ပြည်သူများထံမှ ကောက်ခံရရှိသည့် အခွန်ငွေများဖြင့် ပြုပြင်နေသည့် ရန်ကုန်မြို့ရှိ ရေမြောင်းတစ်ခုကို တွေ့ရစဉ်
၂၀၁၈ ခုနှစ် ပြည်ထောင်စု၏ အခွန်အကောက်ဥပဒေကြမ်းပါ ပုဒ်မ ၂၅ ကို ပြဌာန်းရန် အချက်နှစ်ချက် ဖော်ဆောင်ရန် လိုအပ်နေပြီး အဆိုပါ အချက်နှစ်ချက်မှာ နိုင်ငံခြား ဘဏ်အကောင့်များ ကိုင်ဆောင်ထားသူများနှင့် ပြည်တွင်းပြည်ပတွင် ငွေအပ်နှံထားသူများကို ခေါ်ယူတွေ့ဆုံ၍ တရားဝင်ငွေ ဖြစ် မဖြစ် အငြင်းပွားနေသည့် ငွေများကို ရာခိုင်နှုန်းတစ်ခု သတ်မှတ်ထည့်ဝင်စေပြီးမှ အဆိုပါဥပဒေကို ပြဋ္ဌာန်းသင့်ကြောင်းနှင့် ထိုသို့လုပ်ဆောင်မှုမရှိဘဲ ပြဋ္ဌာန်းလိုက်ပါက ခုတ်ရာတခြား ရှရာတလွဲ အခြေအနေ ဖြစ်သွားစေနိုင်ကြောင်း DVB Debate ၏ ‘အခွန်မူဝါဒသစ်က ငွေမည်းသမားတွေအတွက် ထွက်ပေါက်လား’ ဆွေးနွေးပွဲတွင် ပါဝင်ဆွေးနွေးသူ ဥပဒေပညာရှင် ဦးတင်သန်းဦးက ဆွေးနွေးပြောကြားသည်။
မြန်မာနိုင်ငံသည် ဘီလျံနှင့်ချီ ချမ်းသာနေသူများ ရှိနေသည့်အကြားမှ ကမ္ဘာ့အဆင်းရဲဆုံး နိုင်ငံများတွင် ပါဝင်နေသည် ဆိုသည်မှာ သတိပြုစရာ ဖြစ်နေပြီး လက်ရှိ ပုဒ်မ ၂၅ မှာ အဆိုပါ ငွေကိုင်ဆောင်ထားသူများ အတွက် ထွက်ပေါက်ဖြစ်နေကြောင်း ဝေဖန်မှုများ ရှိနေသည်။ ထို့ပြင် ပြည်ပနိုင်ငံများတွင် စစ်အာဏာရှင် ဟောင်းများနှင့် ချိတ်ဆက်နေသည် ဆိုသည့် နိုင်ငံခြားငွေ ၁၁ ဘီလျံပြဿနာ၊ Panama Papers စာရင်းဝင်ပုဂ္ဂိုလ်နှင့် ကုမ္ပဏီ ၃၃ ခု၏ အခွန်တိမ်းရှောင်မှုများ စသည့်ငွေများ ပြည်ပတွင် ဒေါ်လာဘီလျံများစွာ ရှိနေသည်ဟု ဝေဖန်ခံနေရသည်။
လက်ရှိအခြေအနေတွင် တိုင်းပြည်စီးပွားရေး လည်ပတ်မှု ရပ်ဆိုင်းနေခြင်းများမှာ အစိုးရ၊ ဈေးကွက်အခြေအနေနှင့် စီးပွားရေး လုပ်ငန်းများကြောင့် ဖြစ်မဖြစ် ပြန်လည်သုံးသပ်သင့်ကြောင်းနှင့် ပေါ့စေလို၍ ကြောင်ရုပ်ထိုးရာမှ ဆေးအတွက် မလေးစေလိုဟု ဦးတင်သန်းဦးက ပြောကြားသည်။
“ဒီဥပဒေကို ပြဋ္ဌာန်းမယ်ဆိုရင် အချက်နှစ်ချက် လုပ်ကိုလုပ်ရမယ်။ အဲဒီနှစ်ချက်က ဆွေးနွေးပြီး လုပ်မလား။ ဥပဒေအရ လုပ်မလား။ အဲဒါမှ ဒီဥပဒေကို ဖော်ဆောင်နိုင်မယ်။ ရှေ့မှာရှိနေတဲ့ တရားဝင်ငွေလိုလို၊ တရားမဝင်ငွေလိုလို ဘယ်ကရလာမှန်းမသိတဲ့ ပုဂ္ဂိုလ်ကြီးတွေကို အရင်ဆုံး ဆွေးနွေးရမယ်။ ရှေ့မှာလည်း ပြောခဲ့တယ်။ မင်းတို့မှာရှိနေတဲ့ ငွေ ၂၅ ရာခိုင်နှုန်း CutOut လုပ်ပြီးဝင်လာပါ ပြောခဲ့တယ်။ မလာဘူး။ ကျွန်တော်တို့အစိုးရ လက်ထက်မှာ ပိုပြီးတော့မလာဘူး။ ဘယ်လောက်အထိ မလာဘူးလဲဆိုရင် ပိတ်ဆို့မှု ဖွင့်ပေးလိုက်တာကိုတောင် မလာဘူး။ ကျွန်တော်တို့အစိုးရကို နှောင့်ယှက်နေတယ်။ အဲဒါအသေအချာပဲ။ သို့သော် ဒီဥပဒေသည် ကျွန်တော်တို့အစိုးရကို နှောင့်ယှက်နေတဲ့သူကို အသက်ဆက်ပေးတဲ့ ဥပဒေတော့ မဖြစ်စေချင်ဘူး။ ဆွေးနွေးရမယ်ဆိုတာ အဲဒီငွေတွေ ကိုင်ထားတဲ့ နိုင်ငံခြားအကောင့်တွေ၊ ပြည်တွင်းပြည်ပမှာ။ ပြည်တွင်း ပြည်ပမှာ ထားတယ်ဆိုတဲ့ အကောင့်ပိုင်ရှင်တွေခေါ်ပြီး ညှိနှိုင်းရမယ်။ ငါတို့တိုင်းပြည်အတွက် ဘယ်လိုလုပ်ပေးမလဲ။ ဘယ်လောက် ဖြေလျှော့ပေးရင်ရမလဲ။ စောစောက တစ်ယောက်က ပြောသွားသလို ၂၀ ရာခိုင်နှုန်း ဖြေလျှော့ပေးရင်၊ ၂၅ ရာခိုင်နှုန်း ဖြေလျှော့ပေးရင် ထည့်မလား။ ထည့်လိုက်ပြီးရင် ဒုတိယဥပဒေ ပြဋ္ဌာန်းလိုက်ရင် ဘာပြဿနာမှ မရှိဘူး။ No Problem။ အဲဒါဆို ရည်ရွယ်ချက်နဲ့အညီ အောင်မြင်မယ်။ အဲဒါ မကိုင်တွယ်ဘဲနဲ့ ဒီဥပဒေပြဋ္ဌာန်းရင်တော့ ခုတ်ရာတခြား ရှရာတလွဲ ဖြစ်သွားမယ်” ဟု ဦးတင်သန်းဦးက ပြောကြားသည်။
ကမ္ဘာ့နိုင်ငံများကို လေ့လာကြည့်ပါက ဆောက်လုပ်ရေး ကဏ္ဍကြောင့် တိုင်းပြည်စီးပွားရေး တိုးတက်သည်ထက် ပြိုလဲမှုများသည့် သာဓကများကိုသာ တွေ့မြင်ရမည်ဖြစ်ပြီး တိုင်းပြည်စီးပွားရေး တိုးတက်ရန်မှာ အဆိုပါ ကဏ္ဍတစ်ခုတည်းအပေါ် ထောက်ကူနေ၍ မဖြစ်နိုင်ကြောင်း Myanmar MICE ကုမ္ပဏီမှ အမှုဆောင်ဒါရိုက်တာ ဦးဇော်နိုင်က ဆောက်လုပ်ရေးကဏ္ဍအတွက် လုပ်ငန်းရှင်များက အခွန်နှုန်း သုံးရာခိုင်နှုန်းနှင့် ငါးရာခိုင်နှုန်း တောင်းဆိုသည်ဆိုသည့် အချက်အပေါ် ဝေဖန်ဆွေးနွေးသည်။
“ကျွန်တော်တို့နိုင်ငံမှာ ဆင်းရဲချမ်းသာ ကွာဟမှု အရမ်းကြီးတယ်။ ၂၀၁၃ Data တွေအရဆို ကျွန်တော်တို့ နိုင်ငံမှာ အမေရိကန်ဒေါ်လာ သန်း ၃၀ လောက် ချမ်းသာတဲ့သူတွေက လူ ၄၀ ပဲရှိတယ်။ ၂၀၂၀ ကျရင် လူ ၃၀၀ ရှိမယ် ခန့်မှန်းတယ်။ ဒီနေ့က ၂၀၁၈ ခုနှစ်။ ကြားကာလ။ ကျွန်တော်တို့ဆီမှာ ၁၄၀ လောက်ပဲ မှန်းကြည့်လိုက်။ သန်း ၄၀ လောက် ချမ်းသာတဲ့သူက ၁၅၀ လောက်ပဲရှိတာ။ လူပေါင်း သန်း ၅၀ မှာ လူ ၁၅၀ လောက်ပဲ ချမ်းသာတဲ့သူတွေအတွက် လုပ်ပေးနေတာလား။ အခုပြောနေတဲ့ OBOR သော်လည်းကောင်း၊ အပြင်နိုင်ငံကြီးတွေက ဒီမှာလာပြီး နာမည်ခံ စီးပွားရေး လုပ်မယ့်သူတွေအတွက် ပေးတာလား” ဟု ဦးဇော်နိုင်က ဝေဖန်ဆွေးနွေးသည်။
