ဇွန် ၁၃ ရက်က စစ္စလီမြို့ ကာတာနီယ ာဆိပ်ကမ်းတွင် ကယ်ဆယ်မှု ပြုလုပ်ခဲ့ပြီးနောက် အီတလီ ကမ်းရိုးတန်းစောင့်သင်္ဘော Piciotti ကို တွေ့ရစဉ် (Photo : AFP)

ရွှေ့ပြောင်းအခြေချ ရာပေါင်းများစွာ လိုက်ပါလာသော Aquarius သင်္ဘောအား လက်ခံရန် အီတလီ၏ ငြင်းဆန်ခဲ့မှုကို ပြင်သစ်မှလွဲ၍ ဥရောပသမဂ္ဂ၏ ကျန်အဖွဲ့အချို့ထံမှ ကန့်ကွက်မှု မဆိုစလောက်သာ ကြုံတွေ့ခဲ့ရမှုက သဘောထားတင်းမာသူများသည် ယခုအခါ ရွှေ့ပြောင်းအခြေချဆိုင်ရာ ပဋိပက္ခအား အဖြေရှာမှုတွင် ပုံဖော်နေသည့် လက္ခဏာ ဖြစ်ကြောင်း လေ့လာသူများက ရှုမြင်ခဲ့သည်။

ရောမ၏ တာဝန်ယူမှု မရှိခြင်းအား ပြင်သစ်သမ္မတ အီမန်နျူရယ်မက်ခရွန်က ရှုတ်ချခဲ့သော်လည်း ယခုအခါ ဥရောပသမဂ္ဂ၏ ပြင်ပနယ်စပ်များအား ကြိုတင်ကာကွယ်ရန်အတွက် အာရုံစိုက်နေသည့် အဖွဲ့ဝင်နိုင်ငံများအား မစည်းရုံးနိုင်ခဲ့ပေ။ ဘရပ်ဆဲ အခြေစိုက် ဥရောပသမဂ္ဂ၏ အုပ်ချုပ်ရေး လက်တံဖြစ်သည့် ဥရောပကော်မရှင် ကိုယ်တိုင် အဖွဲ့ဝင် ၂၈ နိုင်ငံအကြား ညီညွတ်ရန်နှင့် ပင်လယ်ထဲ မျောပါနေသော ရွှေ့ပြောင်းအခြေချများအား လူသားဆန်ဆန် ပြုမူရန်အတွက် တောင်းဆိုရာတွင် ကန့်သတ်ခံနေရသည်။

ရောမက Aquarius သင်္ဘောအား ငြင်းဆန်လိုက်ခြင်းက ပြီးခဲ့သော ငါးနှစ်ခန့်က ဥရောပနိုင်ငံများ၏ သဘောထားကို လုံးလုံးလျားလျား ပြောင်းလဲလိုက်မှု၏ အမှတ်အသားဖြစ်ကြောင်း ပြင်သစ်နိုင်ငံ Nantes တက္ကသိုလ်မှ သုတေသီ Yves Pascouau က ပြောကြားခဲ့သည်။ ၂၀၁၃ ခုနှစ်တွင် အိမ်နီးချင်းနိုင်ငံများ၏ တုံ့ပြန်မှု ကင်းမဲ့နေချိန်၌ အီတလီသည် ရေကြောင်းဆိုင်ရာ လူသားချင်းစာနာမှုမစ်ရှင် Mare Nostrum ကို စတင်ခဲ့ခြင်းအား ၎င်းက ရည်ညွှန်းခဲ့သည်။

Aquarius ဆိုင်ရာ အချင်းများမှုသည် ဥရောပသမဂ္ဂ နယ်စပ်များအား ပိတ်ပင်လိုနေသည့် သဘောထား ပိုမိုတင်းမာသူများအတွက် အောင်ပွဲဖြစ်ကြောင်း ပြသနေသည်ဟု Pascouau က ဆိုခဲ့သည်။

သဘောထား အလွန်အမင်း ကွဲပြားနေမှု

ဟန်ဂေရီ၊ ချက်၊ ဆလိုဗေးနီးယားနှင့် ပိုလန်တို့ကဲ့သို့ ဥရောပသမဂ္ဂထဲမှ ကွန်မြူနစ်နိုင်ငံဟောင်းများသည် ဒုတိယကမ္ဘာစစ်နောက်ပိုင်း ဥရောပအတွက် အဆိုးရွားဆုံး လူသားချင်းစာနာမှု အကျပ်အတည်း ကြုံခဲ့ရသည့် ၂၀၁၅ ခုနှစ်တွင် အဖွဲ့က သဘောတူခဲ့သည့် ရွှေ့ပြောင်းအခြေချဝေစု လက်ခံရေးကို လုံးဝလက်မခံခြင်း သို့မဟုတ် ဆန့်ကျင်ခြင်း ပြသခဲ့ကြသည်။ သို့သော် ဥရောပသမဂ္ဂ အဖွဲ့ဝင်နိုင်ငံ အများအပြားကမူ ထိုအစီအစဉ်၌ ပူးပေါင်းပါဝင်ခဲ့ကြသည်။

ဥရောပသမဂ္ဂသည် အစောပိုင်းတွင် အရှေ့နှင့်အနောက် ကွဲပြားခဲ့ကြကြောင်း၊ သို့သော် လက်ယာစွန်းဝါဒီများ အာဏာရရှိခဲ့သည့် အီတလီနှင့် သြစတြီးယားတို့ အပါအဝင် နိုင်ငံအများအပြား၌ ရွှေ့ပြောင်းအခြေချများအား ဆန့်ကျင်သည့် အယူအဆများသည် ရွေးကောက်ပွဲများ၌ အားကောင်းခဲ့ပြီး အခြေအနေသည် ပြောင်းလဲသွားခဲ့ကြောင်း စပိန်ပညာရှင်အဖွဲ့ CIDOB မှ အလီနာဆန်းချက်ဇ်မွန်တီဂျာနိုက ထောက်ပြခဲ့သည်။

ခိုလှုံခွင့်တောင်းခံသူ အလုံးအရင်းဖြင့် ဝင်ရောက်လာမှုအား လက်ခံခဲ့သော ဂျာမနီဝန်ကြီးချုပ် အင်ဂျလာမာကယ်သည်လည်း ရွှေ့ပြောင်းအခြေချများအား သဘောထား တင်းမာသည့် ပြည်ထဲရေးဝန်ကြီး Horst Seehofer နှင့် ထိပ်တိုက်တွေ့နေကြောင်း ၎င်းကဆိုခဲ့သည်။

ဇူလိုင်တွင် ဥရောပသမဂ္ဂ အလှည့်ကျဥက္ကဋ္ဌရာထူးကို ထမ်းဆောင်မည့် သြစတြီးယားမှ ဝန်ကြီးချုပ် ဆီဘက်စတန်ကားဇ်က ဥရောပသမဂ္ဂ ပြင်ပနယ်စပ်များအား ကြိုတင်ကာကွယ်နိုင်ရန် လိုအပ်သော အရာများကို အာရုံစိုက်သွားမည်ဟု ပြောကြားခဲ့သည်။ ထို့ပြင် စစ်မှန်သော ခိုလှုံခွင့်တောင်းခံသူနှင့် စီးပွားရေးအရ ရွှေ့ပြောင်းအခြေချများအား ခွဲခြားပစ်ရန်အတွက် ဥရောပသမဂ္ဂ ပြင်ပ၌ ကြိုဆိုလက်ခံရေး စင်တာများဟုခေါ်သော စခန်းများကို တည်ဆောက်ရန် ဒိန်းမတ်ကဲ့သို့ နိုင်ငံများနှင့် လုပ်ဆောင်နေသည်ဟု ဗီယင်နာက အတည်ပြုခဲသ့ည်။

ဥရောပသို့ အဓိက ဝင်ပေါက်များဖြစ်ကြသော အထူးသဖြင့် တူရကီနှင့် လစ်ဗျားကဲ့သို့နိုင်ငံများနှင့် ဥရောပသမဂ္ဂအကြား သဘောတူညီချက်များ ရရှိခဲ့ပြီးနောက် ခိုလှုံခွင့် တောင်းခံသူများ ဝင်ရောက်မှုသည် အလွန်အမင်း ကျဆင်းခဲ့သော်လည်း ထိုကိစ္စသည် ဥရောပသမဂ္ဂ အဖွဲ့ဝင်နိုင်ငံအချို့တွင် နိုင်ငံရေးဆိုင်ရာ အဓိက အကြောင်းအရာအဖြစ် မြင့်တက်လာခဲ့ကြောင်း Carnegie Europe မှ ကျွမ်းကျင်ပညာရှင် စတက်ဖန်လမ်းက ပြောကြားခဲ့သည်။

အသက်မဲ့နေသော အဆိုပြုချက်

ဒဗ္ဗလင်စည်းမျဉ်းများ ဟုခေါ်သည့် ဥရောပသမဂ္ဂသို့ ခိုလှုံခွင့်တောင်းခံမှုဆိုင်ရာ စည်းမျဉ်းများအား ပြုပြင်ပြောင်းလဲရန်အတွက် နှစ်ပေါင်းများစွာ ခက်ခက်ခဲခဲ ညှိနှိုင်းဆွေးနွေး ခဲ့ကြသော်လည်း သဘောတူညီချက် မရသေးပေ။

လက်ရှိစည်းမျဉ်းများအရ ရွှေ့ပြောင်းအခြေချများ ပထမဆုံး ဝင်ရောက်လာသော နိုင်ငံများက ၎င်းတို့၏ ခိုလှုံခွင့် တောင်းခံမှုများကို စိစစ်ပေးရမည်ဖြစ်ရာ ဂရိနှင့်အီတလီတို့အတွက် မမျှတသော ဝန်ထုပ်ဝန်ပိုး ဖြစ်စေခဲ့ဟု ဝေဖန်သူများက ပြောကြားခဲ့ကြသည်။ သို့သော် ထိုစည်းမျဉ်းများအား ပြုပြင်ပြောင်းလဲမှု လုပ်ဆောင်ရန် ဘရပ်ဆဲတွင် ထိပ်သီး ကျင်းပမည့် ဇွန် ၂၈-၂၉ ရက်ကို နောက်ဆုံးအချိန် သတ်မှတ်ထားမှုသည် နီးကပ်လာချိန်တွင် ခိုလှုံခွင့် တောင်းခံသူများအား နေရာပြန်လည်ချထားရေးနှင့် ပတ်သက်၍ အဖွဲ့ဝင် နိုင်ငံများအကြား မဆုတ်သာ မတိုးသာ အခြေအနေ ကြုံနေရဆဲ ဖြစ်သည်။

ဥရောပကော်မရှင်၏ အဆိုပြုချက်သည် အခြေခံအားဖြင့် အသက်မဲ့နေပြီး အီတလီအစိုးရသစ်နှင့် နိုင်ငံအချို့က ဥရောပသို့ ရွှေ့ပြောင်းအခြေချများ မဝင်လာနိုင်စေရန် ကြိုတင်ဟန့်တားမှုသည် အကောင်းဆုံး နည်းလမ်းအဖြစ် ရှုမြင်ခဲ့ကြောင်း လမ်းက ပြောကြားခဲ့သည်။

Ref : AFP