ကျန်းမာရေးနှင့် အားကစားဝန်ကြီးဌာန၊ တိုင်းရင်းဆေးပညာ ဦးစီးဌာန ညွှန်ကြားရေးမှူးချုပ် ဒေါက်တာဒေါ်ရီရီမြင့်အား ပါမောက္ခချုပ် (ဆေးရုံအုပ်ကြီး၊ ကုသရေး) အဖြစ် ရန်ကုန်ပြည်သူ့ဆေးရုံကြီးသို့ ပြောင်းရွှေ့ခန့်ထားကြောင်း ဇန်နဝါရီ ၃၀ ရက်က ထုတ်ပြန်ကြေညာခဲ့သည်။

၂၀၁၇ ခုနှစ်အတွင်းက တိုင်းရင်းဆေးကောင်စီ၊ မြန်မာနိုင်ငံ တိုင်းရင်းဆေးဝါး ထုတ်လုပ်သူများနှင့် လုပ်ငန်းရှင်များအသင်း၊ မြန်မာနိုင်ငံ တိုင်းရင်းဆေးဆရာ အသင်းမှ နာယကများ အပါအဝင် တာဝန်ရှိသူများ၊ တိုင်းရင်းဆေးလောကသားများ စုပေါင်းလက်မှတ်ရေးထိုး၍ တိုင်းရင်းဆေးပညာ ဦးစီးဌာန၊ ညွှန်ကြားရေးမှူးချုပ် နေရာတွင် ဆရာဝန်ဘွဲ့ရများအစား တိုင်းရင်းဆေးပညာရှင်များသာ ခန့်ထားပေးရန် ကျန်းမာရေးနှင့် အားကစား ဝန်ကြီးဌာန၊ ပြည်ထောင်စုဝန်ကြီးထံ အကြိမ်ကြိမ် တောင်းဆိုမှုများ ပြုလုပ်ခဲ့ကြောင်းနှင့် ၂၀၁၇ ခုနှစ် သြဂုတ် ၇ ရက်က တိုင်းရင်းဆေးပညာလောက တိုးတက်လာစေရန်အတွက် ညွှန်ကြားရေးမှူးချုပ်ရာထူး နေရာတွင် အရည်အချင်းရှိသူကို ပြောင်းလဲခန့်အပ်ပေးရန်နှင့် လူမှန်နေရာမှန်ဖြစ်ရေး လုပ်ဆောင်ပေးရန် အစိုးရသစ်တွင် တာဝန်ရှိကြောင်း သနပ်ပင်မဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးမြင့်ဦးက ပြောကြားသည်။

ထိုစဉ်က ပြည်သူ့လွှတ်တော် ကိုယ်စားလှယ် ဦးမြင့်ဦးက ပြောကြားရာတွင် တိုင်းရင်းဆေးပညာ ဦးစီးဌာနရှိ ညွှန်ကြားရေးမှူးချုပ်သည် တိုင်းရင်းဆေးဆရာ မဟုတ်သည့်အပြင် ပြည်ထောင်စုဝန်ကြီး သိရှိခြင်းမရှိဘဲ  အမိန့်ညွှန်ကြားချက်များ ထုတ်ပြန်ခြင်း၊ ပြည်ထောင်စုဝန်ကြီး၏ ညွှန်ကြားချက်များကို လိုက်နာခြင်း မရှိဘဲ တိုင်းရင်းဆေးပညာရပ်များအပေါ်  ဖိနှိပ်ခြင်းများ ပြုလုပ်နေခြင်းကြောင့် အရေးယူပေးရန်လည်း တိုင်းရင်းဆေးဆရာများနှင့် လွှတ်တော်ကိုယ်စားလှယ်က လက်မှတ်ရေးထိုး၍ ကျန်းမာရေးနှင့် အားကစား ဝန်ကြီးဌာန ပြည်ထောင်စုဝန်ကြီးထံ တင်ပြထားကြောင်း ပြောကြားခဲ့သည်။

ထို့ပြင် တိုင်းရင်းဆေးဝါး မှတ်ပုံတင်နှင့် ထုတ်လုပ်ခွင့်လိုင်စင်များ လျှောက်ထားရာတွင် မလိုလားအပ်ဘဲ စစ်ဆေးမှုများ ပြုလုပ်ခြင်းကြောင့် အချိန်သုံးနှစ်အထိ ကြာမြင့်မှုများ ရှိနေကြောင်း ဦးမြင့်ဦးက ပြောကြားသည်။

၂၀၁၇ ခုနှစ် ဇူလိုင်၂၅ ရက်က သနပ်ပင် မဲဆန္ဒနယ်မှ ပြည်သူ့လွှတ်တော်ကိုယ်စား လှယ် ဦးမြင့်ဦးသည် မြန်မာနိုင်ငံ တိုင်းရင်းဆေးကောင်စီ ဥပဒေကြမ်းကို ပြည်သူ့လွှတ်တော်တွင် တင်သွင်းခဲ့ကြောင်းနှင့် ဥပဒေကြမ်း ရေးဆွဲရခြင်း ရည်ရွယ်ချက်တွင် တိုင်းရင်းဆေးကောင်စီသည် ဒီမိုကရေစီစနစ်နှင့် လျော်ညီသော လွတ်လပ်စွာ ရပ်တည်ဆောင်ရွက်နိုင်သည့် အဖွဲ့အစည်းတစ်ရပ် ဖြစ်ပေါ်လာစေရန်၊ တိုင်းရင်းဆေးပညာ၏ အဓိပ္ပာယ် ဖွင့်ဆိုချက်အား ပြည်သူ့ကျန်းမာရေး စောင့်ရှောက်မှုကို ထိရောက်စွာ ဖော်ဆောင်ပေးနိုင်သော အဓိပ္ပာယ် ပြည့်ဝသည့် ဖွင့်ဆိုချက် ဖြစ်လာစေရန်၊ တိုင်းရင်းသားရိုးရာ ဆေးပညာရပ်များအား ဖော်ထုတ်အားပေး မြှင့်တင်နိုင်ရန်၊ အရည်အသွေးပြည့်ဝ၍ ထိရောက်မှုနှင့် လုံခြုံမှုရှိသော တိုင်းရင်းဆေးပညာဖြင့် ကျန်းမာရေး စောင့်ရှောက်မှု ပေးနိုင်ရန်၊ တိုင်းရင်းဆေး ဆရာများအား မိမိတို့၏ ကျင့်ဝတ်သိက္ခာနှင့် စည်းကမ်းများကို လိုက်နာစေရေး ကြီးကြပ်ထိန်းသိမ်းရန် စသည်တို့ ပါဝင်ကြောင်း သိရသည်။

တိုင်းရင်းဆေးပညာ ဦးစီးဌာန၊ ညွှန်ကြားရေးမှူးချုပ်နေရာ ပြောင်းလဲမှုနှင့် ပတ်သက်၍ မြန်မာနိုင်ငံ တိုင်းရင်းဆေးဆရာအသင်း (ဗဟို) ဒုတိယဥက္ကဋ္ဌ၊ ပြည်ထောင်စုဝန်ကြီး အကြံပေးအဖွဲ့ဝင် ဦးပေါညိမ်းက “ကျွန်တော်တို့ တိုင်းရင်းဆေးလောကသားတွေ တင်ပြတဲ့ကိစ္စကို အဆင်ပြေအောင် စီစဉ်ဆောင်ရွက်ပေးတဲ့ အတွက် ပြည်ထောင်စုဝန်ကြီးကိုလည်း ကျေးဇူးတင်ပါတယ်။ ကျွန်တော်တို့ တင်ပြထားတဲ့ ကိစ္စတွေကို သမာသမတ်နဲ့လည်း လုပ်ပေးတယ်။ ကတိလည်း တည်တဲ့အတွက်ကြောင့် ကျေးဇူးတင်တာပါ။ ကျွန်တော်တို့ အနေနဲ့လည်း အခုညွှန်ကြားရေးမှူးချုပ်နေရာကို တိုင်းရင်းဆေးပညာရပ်နဲ့ ကိုက်ညီကောင်းမွန်တဲ့သူကိုပဲ ရွေးတင်သွားဖို့ လုပ်မှာပါ” ဟု ဇန်နဝါရီ ၃၀ ရက် နံနက်က ပြောကြားသည်။

၂၀၁၈ ခုနှစ် ဇန်နဝါရီ ၁၀ ရက်က ကျန်းမာရေးနှင့် အားကစား ဝန်ကြီးဌာန လက်အောက်ရှိ တိုင်းရင်းဆေးပညာ ဦးစီးဌာန၏ ညွှန်ကြားရေးမှူးချုပ်ရာထူး နေရာတွင် ဆရာဝန်ဘွဲ့ရများအစား တိုင်းရင်းဆေးပညာရှင်များကို ခန့်ထားပေးရန်အတွက် အင်အားတစ်ထောင့်ငါးရာကျော်ဖြင့် ဆန္ဒထုတ်ဖော်မည်ဆိုသည့် အကြောင်းနှင့် ပတ်သက်၍ မြန်မာနိုင်ငံ တိုင်းရင်းဆေးပညာရှင်အသင်းက သတင်းစာရှင်းလင်းပွဲပြုလုပ်၍ ပြောကြားသည်။ ထိုစဉ်က ယင်းဆန္ဒထုတ်ဖော်မှုကို ဇန်နဝါရီ ၂၁ ရက်တွင် ရန်ကုန်မြို့၊ တာမွေမြို့နယ်၊ ကျိုက္ကဆံကွင်းအတွင်း ပြုလုပ်မည်ဟု ပြောကြားသည်။ သို့သော် ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး၏ မေတ္တာရပ်ခံမှုကြောင့် ယင်းဆန္ဒထုတ်ဖော်မှုပြုလုပ်ရန် အစီအစဉ်ကို တစ်လရွှေ့ဆိုင်းခဲ့သည်။

“ညွှန်ကြားရေးမှူးချုပ်နေရာ အပြောင်းအလဲကိစ္စနဲ့ ပတ်သက်ပြီး ကျွန်တော်တို့ တိုင်းရင်းဆေးလောကသားတွေ တောင်းဆိုတာကို ကျန်းမာရေး ပြည်ထောင်စုဝန်ကြီးက ရာနှုန်းပြည့် ဖြည့်ဆည်းပေးလိုက်တယ်လို့ ပြောရမှာပေါ့။ ကျွန်တော်တို့အနေနဲ့ ဆန္ဒပြဖို့လည်း အစီအစဉ် မရှိတော့ပါဘူး။ နောက်ထပ်လည်း ဘာတွေလုပ်ပေးမယ် ဆိုတာလည်း ဝန်ကြီးက ကတိပေးထားတယ်။ ညွှန်ချုပ်နေရာမှာ တိုင်းရင်းဆေး ပညာရှင်တွေ ခန့်အပ်ဖို့ မဟုတ်သေးတောင်မှ နောင်တစ်ချိန် တိုင်းရင်းဆေးပညာရှင်အတွက် လမ်းဖွင့်ပေးထားမယ်ပေါ့။ ဘာကြောင့်လဲဆိုတော့ ချက်ချင်းကြီး ညွှန်ချုပ်နေရာအတွက်တို့ တိုင်းရင်းဆေး ဆရာတွေထဲမှာ လောလောဆယ် ရှိမနေသေးဘူး။ ဒါကို အမြန်ဆုံးရအောင်တော့ လုပ်ပေးမယ်လို့ ပြောပါတယ်။ နောက်ထပ်ညွှန်ချုပ်ခန့်ဖို့ကတော့ ကြာမယ့်သဘောမှာ ရှိပါတယ်” ဟု တိုင်းရင်းဆေးပညာရှင် ဦးဝင်းဇော်က ပြောကြားသည်။

ဆန္ဒထုတ်ဖော်ပွဲပြုလုပ်ရန် စီစဉ်ခဲ့စဉ်က တစ်နိုင်ငံလုံးရှိ တိုင်းရင်းဆေးဆရာများ၊ တိုင်းရင်းဆေးပညာများကို စိတ်ဝင်စားသူများ၊ တိုင်းရင်းဆေးပညာရှင် အသင်းဝင်ဟောင်းများ၊ ကောင်စီဝင်များ၊ ပြည်ထောင်စုဝန်ကြီး အကြံပေး ဆရာကြီး အချို့နှင့် တိုင်းရင်းဆေးဝါး ထုတ်လုပ်သည့် လုပ်ငန်းရှင်အချို့လည်း ပါဝင်မည်ဖြစ်သည်။