဆွဲရန်အတွက် အစီရင်ခံစာ တင်ပြခဲ့တယ်။ ဘတ်ချက်ထဲမှာထည့်ထားတဲ့ ဘတ်ဂျက်တွေလည်း ဖြတ်ချလိုက်တယ်။ ဆိုတော့ လုပ်ငန်းတွေကို ထက်သရာမလုပ်ပေးနိုင်ဘူး။ ဒေသဖွံ့ဖြိုးရေးအတွက် အကောင်အထည် မဖော်ပေးနိုင်သေးဘူး” ဟု ဦးကယ်က ဆက်လက်ပြောကြားသည်။
ထို့ပြင် နာဂကိုယ်ပိုင်အုပ်ချုပ်ခွင့်ရဒေသတွင် ပညာရေးနှင့်ပတ်သက်၍ ဝန်ထမ်းဖွဲ့စည်းပုံအား အပြည့်အဝချပေးနိုင်ခြင်း မရှိသေးကြောင်း၊ ယင်းဒေသတွင် ၂၀၁၇-၂၀၁၈ ပညာရေးနှစ်က ပညာရေးသည် ကျဆင်းသွားကြောင်း၊ နာဂဒေသအတွင်းနေထိုင်ကြသည့် ကလေးငယ်များသည်လည်း ပညာမသင်ကြားရဘဲ ကျောင်းပိတ်ခဲ့ရသည့် ရက်အများအပြားရှိခဲ့ကြောင်း နန်းယွန်းမြို့နယ်မဲဆန္ဒနယ်မြေအမှတ် (၁) တိုင်းဒေသကြီး လွှတ်တော်ကိုယ်စားလှယ် ဦးစိမ်းမောင်က ပြောကြားသည်။
“နိုင်ငံတော်က ဘတ်ချခွဲဝေးမှုမှာလည်း နာဂကိုယ်ပိုင်အုပ်ချုပ်ခွင့်ရဒေသအတွက် မမျှတဘူး။ အရေးကြီးတဲ့လုပ်ငန်းတွေကို ကျွန်တော်တို့ နာဂကိုယ်ပိုင်အုပ်ချုပ်ခွင့်ရဒေသက လွှတ်တော်ကိုယ်စားလှယ်အနေနဲ့က မလုပ်ပေးနိုင်သေးဘူး။ ကျန်းမာရေးမှာလည်းဘဲ ကျွန်တော်တို့ ကြိုးစားဆောင်ရွက်တယ်။ ဆေးဝါးတွေလိုရင်လည်း ကျွန်တော်တို့ကိုယ်တိုင် တိုင်းကျန်းမာရေးဌာနကို သွားပြီးတောင်းတယ်။ ဒါပေမဲ့ ကျွန်တော်တို့ နာဂကိုယ်ပိုင်အုပ်ချုပ်ခွင့်ရဒေသရဲ့ ကျန်းမာရေး ကတိုးတက်မှုကို ပြန်ပြီးသုံးသပ်ကြည့်တဲ့အခါမှာ အတော်လေးအားနည်းနေသေးတယ်။ ကျန်းမာရေးဝန်ထမ်းတွေကလည်း သူတို့တာ ဝန်ကျတဲ့နေရာကို မသွားကြဘူး” ဟု ၎င်းက ဆက်လက်ပြောကြားသည်။
နာဂကိုယ်ပိုင်အုပ်ချုပ်ခွင့်ရဒေသတွင် ပညာရေး၊ ကျန်းမာရေးနှင့် လမ်းပန်းဆက်သွယ်ရေးများလည်း ဖွံ့ဖြိုးတိုးတက်မှု အဆမတန် နည်းနေသေးကြောင်း၊ ထိုဒေသတွင် မြို့နယ်ပေါင်းသုံးမြို့နယ်ရှိကြောင်း ယင်းမြို့ နယ်သုံးမြို့နယ်သည် လဟယ်မြို့နယ် လေရှီး မြို့နယ်နှင့် နန်းယွန်းမြို့နယ်တို့ဖြစ်ကြောင်း ၎င်းမြို့နယ်သုံးမြို့နယ်တွင် စုစုပေါင်း လူဦးရေ ၁၂၉၀၀၄ ဦးအထိ နေထိုင်ကြကြောင်း သိရသည်။
