တနသာၤရီတိုင်းဒေသကြီး ထားဝယ်မြို့၌ ဖြစ်ပွားနေသည့် လယ်ယာမြေသိမ်းဆည်းမှု ပြဿနာများကို ငါးပွင့်ဆိုင် တွေ့ဆုံဆွေးနွေးပေးခြင်း မရှိသောကြောင့် တိုင်းဒေသကြီး အစိုးရအဖွဲ့ ဝန်ကြီးချုပ်နှင့် ဝန်ကြီး နှစ်ဦးကိုနှုတ်ထွက်ပေးရန် ထားဝယ်ခရိုင် တောင်သူလယ်သမားများသမဂ္ဂက ဦးဆောင်၍ အောက်တိုဘာလ ၁၈ ရက်နေ့ မနက်ပိုင်းတွင် ဆန္ဒထုတ်ဖော်ရန် စီစဉ်ခဲ့သော်လည်း အစိုးရအုပ်ချုပ်ရေးအဖွဲ့နှင့် ရဲတပ်ဖွဲ့က လာရောက်တားမြစ်သောကြောင့်ဆန္ဒပြပွဲအား ဖျက်သိမ်းခဲ့ကြောင်း သိရသည်။
ဆန္ဒပြပွဲပြုလုပ်မည့် အောက်တိုဘာလ ၁၈ ရက်နေ့ နံနက် ၈ နာရီအချိန်တွင် အစိုးရအုပ်ချုပ်ရေး အဖွဲ့နှင့် ရဲတပ်ဖွဲ့ထပ်မံလာရောက်ကာ ဆန္ဒပြရာတွင် ပါဝင်မည့် ပိုစတာ၊ စာသားနှင့် ကြွေးကြော်သံများမှာ ဥပဒေနှင့် မကိုက်ညီသည့်အတွက် ပယ်ဖျက်ပေးရန် လာရောက်အသိပေးခဲ့ပြီး ၎င်းတို့ ပယ်ဖျက်ခိုင်းသည်များကို မပယ်ဖျက်ပါက ဆန္ဒပြပွဲအား ခွင့်မပြုနိုင်ကြောင်း လာရောက်တားဆီး ခဲ့သည်ဟု သိရသည်။
ထိုသို့ တားဆီးခဲ့ပြီးနောက် လယ်သမားများဘက်မှ ၎င်းတို့နှင့် အစိုးရအဖွဲ့ တာဝန်ရှိသူများ တွေ့ဆုံခွင့်ပေးရန် တောင်းဆို၍ စောင့်ဆိုင်းခဲ့သော်လည်း ပြန်လည် အကြောင်းပြန်လာခြင်း မရှိသောကြောင့် မူလအစီအစဉ်အတိုင်း ပိုစတာများ ကိုင်ဆောင်ကာ လယ်သမားမိသားစုဝင် ၁၀၀ ခန့်က ဝဲကျွန်းကူးတို့ဟောင်းလမ်း နေအိမ်မှ စတင်ထွက်ခွာခဲ့ကြောင်း၊ ရဲတပ်ဖွဲ့ဝင်အများအပြားနှင့် အုပ်ချုပ်ရေးအဖွဲ့မှ ကူးတို့ဟောင်းလမ်းထိပ်တွင် သံဆူးကြိုးများဖြင့် ချထားကာ တားဆီးခဲ့သည့်အပြင် အကြမ်းဖက်မှု ဖြိုခွင်းသည့်လက်နက်များနှင့် အချုပ်ကားများကိုပါ အသင့်ပြင်ဆင်ထားခဲ့ပြီး ဆန္ဒပြပွဲအား ဆက်လက်ဆောင်ရွက်မည် ဆိုပါက ဥပဒေအရ အရေးယူမည်ဟု သတိပေးခဲ့ကြောင်း သိရသည်။
ထို့နောက် တိုင်းဒေသကြီးရဲတပ်ဖွဲ့မှူးက ဆန္ဒပြရာတွင် အသုံးပြုမည့် ဝန်ကြီးချုပ်နှင့် အစိုးရအဖွဲ့အား ထိခိုက်စေသည့် ပိုစတာများ ဖြုတ်သိမ်းပေးပါက ဆန္ဒပြပွဲကို ခွင့်ပြုမည်ဖြစ်ကြောင်း လယ်သမားများအား လာရောက်ညှိနှိုင်းခဲ့သော်လည်း ပြေလည်မှုမရှိဘဲ အခြေအနေတင်းမာနေစဉ် လူ့အခွင့်ရေး စောင့်ကြည့်လေ့လာရေးအဖွဲ့မှ ကိုသန်းဝင်းက ကြားဝင်ညှိနှိုင်းပေးခဲ့သောကြောင့် ဆန္ဒပြသူများဘက်က ဆန္ဒပြပွဲကို နံနက် ၉ နာရီအချိန်တွင် ဖျက်သိမ်းခဲ့ကြောင်း သိရသည်။
ဆန္ဒပြပွဲကို တာဝန်ရှိသူများနှင့်ရဲတပ်ဖွဲ့က တားဆီးခဲ့သောကြောင့် ဖျက်သိမ်းခဲ့သော်လည်း တိုင်းဒေသကြီး အစိုးရအဖွဲ့အနေဖြင့် တစ်လအတွင်း သိမ်းဆည်းလယ်ယာမြေ ပြဿနာကို ငါးပွင့်ဆိုင် တွေ့ဆုံမဖြေရှင်းပေးပါက လယ်သမားများ အနေဖြင့် ထပ်မံဆန္ဒပြသွားမည်ဖြစ်ပြီး တနသာၤရီတိုင်းဒေသကြီး အတွင်း၌ ဒီမိုကရေစီ မရရှိသေးကြောင်း ယခုကဲ့သို့ တားဆီးမှုက သက်သေပြနေသည်ဟု ဆန္ဒပြပွဲဦးဆောင်သူဖြစ်သည့် ဒေါ်ရီရီထွေးက ပြောကြားခဲ့သည်။
တောင်သူလယ်သမားများအပေါ် ဥပဒေမဲ့ဖိနှိပ်မှု ရပ်ဆိုင်းရန်နှင့် တရားဥပဒေစိုးမိုးရေး၊ တာဝန်ယူမှု တာဝန်ခံမှု ရှိသော အစိုးရတစ်ရပ် ဖြစ်လာစေရေး ခေါင်းစဉ်ဖြင့် အောက်တိုဘာလ ၁၈ ရက်နေ့ မနက်ပိုင်းတွင် ပြုလုပ်မည့် ယင်းဆန္ဒထုတ်ဖော်ပွဲကို ဆောင်ရွက်ရန် ထားဝယ်မြို့နယ် ရဲတပ်ဖွဲ့သို့ ငြိမ်းစုစီ ဥပဒေအတိုင်း အောက်တိုဘာလ ၁၅ ရက်နေ့က လျှောက်ထားခဲ့ကြောင်း၊ ထိုသို့လျှောက်ထားရာတွင် ဆန္ဒပြရာ၌ လက်ရှိတနသာၤရီ တိုင်းဒေသကြီး ဝန်ကြီးချုပ်နှင့် အစိုးရအပေါ် ဥပဒေနှင့်မညီသော ပိုစတာဆိုင်းဘုတ်များ၊ စာသားများနှင့် ကြွေးကြော်သံများ ပါရှိနေကြောင်း စီစစ်တွေ့ရှိရပြီး ၂၀၁၆ ခုနှစ် ငြိမ်းစုစီဥပဒေပါ စည်းကမ်းသတ်မှတ်ချက်များနှင့် ကိုက်ညီမှုမရှိဘဲ ဆန့်ကျင်နေသောကြောင့် ဥပဒေနှင့် မကိုက်ညီသောစာသား ပိုစတာများကို ပယ်ဖျက်ပေးပါရန် အောက်တိုဘာလ ၁၆ ရက်နေ့က စာဖြင့်အကြောင်း ပြန်လာမှုအပြင် သက်ဆိုင်ရာခရိုင်၊ မြို့နယ်ရဲတပ်ဖွဲ့မှူးများမှ နေအိမ်သို့ လာရောက်ပြောဆိုမှုများ ရှိခဲ့ကြောင်း ဒေါ်ရီရီထွေးက ပြောကြားသည်။
