ဇူလိုင် ၃၁ ရက်တွင် ဒါနန်မြို့အနီး Golden Bridge သို့ လာရောက်လည်ပတ်နေသူများအား တွေ့ရစဉ် (Photo: AFP)

ဗီယက်နမ်နိုင်ငံအလယ်ပိုင်းရှိ သစ်တောထူထပ်သော တောင်တန်းဒေသတွင် သစ်ပင်များထဲမှ ထွက်ပေါ်လာသည့် ဧရာမ ကွန်ကရစ်လက်ကြီးနှစ်ဖက်က ကိုင်မထားသော ရွှေရောင်တံတားတစ်စင်း တည်ရှိသည်။ ဗီယက်နမ်တွင် ခရီးသွားဆွဲဆောင်ရာ ထူးခြားလှသော နောက်ဆုံးနေရာတစ်ခု ဖြစ်လာခဲ့သည့် ထိုတံတားပေါ်တွင် ပျော်ရွှင် ကျေနပ်နေသော ခရီးသွားအများအပြား ဆဲလ်ဖီများ ရိုက်ကူးနေကြသည်ကိုလည်း တွေ့နိုင်မည်ဖြစ်သည်။

ဘုရားသခင်၏ လက်ကြားထဲမှ တလက်လက် တောက်ပနေသော အပ်ချည်မျှင်ပေါ်တွင် လမ်းလျှောက်နေရသကဲ့သို့ ခံစားရစေရန် ဒီဇိုင်းထွင်ထားခြင်းဖြစ်သော ထိုတံတား၏ အမည်မှာ Golden Bridge ဖြစ်သည်။ ဒါနန်မြို့အနီး ဘာနာတောင်ကုန်းဒေသ၌ တည်ရှိသော Golden Bridge သည် စတင်ဖွင့်လှစ်ခဲ့သည့် ဇွန်လကတည်းက ခရီးသွားဧည့်သည်များစွာကို ဆွဲဆောင်နိုင်ခဲ့သည်။

လက်ရှိတွင် တံတားနှင့်ပတ်သက်သော ဓာတ်ပုံများစွာသည် လူမှုမီဒီယာပေါ်၌ ကျယ်ကျယ်ပြန့်ပြန့် ပျံ့နှံ့လျက်ရှိပြီး ထိုမျှလောက် အာရုံစိုက်မှု အများအပြားရမည်ဟု ထင်မထားသော တံတား၏ ဗိသုကာပညာရှင်ပင်လျှင် အံ့သြနေသည်။ “ကျွန်တော်တို့ရဲ့ လက်ရာကို ကမ္ဘာတစ်ဝန်းက လူတွေအချင်းချင်း ဝေမျှအသိပေးနေကြတာကို တွေ့ရတဲ့အတွက် ဂုဏ်ယူမိပါတယ်” ဟု ဗူဗီ ယက်အန်က ပြောကြားခဲ့သည်။

တံတားတည်ရှိရာနေရာကို ၁၉၁၉ ခု နှစ်တွင် ပြင်သစ်ကိုလိုနီများက တောင်စခန်းမြို့အဖြစ် ပထမဆုံးဆောက်လုပ်ခဲ့ခြင်း ဖြစ်သည်။ မီတာ ၁၅၀ ( ၄၉၀ ပေ) ရှည်လျားသော တံတားမှာမူ ထိုတောင်ကုန်းမြင့်ဒေသထဲတွင် မြွေလိမ်မြွေကောက်ပုံစံ တည်ရှိနေသည်။ ကေဘယ်ကား၊ အလယ်ခေတ်က ပြင်သစ်ပုံစံကျေးရွာ (ရဲတိုက်များ၊ ဘုရားကျောင်းများပင်ပါဝင်)၊ ပုံစံငယ်ဥယျာဉ်များ၊ ဖယောင်းရုပ်တုပြတိုက်များဖြင့် ထပ်မံအားဖြည့်ထားသော ယင်းတောင်စခန်းဒေသသည် လက်ရှိတွင်မူ ဗီယက်နမ်၏ ကြီးမားသော ခရီးသွား ဆွဲဆောင်ရာတစ်ခု ဖြစ်နေပြီဖြစ်သည်။

ကေဘယ်ကားများပေါ်မှ ကြည့်လျှင်လည်း ပြင်သစ်ကိုလိုနီတို့၏ အားလပ်ရက် အပန်းဖြေနေအိမ်များကို တွေ့မြင်နိုင်မည် ဖြစ်သည်။ သို့သော် ခရီးသွားများ အများစု စိတ်ဝင်စားကြသည်မှာ အသစ်စက်စက် တည်ဆောက်ထားသော Cau Vang တံတား (ဗီယက်နမ်ဘာသာဖြင့် ရွှေရောင်တံတားဟု အဓိပ္ပါယ်ရ) ပင်ဖြစ်သည်။

ယင်းတံတားကို တည်ဆောက်ခဲ့သည့် Sun Group သည် ဗီယက်နမ်နိုင်ငံတစ်ဝန်းတွင် ရဲတင်းသောဒီဇိုင်းရှိပြီး အမြင်ကွဲလွဲမှုများစွာကို ဖြစ်ပေါ်စေသည့် စီမံကိန်းများစွာအား ဆောက်လုပ်နေသူများဖြစ်သည်။

Ref: AFP