တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) အရ ငြိမ်းချမ်းရေးလုပ်ငန်းစဉ် အကောင်အထည်ဖော်ရာတွင် အခက်အခဲများ ကြုံတွေ့နေသည့်အပေါ် တွေ့ဆုံဆွေးနွေးကြရန်အတွက် တိုင်းရင်းသားလက်နက်ကိုင် အဖွဲ့အစည်း အသီးသီးမှ ထိပ်သီးခေါင်းဆောင်များ ပါဝင်သော ညီလာခံတစ်ရပ် ခေါ်ယူပြုလုပ်သွားမည်ဖြစ်ကြောင်း ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO) နာယက ဗိုလ်မှူးကြီး ခွန်ဥက္ကာက ပြောကြားသည်။
NCA လက်မှတ်ရေးထိုးထားသော တိုင်းရင်းသားလက်နက်ကိုင် အဖွဲ့များမှ ထိပ်ပိုင်းခေါင်းဆောင်များဖြင့် ဖွဲ့စည်းထားသည့် ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) ၏ အစည်းအဝေးကို ထိုင်းနိုင်ငံ ချင်းမိုင်မြို့တွင် မေ ၉ ရက်မှ ၁၁ ရက်အထိ သုံးရက်ကြာပြုလုပ်ခဲ့ပြီး အဆိုပါ အစည်းအဝေးတွင် ထိုသို့ ဆွေးနွေးခဲ့ခြင်းဖြစ်သည်ဟု ဗိုလ်မှူးကြီး ခွန်ဥက္ကာက မေ ၁၂ ရက်တွင် The Daily Eleven သတင်းစာသို့ ပြောကြားသည်။
မေလနောက်ဆုံးပတ်တွင် ပြုလုပ်ရန်လျာထားသည့် ပြည်ထောင်စုငြိမ်းချမ်းရေးညီလာခံ ၂၁-ရာစု ပင်လုံတတိယအစည်းအဝေး အပြီးတွင် တိုင်းရင်းသားလက်နက်ကိုင် အဖွဲ့အစည်း အသီးသီး၏ ထိပ်သီးခေါင်းဆောင်များ ပါဝင်သည့် ညီလာခံကို ထိုင်းနိုင်ငံ ချင်းမိုင်မြို့၌ပင် ပြုလုပ်ဖွယ်ရှိကြောင်း ဗိုလ်မှူးကြီး ခွန်ဥက္ကာက ပြောကြားသည်။
“ပြည်ထောင်စုငြိမ်းချမ်းရေး ညီလာခံအပြီး ဇွန်လ ဒါမှမဟုတ် ဇူလိုင်လလောက်မှာ ဒီညီလာခံကို လုပ်ဖို့ရှိတယ်။ မြန်မြန်လုပ်နိုင်လေ မြန်မြန်ကောင်းလေပဲ။ မြန်မြန်အကျိုးရှိတာပေါ့ဗျာ” ဟု ၎င်းက ပြောကြားသည်။
ထို့ပြင် အစိုးရနှင့် နိုင်ငံရေး၊ လုံခြုံရေးကိစ္စရပ်များ တွေ့ဆုံဆွေးနွေးရန်အတွက် အလွတ်သဘော တွေ့ဆုံဆွေးနွေးရေးကော်မတီအဖွဲ့ ထိပ်ပိုင်းခေါင်းဆောင် အပြောင်းအလဲကိုလည်း ယခုပြုလုပ်ခဲ့သည့် PPST အစည်းအဝေးတွင် ပြုလုပ်ခဲ့ပြီး အသစ်ဖွဲ့စည်းခဲ့သည့် အလွတ်သဘော တွေ့ဆုံဆွေးနွေးရေးကော်မတီ၏ အဖွဲ့ခေါင်းဆောင်အဖြစ် ကရင်အမျိုးသားအစည်းအရုံး (KNU) အထွေထွေအတွင်းရေးမှူး ပဒိုစောတာဒိုမူးကို တာဝန်ပေးအပ်ခဲ့ကြောင်း သိရသည်။
ပြည်ထောင်စုငြိမ်းချမ်းရေး ညီလာခံ ၂၁- ရာစုပင်လုံတတိယ အစည်းအဝေးတွင် ရလဒ်ကောင်းများ ရရှိရန်အတွက် အစိုးရ၊ တပ်မတော်နှင့် အလွတ်သဘော တွေ့ဆုံဆွေးနွေးရေးကော်မတီတို့ အလွတ်သဘော တွေ့ဆုံဆွေးနွေးသွားကြမည်ဖြစ်ပြီး လာမည့် မေ ၁၄ ရက်နှင့် ၁၅ ရက်တွင် အလွတ်သဘော တွေ့ဆုံဆွေးနွေးရန် အစိုးရဘက်က NCA လက်မှတ်ရေးထိုးထားသော တိုင်းရင်းသားလက်နက်ကိုင်အဖွဲ့များကို ကမ်းလှမ်းထားကြောင်း ဗိုလ်မှူးကြီး ခွန်ဥက္ကာက ဆိုသည်။
