သြဂုတ်လအတွင်းက လူငယ်မူဝါဒဖြစ်မြောက်ရေးဆိုင်ရာ ကော်မတီသုံးရပ် တွေ့ဆုံဆွေးနွေးပွဲ ပြုလုပ်နေသည်ကို တွေ့ရစဉ် (Photo ; National Youth Police - Myanmar Facebook)
တိုင်းဒေသကြီးနှင့် ပြည်နယ်အသီးသီးမှ အကြံပြုချက်များပါဝင်မည့် လူငယ်မူဝါဒမဟာဗျူဟာ စီမံကိန်းရေးဆွဲရေးကို နိုဝင်ဘာလအတွင်း ပြုလုပ်နိုင်ရန် လျာထားကြောင်း သတင်းရရှိသည်။
လက်ရှိအချိန်တွင် တစ်နိုင်ငံလုံးအဆင့် မဟာဗျူဟာစီမံကိန်း ရေးဆွဲရာ၌ အသုံးပြုနိုင်ရန်အတွက် အတည်ပြုထားသော လူငယ်မူဝါဒ(မူကြမ်း) အား တိုင်းဒေသကြီး နှင့်ပြည်နယ်အသီးသီးတွင် ပြန်လည်ချပြပြီး အကြံပြုချက်တောင်းခံမှုများလည်း လုပ်ဆောင်လျက်ရှိသည်။
“ကျွန်တော်တို့ မဟာဗျူဟာ စီမံကိန်းရေးဆွဲရေးကို နိုဝင်ဘာ ဒုတိယပတ်လောက် ကျွန်တော်တို့ လျာထားတယ်။ လတ်တလော အထိတော့ ကနဦးက တိုင်းနဲ့ပြည်နယ်တွေကို လက်ရှိမူဝါဒဖြစ်စဉ် ထဲမှာပါတဲ့ လူတွေကို ဦးစားပေးပြီးတော့ Strategic Plan ရေးဆွဲတဲ့အခါ ပါဝင်ပေးဖို့ဆိုပြီးတော့ တိုင်းနဲ့ ပြည်နယ် (၂) ဦးစီးကို Request လုပ်ထားတယ်။ တချို့တိုင်းနဲ့ ပြည်နယ်တွေက အဆင်သင့်ဖြစ်လို့ စာရင်းပေးထားတာတွေရှိသလို တချို့တိုင်းနဲ့ ပြည်နယ်တွေကတော့ ရွေးချယ်ထားတာတွေ စာရင်းပေးထား တာတွေတော့မရှိသေးဘူးပေါ့။ မူကြမ်းကို ကျွန်တော်တို့အတည်ပြုပြီး ချင်းမှာပဲ ရှေ့နေချုုပ်ရုံးကို ပို့တယ်။ သူတို့ကလည်းအတည်ပြုတယ်။ ပြီးတော့ ဒါကိုအစိုးရ Cabinet အစည်းအဝေးမှာ အတည်ပြုပြီးတဲ့ အခါကျရင်တော့ ကျွန်တော်တို့က တစ်နိုင်ငံလုံးအတိုင်း အတာအနေနဲ့ ပြန်ပြီးတော့ ချပြမယ်။ ချပြတယ်ဆိုတာက Cabinet အစည်းအဝေးမှာ အတည်ပြုပြီးတဲ့အခါကျ ကျွန်တော်တို့က လက်လှမ်းမီသလောက် တိုင်းနဲ့ ပြည်နယ်တွေမှာ မူကြမ်းတွေရိုက်နှိပ်ပြီးတော့ ဖြန့်ချိတာတွေ လုပ်ဆောင်တာတွေ လူငယ်တွေနဲ့ တွေ့ဆုံတာတွေ အကြံဉာဏ်တွေရယူတာတွေ လုပ်ဆောင်တယ်။ ဒါကတော့ လူငယ်တွေဘက်ကနေ လုပ်နိုင်သလောက် တိုင်းနဲ့ပြည်နယ်တွေ ပုံစံတွေလုပ်ခွင့်ရတဲ့ ဘောင်ထဲက လုပ်နိုင်သလောက်လုပ်သွားပါမယ်။ အစိုးရအဆင့်အနေနဲ့လည်း သူတို့လုပ်နိုင်တဲ့ လမ်းကြောင်းတွေကနေ အသိပေးတာတွေ လုပ်သွားမယ်” ဟု လူငယ်မူဝါဒဖြစ်မြောက် ရေးဗဟိုကော်မတီဝင် ကိုသူရစိုးက ပြောကြားသည်။
တိုင်းဒေသကြီးနှင့် ပြည်နယ်တို့တွင် လူငယ်မူဝါဒ(မူကြမ်း) အားချပြပြီး အကြံဉာဏ်တောင်းခံခြင်း လုပ်ဆောင်နေသော်လည်း ရရှိလာမည့် အကြံပြုချက်များအား လူငယ်မူဝါဒ(မူကြမ်း)တွင် ထည့်သွင်းဖြည့်စွက်ရန် အခက်အခဲများရှိနိုင်သည့်အတွက် မဟာဗျူဟာစီမံကိန်း ရေးဆွဲရာတွင် ထည့်သွင်းအသုံးပြုသွားမည် ဖြစ်ကြောင်းလည်း သိရသည်။
“တစ်နိုင်ငံလုံးအဆင့်ဆိုတော့ တိုင်းဒေသကြီးတစ်ခုချင်းနဲ့ ပြည်နယ်တစ်ခုချင်းစီက တစ်ခုနဲ့တစ်ခု တူမှာတော့မဟုတ်ဘူး။ မတူတာတွေ လာစုမယ်။ အဲဒါတွေကို ကျွန်တော်တို့က Remark နဲ့သွားမယ်။ ဥပမာ ကျန်းမာရေးနဲ့ပတ်သက်လို့ တနင်္သာရီမှာတော့ ဒီပုံစံနဲ့ အကောင်အထည်ဖော်မယ်။ ရန်ကုန်မှာတော့ တခြားပုံစံ။ ချင်းပြည်နယ်က ဒီလိုမျိုးရှိမယ်။ မတူညီတဲ့ပုံစံတွေတော့ ရှိလိမ့်မယ်။ အဲဒီလိုမတူညီတဲ့ လုပ်ဆောင်မှုတွေ တိုင်းဒေသကြီး ပြည်နယ်အသီးသီးကဟာတွေ အကုန်လုံးက ဒီမဟာဗျူဟာရေးဆွဲတဲ့ အထဲမှာ အကုန်ပါမယ်။ ပြီးတော့မှ Strategic Plan ထဲမှာပါတဲ့အတိုင်း တိုင်းနဲ့ပြည်နယ်တွေမှာ လုပ်ဆောင်သွားမယ်” ဟု ကိုသူရစိုးက ဆိုသည်။
မဟာဗျူဟာစီမံကိန်းရေးဆွဲရာတွင် လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန၊ ပညာရေးဝန်ကြီးဌာန၊ အားကစားနှင့် ကျန်းမာရေးဝန်ကြီးဌာနစသည်ဖြင့် သက်ဆိုင်ရာ ဝန်ကြီးဌာနများ၊ လူငယ်အရေး တက်ကြွလှုပ်ရှားသူများနှင့် တိုင်းဒေသကြီးနှင့် ပြည်နယ်အသီးသီးမှ လူငယ်နှစ်ဦးစီပါဝင်၍ တစ်နိုင်ငံလုံးအဆင့် လူငယ်မူဝါဒမဟာဗျူဟာ စီမံကိန်းအား ရေးဆွဲသွားမည်ဖြစ်ကြောင်း ၎င်းက ပြောကြားသည်။
တိုင်းဒေသကြီးနှင့် ပြည်နယ်အသီးသီးတွင် အကြံပြုချက်တောင်းခံမှုများ လုပ်ဆောင်ခြင်းကို မဟာဗျူဟာစီမံကိန်း မရေးဆွဲမီအချိန်ကာလအထိ လုပ်ဆောင်သွားမည်ဖြစ်ကြောင်း သိရသည်။
ပြီးခဲ့သည့် သြဂုတ် ၂၄ ရက်က နေပြည်တော်တွင် လူငယ်မူဝါဒ ဖြစ်မြောက်ရေးလုပ်ဆောင်နေကြသည့် မူကြမ်းရေးဆွဲရေးကော်မတီဝင်များ၊ လုပ်ငန်းကော်မတီဝင်များ နှင့်ဗဟိုကော်မတီဝင်များတွေ့ဆုံခဲ့ကြပြီး လူငယ်မူဝါဒမူကြမ်း (Final Draft)) ကို အတည်ပြုရယူခဲ့ကာ လက်ရှိတွင် အတည်ပြုဆောင်ရွက်နိုင်ရန် သက်ဆိုင်ရာသို့ အဆင့်ဆင့် ပေးပို့လုပ်ဆောင်လျက်ရှိသည်။
