ဝန်ထမ်းအိမ်ရာနှင့် အငှားအိမ်ရာများ တည်ဆောက်ရာတွင် အငြိမ်းစားဝန်ထမ်းများနှင့် နိုင်ငံ့ဝန်ထမ်းများ အသက်သာဆုံး ဈေးနှုန်းဖြင့် ဝယ်ယူ၊ ငှားရမ်းနေထိုင်နိုင်ရေးအတွက် ဆောက်လုပ်ရေးသုံးပစ္စည်းများနှင့် အခြားကိစ္စရပ်များအပေါ် အခွန်သက်သာ အောင် ဆောင်ရွက်ပေးရမည်ဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းက ပြောကြားခဲ့ကြောင်း သိရသည်။
နိုင်ငံ့ဝန်ထမ်းများ အငြိမ်းစားယူပြီးသည့်အခါ ကိုယ်ပိုင်နေအိမ်၊ ကိုယ်ပိုင်တိုက်ခန်းများဖြင့် သိက္ခာရှိရှိနေသွားနိုင်ရေးနှင့် တာဝန်ထမ်းဆောင်ဆဲ ဝန်ထမ်းများနေထိုင်ရေးကိစ္စ အဆင်ပြေစေရန် စီစဉ်ဆောင်ရွက်လျက်ရှိသော နိုင်ငံ့ဝန်ထမ်းအိမ်ရာ တည်ဆောက် ရေးဦးစီးကော်မတီနှင့် နိုင်ငံ့ဝန်ထမ်းအငှား အိမ်ရာတည်ဆောက်ရေးဦးစီးကော်မတီတို့ ၏ လုပ်ငန်းညှိနှိုင်းအစည်းအဝေး (၃/၂၀၁၈) အား မေ၂၃ ရက်က စီမံကိန်းနှင့် ဘဏ္ဍာရေး ဝန်ကြီးဌာန ပြည်ထောင်စုဝန်ကြီးရုံး၌ ကျင်းပခဲ့ကြောင်း သိရသည်။
အဆိုပါအစည်းဝေးတွင် ပြည်ထောင်စုဝန်ကြီး ဦးကျော်ဝင်းက နိုင်ငံ့ဝန်ထမ်းအိမ်ရာ တည်ဆောက်ရေးနှင့် နိုင်ငံ့ဝန်ထမ်းအငှား အိမ်ရာ တည်ဆောက်နိုင်ရေးအတွက်မြေ နေရာရရှိရေးအား ဝန်ကြီးဌာနပိုင်မြေနှင့် တိုင်းဒေသကြီးနှင့် ပြည်နယ်အစိုးရပိုင်မြေများမှ ဆောင်ရွက်ရန်ဖြစ်ကြောင်း၊ သတ်မှတ် စံချိန်စံညွှန်းများနှင့်အညီ ဖြစ်စေရေး ကြပ်မတ် ဆောင်ရွက်သွားရန်ဖြစ်ကြောင်း၊ အိမ်ရာများ တည်ဆောက်ရာတွင် အငြိမ်းစားဝန်ထမ်းများ နှင့် နိုင်ငံ့ဝန်ထမ်းများ အသက်သာဆုံးဈေး နှုန်းဖြင့် ဝယ်ယူ၊ ငှားရမ်းနေထိုင်နိုင်ရေးအတွက် ဆောက်လုပ်ရေးသုံးပစ္စည်းများနှင့် အခြားကိစ္စရပ်များအပေါ် အခွန်သက်သာအောင် ဆောင်ရွက်ပေးရမည်ဟု ပြောကြားခဲ့သည်။
ပြည်နယ်နှင့် တိုင်းဒေသကြီးများတွင် နှစ်စဉ် ဝန်ထမ်း ၁၅၀၀၀ ခန့် ပင်စင်ယူလေ့ရှိပြီး အဆိုပါအငြိမ်းစားယူမည့် ဝန်ထမ်းများအတွက် ဝန်ထမ်းအိမ်ရာများကို ပြည်နယ်နှင့် တိုင်းဒေသကြီးများ၌ တစ်ပြိုင်နက် စတင် တည်ဆောက်မည်ဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းက ပြောကြားသည်။
“တိုင်းနဲ့ ပြည်နယ်အားလုံးမှာ နှစ်စဉ် နှစ်စဉ် ဝန်ထမ်း ၁၅၀၀၀ လောက် ပင်စင်ယူကြတယ်။ အဲဒီတော့ ပင်စင်ယူသွားမယ့် ၁၅၀၀၀ လောက်ကို ပင်စင်ယူသွားချိန်မှာ သူတို့အတွက် သင့်လျော်တဲ့၊ လျော်ကန်တဲ့ အိမ်ခန်းတွေ ဆောက်လုပ်ရဖို့လိုပါတယ်။ ဒါကြောင့်မို့ တိုင်းနဲ့ပြည်နယ်အားလုံးမှာ မြေလည်း ရှာထားပြီးပြီ။ သက်ဆိုင်ရာအစိုးရအဖွဲ့တွေနဲ့လည်း ညှိနှိုင်းပြီးပါပြီ” ဟု ပြည်ထောင်စုဝန်ကြီး ဦးကျော်ဝင်းက ပြောကြားသည်။
မြန်မာနိုင်ငံတွင် လက်ရှိအချိန်၌ နိုင်ငံ့တာဝန်ထမ်းဆောင်နေသည့်ဝန်ထမ်းများ အငြိမ်းစားယူသည့်အချိန်တွင် အဆိုပါဝန်ထမ်းများအတွက် တစ်အိုးတစ်အိမ်ရရှိနိုင်ရေးအတွက် အစိုးရအနေဖြင့် စီမံကိန်းများ ချထားပြီးဖြစ်ကြောင်း၊ အဆိုပါစီမံကိန်းတွင် မြန်မာနိုင်ငံ ဆောက်လုပ်ရေးလုပ်ငန်းရှင် များအသင်း၊ မြန်မာနိုင်ငံဘဏ်များအသင်း၊ မြန်မာနိုင်ငံ ရင်းနှီးမြှုပ်နှံမှုကော်မရှင်၊ စီမံကိန်းနှင့်ဘဏ္ဍာရေးဝန်ကြီးဌာနအပြင် သက်ဆိုင်ရာပြည်နယ်နှင့် တိုင်းဒေသကြီး အစိုးရအဖွဲ့များမှ ပူးပေါင်းဆောင်ရွက်မည်ဖြစ် ကြောင်း သိရသည်။
နိုင်ငံ့ဝန်ထမ်းအိမ်ရာ၊ အငှားအိမ်ရာများ ဆောက်လုပ်ရန် မြေနေရာအတွက် ဝန်ထမ်းများကို စစ်တမ်းကောက်ယူသည့်အခါ ပင်စင်ယူပြီး ရန်ကုန်မြို့တွင် အခြေချနေထိုင်လိုသူက အများဆုံးဖြစ်ကြောင်း ဆောက်လုပ်ရေးဝန်ကြီးဌာနမှ သိရသည်။