၂၀၁၄ ခုနှစ် ဖေဖော်ဝါရီ ၂၄ ရက်က ပေကျင်းတွင် မီးခိုးမြူဖုံးလွှမ်းနေစဉ် သွားလာနေသူများကို တွေ့ရစဉ် (Photo: AFP)

လေထုညစ်ညမ်းမှု တိုက်ဖျက်သည့်စစ်ပွဲတွင် တရုတ်အနိုင်ရရှိမှုက လူ့သက်တမ်းကို များစွာတိုးတက်စေပြီး နှစ်နှစ်ကျော် မြင့်တက်လာနိုင်သည်ဟု အမေရိကန်တက္ကသိုလ် လေ့လာမှုတစ်ခုအရ သိရသည်။

တရုတ်အစိုးရသည် မီးခိုးမြူပျံ့နှံ့မှုကို ရှင်းလင်းရန် စစ်ပွဲတစ်ခုဆင်နွှဲနေသည်။ မီးခိုးမြူပျံ့နှံ့မှုကြောင့် ဒေသတစ်ချို့တွင် လူ့သက်တမ်းလျော့ကျခဲ့ခြင်းနှင့် လေထုညစ်ညမ်းမှု အထွတ်အထိပ်သို့ ရောက်ရှိနေသည့်ဒေသများတွင် ဒေသခံများသည် ကိုယ့်ကိုယ်ကိုယ်ကာကွယ်ရန် နှာခေါင်းစည်းများနှင့် လေသန့်စက်များ ဝယ်ခဲ့ရသည်။

ရှီကာဂိုတက္ကသိုလ်က မတ် ၁၂ တွင် ထုတ်ပြန်ခဲ့သည့်လေ့လာမှု၌ ကမ္ဘာတွင် လေထုညစ်ညမ်းမှုအဆိုးရွားဆုံးဖြစ်သည့် တရုတ်နိုင်ငံသည် ပြည်တွင်းနှင့် အပြည်ပြည်ဆိုင်ရာ လေထုအရည်အသွေးစံနှုန်းများကို ပြည့်မီရန် ရှည်လျားသည့်လမ်းတစ်ခုနှင့် ကြုံတွေ့ခဲ့ရသော်လည်း တရုတ်နိုင်ငံသည် လေထုညစ်ညမ်းမှုစစ်ပွဲတွင် အနိုင်ရရှိပြီဖြစ်ကြောင်း ရလဒ်များက ညွှန်ပြထားသည်ဟု ဖော်ပြခဲ့သည်။

၂၀၁၃ ခုနှစ်မှ ၂၀၁၇ ခုနှစ်အထိ တရုတ်နိုင်ငံတစ်ဝန်း စောင့်ကြည့်လေ့လာမှု ၂၀၀ ကျော်ထံမှ နေ့စဉ်အချက်အလက်များအရ တရုတ်နိုင်ငံတစ်ဝန်းရှိ မြို့များတွင် ကျန်းမာရေးအတွက် အန္တရာယ်အရှိဆုံးဟုယူဆသည့် သေးငယ်သည့်အမှုန် PM 2.5 ပမာဏကို လေးနှစ်အတွင်း ပျမ်းမျှ ၃၂ ရာခိုင်နှုန်း လျှော့ချနိုင်ခဲ့သည်ကို လေ့လာမှုက တွေ့ရှိခဲ့သည်။

ထိန်းထားနိုင်မည်ဆိုပါက ယင်းကဲ့သို့လျှော့ချမှုသည် တရုတ်နိုင်ငံသားများ၏ ပျမ်းမျှလူ့သက်တမ်းကို ၂၀၁၃ ခုနှစ်နဲ့ နှိုင်းယှဉ်ပါက ၂ ဒသမ ၄ နှစ်အထိ မြင့်တက်လာစေနိုင်သည်။ PM 2.5 သည် နှလုံးရောဂါ၊ လေသင်တုန်းဖြတ်ခြင်း၊ အဆုတ်ရောဂါကဲ့သို့သော အဆုတ်နာမကျန်းမှုများနှင့် ကင်ဆာရောဂါဖြစ်ပွားမှုတွင် အဓိကကဏ္ဍတစ်ခုအဖြစ် ပါဝင်နိုင်သည်။

ယမန်နှစ်တွင် ရှီကာဂိုတက္ကသိုလ်ကဖြန့်ချိခဲ့သည့် နောက်ထပ်လေ့လာမှုတစ်ခု၌ တရုတ်နိုင်ငံမြောက်ပိုင်းတွင် လေထုညစ်ညမ်းမှုကြောင့် လူ့သက်တမ်းသည် နိုင်ငံတောင်ပိုင်းနှင့် နှိုင်းယှဉ်ပါက သုံးနှစ်အတွင်း လျော့ကျခဲ့သည်ကို လေ့လာတွေ့ရှိခဲ့သည်။

တရုတ်၏ မီးခိုးမြူပျံ့နှံ့မှုနှင့်ပတ်သက်ပြီး လူထုမကျေနပ်မှု မြင့်တက်လာသောကြောင့် တရုတ်၏ အာဏာရကွန်မြူနစ်ပါတီက လေထုသန့်စင်ရေးကို ဦးစားပေးတစ်ခုဖြစ် လုပ်ဆောင်ခဲ့သည်။ မြောက်ပိုင်းရှိ ပေကျင်း၊ ဟီပေ-တျန့်ကျင်းကဲ့သို့သော အဓိကဒေသများတွင် PM 2.5 ပမာဏကို လျှော့ချနိုင်ရန်အတွက် ၂၀၁၃ ခုနှစ်တွင် လေထုညစ်ညမ်းမှု တိုက်ဖျက်ရေးအစီအစဉ်တစ်ခုကို စတင်ခဲ့သည်။ ၂၀၁၄ ခုနှစ်တွင် တရုတ်ဝန်ကြီးချုပ် လီခယ်ကျင်းက လေထုညစ်ညမ်းမှု တိုက်ဖျက်ရေးစစ်ပွဲကို ကြေညာခဲ့သည်။

Ref: AFP