ယခုနှစ် နေပြည်တော်သြင်္ကန်တွင် ရခိုင်ရိုးရာသြင်္ကန် ထည့်သွင်းကျင်းပမည်ဖြစ်ပြီး ယခင်နှစ်က ဖွင့်လှစ်ရေကစားခြင်းမရှိခဲ့သော ဟိုတယ်ဇုန်မဏ္ဍပ်အချို့ ပြန်လည်ဖွင့်လှစ် ရေကစားမည်ဖြစ်ကြောင်း သိရသည်။
“ဒီနှစ်သြင်္ကန်ကတော့ ပုံမှန်အားဖြင့်တော့ နေပြည်တော် မြို့တော်ဝန်မဏ္ဍပ်ကတော့ နှစ်စဉ်ကျင်းပနေကျ မြန်မာ့ရိုးရာသြင်္ကန်မဏ္ဍပ်အဖြစ် နေပြည်တော်မြို့တော်ခန်းမရှေ့မှာ ဖျော်ဖြေပွဲနဲ့အတူ ရေပက်ကစားခြင်း လုပ်သွားမှာပေါ့နော်။ ထူးခြားတာကတော့ နေပြည်တော်မှာရှိတဲ့ ရခိုင်တိုင်းရင်းသား အသိုင်းအဝိုင်းကနေပြီးတော့မှ ရခိုင်ရိုးရာသြင်္ကန်ကို နေပြည်တော်သြင်္ကန်နဲ့အတူ ဖျော်ဖြေရေပက် ကစားသွားမှာပေါ့။ အဲဒါကတော့ ဒီနှစ်ထူးခြားချက်ပါ” ဟု နေပြည်တော် စည်ပင်သာယာရေးကော်မတီဝင် ဦးမင်းသူက ပြောကြားသည်။
နေပြည်တော် မြို့တော်ဝန်မဏ္ဍပ်ကို နှစ်စဉ်ကျင်းပသကဲ့သို့ မြန်မာ့ရိုးရာမဟာသြင်္ကန် ရေကစားမဏ္ဍပ်အဖြစ် ကျင်းပမည်ဖြစ်ပြီး ရိုးရာသြင်္ကန်အကအလှများဖြင့် ကပြဖျော်ဖြေခြင်း၊ ရေကစားခြင်းတို့ပြုလုပ်မည်ဖြစ်ကြောင်း၊ ရခိုင်ရိုးရာသြင်္ကန်ကိုလည်း နေပြည်တော် မြို့တော်ဝန်မဏ္ဍပ်တွင် ပူးတွဲကျင်းပမည်ဖြစ်ကြောင်း သိရသည်။
“ရခိုင်တိုင်းရင်းသားတွေကလည်း အစိုးရအဖွဲ့ထဲမှာရော၊ နေပြည်တော်ကောင်စီထဲမှာရော၊ ဝန်ထမ်းအကြီးအကဲတွေထဲမှာလည်း တော်တော်များတယ်။ မြန်မာ့ရိုးရာသြင်္ကန်ကလည်း တစ်ချိန်တည်းဖြစ်နေတဲ့အတွက် ရိုးရာအတိုင်း ရေပက်ကစားဖို့ အတူတူဆောင်ရွက်မယ်ဆိုပြီးတော့ တင်ပြလာတဲ့အတွက် ဝိုင်းလုပ်ပေးကြမှာပေါ့” ဟု ဦးမင်းသူက ဆက်လက်ပြောကြားသည်။
ယခင်နှစ်သြင်္ကန်က နေပြည်တော်၌ မြို့တော်ဝန်ရေကစားမဏ္ဍပ်နှင့် ဝန်ကြီးဌာန မဏ္ဍပ်အချို့သာဖွင့်လှစ်ခဲ့ပြီး ဖျော်ဖြေရေးများဖြင့် စည်ကားသော ဟိုတယ်ဇုန်မဏ္ဍပ်များမှာ ဖွင့်လှစ်ရေကစားခြင်း မပြုလုပ်ခဲ့ကြောင်း၊ ယခုနှစ်တွင် Skynet ရွှေသံလွင်မဏ္ဍပ်က ဖျော်ဖြေရေးများ ပြုလုပ်သွားမည်ဖြစ်ကြောင်း၊ အခြားဟိုတယ်ဇုန်မဏ္ဍပ်များလည်း ဖွင့်လှစ်ရေကစားကြမည်ဟု သတင်းရရှိထားကြောင်း နေပြည်တော် စည်ပင်သာယာရေးကော်မတီဝင် ဦးမင်းသူက ပြောကြားသည်။
“နောက်တစ်ခါ မနှစ်ကမဏ္ဍပ် တည်ဆောက်ဖျော်ဖြေခြင်းမရှိတဲ့ ကုမ္ပဏီမဏ္ဍပ်တွေ၊ ရွှေသံလွင် Skynet လိုမဏ္ဍပ်တွေက ဒီနှစ်ပြန်ပြီး မဏ္ဍပ်တည်ဆောက်ပြီး ဖျော်ဖြေမှုနှင့်အတူ စတုဒိသာကျွေးမွေးခြင်းတွေ ဆောင်ရွက်သွားမယ်ဆိုတာ ဆောက်လုပ်ခွင့်ဆိုင်ရာ၊ မဏ္ဍပ်တည်ဆောက်ခွင့် လျှောက်လွှာတင်လာတာ တွေ့ရတဲ့အတွက် အဲဒီလိုကုမ္ပဏီတွေလာမယ်ဆိုတာ သတင်းရပါတယ်” ဟု နေပြည်တော် စည်ပင်သာယာရေးကော်မတီအဖွဲ့ဝင် ဦးမင်းသူက ပြောကြားသည်။
လက်ရှိတွင် Skynet မဏ္ဍပ်တစ်ခုသာ မဏ္ဍပ်တည်ဆောက်ခွင့် တင်ပြထားကြောင်း၊ အခြားဟိုတယ်များမှ မဏ္ဍပ်တည်ဆောက်ခွင့်တင်ပြလာပါက ခွင့်ပြုပေးမည်ဖြစ်ကြောင်း သိရသည်။
နေပြည်တော်သြင်္ကန်တွင် နှစ်စဉ် နာမည်ကြီးအဆိုတော်များ၊ အနုပညာရှင်များ ဖျော်ဖြေသည့် ဟိုတယ်ဇုန်မဏ္ဍပ်အဖြစ် ငါးခုမှ ၁၀ ခုအကြား နှစ်စဉ်ဖွင့်လှစ်ရေကစားကြပြီး အထူးစည်ကားခဲ့ကြောင်း၊ ပြီးခဲ့သည့် ၂၀၁၇ ခုနှစ် သြင်္ကန်ကာလတွင်မူ ဟိုတယ်ဇုန် ရေကစားမဏ္ဍပ်များ ဖွင့်လှစ်ရေကစားခြင်း မပြုလုပ်ခဲ့ကြောင်း သိရသည်။
