ဧရာဝတီတိုင်းဒေသကြီးတွင် H1N1 ဖြင့် လူနာတစ်ဦး ထပ်မံသေဆုံးပြီး သြဂုတ် ၁၆ ရက်အထိ တစ်နိုင်ငံလုံး၌ သေဆုံးသူ စုစုပေါင်း ၂၆ ဦး ရှိလာ

ရန်ကုန်မြို့တွင်း နှာခေါင်းစည်းတပ်ကာ သွားလာနေသူအချို့ကို တွေ့ရစဉ် (ဓာတ်ပုံ-ကြည်နိုင်)

ဧရာဝတီတိုင်းဒေသကြီးတွင် H1N1 ဖြင့် လူနာတစ်ဦး ထပ်မံသေဆုံးပြီး သြဂုတ် ၁၆ ရက်အထိ တစ်နိုင်ငံလုံး၌ သေဆုံးသူ စုစုပေါင်း ၂၆ ဦး ရှိလာကြောင်းနှင့် ဧရာဝတီတိုင်းဒေသကြီးမှာ လက်ရှိသေဆုံးနှုန်း အများဆုံးဖြစ်နေကြောင်း သိရသည်။

သြဂုတ် ၁၆ ရက်အထိ ရရှိသည့် အချက်အလက်အရ အထူးကုဆေးရုံကြီး (ဝေဘာဂီ) အပါအ၀င် တစ်နိုင်ငံလုံးရှိ တိုင်းဒေသကြီး/ပြည်နယ် ပြည်သူ့ဆေးရုံကြီးများတွင် H1N1 ပိုးတွေ့ အတွင်းလူနာ ၅၈ ဦး ဆေးဝါးကုသမှု ခံယူနေဆဲဖြစ်ကြောင်း ကျန်းမာရေးနှင့် အားကစားဝန်ကြီးဌာနမှ သိရသည်။

သြဂုတ် ၁၅ မှ သြဂုတ် ၁၆ ရက်အထိ သံသယလူနာ ၃၉ ဦးအား ဓာတ်ခွဲစမ်းသပ် စစ်ဆေးခဲ့ရာတွင် H1N1 ပိုးတွေ့လူနာ ၂၀ တွေ့ရှိခဲ့ပြီး ထပ်မံ သေဆုံးသူ လူနာတစ်ဦး ရှိကြောင်းနှင့် ဇူလိုင် ၂၁ ရက်မှ သြဂုတ် ၁၆ ရက်အထိ လတ်တလော ပြင်းထန်အသက်ရှူ လမ်းကြောင်းရောဂါဖြင့် ဆေးရုံတက်ရောက် ကုသသူ စုစုပေါင်း လူနာ ၆၈၇ ဦးအနက် H1N1 ပိုးတွေ့လူနာ စုစုပေါင်း ၂၆၂ ဦး ရှိခဲ့ပြီး သေဆုံးသူ စုစုပေါင်း ၂၆ ဦး တွေ့ရှိရကြောင်း သြဂုတ် ၁၆ ရက်က H1N1 ဖြစ်ပွားမှုနှင့် ပတ်သက်၍ သတင်းထုတ်ပြန်ချက် အမှတ်စဉ် (၂၄) တွင် ဖော်ပြချက်အရ သိရသည်။

H1N1 ရောဂါပိုး စစ်ဆေးတွေ့ရှိခဲ့သော်လည်း ရာသီတုပ်ကွေးရောဂါ၏ နောက်ဆက်တွဲ ဆိုးကျိုးများကြောင့် သေဆုံးရခြင်း မဟုတ်ဘဲ အခြားရောဂါဖြင့် သေဆုံးသူ သြဂုတ် ၁၅ ရက်အထိ စုစုပေါင်း ၁၉ ဦးရှိကြောင်း သိရသည်။

သြဂုတ် ၁၆ ရက်အထိ အထူးကုဆေးရုံကြီး (ဝေဘာဂီ) တွင် H1N1 ပိုးတွေ့ အတွင်းလူနာ ခြောက်ဦးနှင့် အခြားတိုင်းဒေသကြီး/ပြည်နယ်ဆေးရုံကြီးများတွင် H1N1 ပိုးတွေ့ အတွင်းလူနာ ၅၂ ဦး၊ စုစုပေါင်း ၅၈ ဦး ဆက်လက် ဆေးကုသမှုခံယူလျက် ရှိကြောင်းနှင့် သြဂုတ် ၁၆ ရက် H1N1 ပိုးတွေ့လူနာများအနက် တစ်အိမ်တည်းအတူနေ မိသားစုဝင် သုံးဦး၊ အဆောက်အအုံ တစ်ခုအတွင်း လူစုလူဝေးနှင့် နေထိုင်သူများမှ သုံးဦးတို့တွင် H1N1 ပိုး စမ်းသပ်တွေ့ရှိသဖြင့် အတူနေထိုင်သူများအကြားတွင် ရောဂါပိုး ကူးစက်နိုင်သည်ကို တွေ့ရှိရကြောင်း ကျန်းမာရေးနှင့် အားကစားဝန်ကြီးဌာနမှ သိရသည်။

သြဂုတ် ၁၆ ရက်အထိ တိုင်းဒေသကြီးနှင့် ပြည်နယ်အလိုက် H1N1 ဓာတ်ခွဲအတည်ပြု ဖြစ်ပွားသူများမှာ ကရင်တွင် ရှစ်ဦး၊ ချင်းတွင် ၁၃ ဦး၊ မွန်တွင် ခြောက်ဦး၊ ရခိုင်တွင် သုံးဦး၊ ရှမ်း (တောင်) တွင် ၁၀ ဦး၊ ရှမ်း (မြောက်) တွင် နှစ်ဦး၊ ရှမ်း (အရှေ့) တွင် သုံးဦး၊ စစ်ကိုင်း တွင် ၁၀ ဦး၊ တနင်္သာရီတွင် ၁၄ ဦး၊ မကွေးတွင် ၁၀ ဦး၊ မန္တလေးတွင် ၁၄ ဦး၊ ပဲခူးတွင် ၃၇ ဦး၊ ရန်ကုန်တွင် ၈၁ ဦး၊ ဧရာဝတီတွင် ၃၅ ဦး၊ နေပြည်တော်တွင် ၁၆ ဦး စုစုပေါင်း ၂၆၂ ဦး ဖြစ်ပွားခဲ့ပြီး ကချင်နှင့် ကယားပြည်နယ်တွင် ရောဂါဖြစ်ပွားသူ လူနာမရှိကြောင်းနှင့် ဓာတ်ခွဲအတည်ပြု သေဆုံးလူနာများမှာ ကရင်တွင် တစ်ဦး၊ မွန်တွင် တစ်ဦး၊ စစ်ကိုင်းတွင် တစ်ဦး၊ မကွေးတွင် နှစ်ဦး၊ မန္တလေးတွင် တစ်ဦး၊ ပဲခူးတွင် သုံးဦး၊ ရန်ကုန်တွင် ခုနစ်ဦး၊ ဧရာဝတီတွင် ၁၀ ဦး စုစုပေါင်း ၂၆ ဦး ရှိကြောင်း H1N1 ဖြစ်ပွားမှုနှင့် ပတ်သက်၍ သတင်းထုတ်ပြန်ချက် အမှတ်စဉ် (၂၄) တွင် ဖော်ပြချက်အရ သိရသည်။

သြဂုတ် ၁၆ ရက်အထိ ရန်ကုန်တိုင်းဒေသကြီးအတွင်းမှ လတ်တလော ပြင်းထန် အသက်ရှူလမ်းကြောင်းပိုးဝင် ရောဂါဖြင့် ဆေးရုံတက်ရောက် ကုသသူစုစုပေါင်း လူနာ ၃၁၀ ဦး၊ ဓာတ်ခွဲအတည်ပြု ဖြစ်ပွားသူဦးရေ ၇၉ ဦးနှင့် ဓာတ်ခွဲအတည်ပြု သေဆုံးသူဦးရေ ခုနစ်ဦး ရှိကြောင်းနှင့် သြဂုတ် ၁၆ ရက် နံနက်က ရရှိသည့် အချက်အလက်အရ အထူးကုဆေးရုံကြီး (ဝေဘာဂီ) တွင် ဆေးရုံတက်ရောက် ကုသနေသောလူနာ ငါးဦးရှိပြီး သြဂုတ် ၁၅ ရက်၌ ဆေးရုံဆင်းလူနာ တစ်ဦးရှိကြောင်း သိရသည်။