၂၀၁၇ ခုနှစ် နိုဝင်ဘာ ၁ ရက်က အူခီယာခရိုင်ရှိ ထာအင်ခါလီ ဒုက္ခသည်စခန်း$ ကယ်ဆယ်ရေးပစ္စည်းများနှင့် ပြန်လာသော ဒုက္ခသည်တစ်ဦး

မြန်မာနိုင်ငံမှ အာဏာပိုင်များသည် လူနည်းစုဖြစ်သော ဘင်္ဂါလီမွတ်စလင်များကို  မခံမရပ်နိုင်ဖြစ်ကာ နိုင်ငံမှ ထွက်ပြေးသွားစေရန်အတွက် ဘင်္ဂါလီမွတ်စလင် အမျိုးသား၊ အမျိုးသမီးနှင့် ကလေးများအား လုယက်ဓားပြတိုက်ခြင်း၊ ပြန်ပေးဆွဲခြင်းနှင့် တမင်အစာ ရေစာငတ်ပြတ်အောင် ပြုလုပ်ခြင်းတို့ လုပ်ဆောင်ခဲ့သည်ဟု အပြည်ပြည်ဆိုင်ရာလွတ်ငြိမ်းချမ်းသာခွင့်အဖွဲ့ (AI) က ပြောကြားခဲ့သည်။

ဖေဖော်ဝါရီ ၇ ရက်က ထုတ်ပြန်ချက်တွင် ဘင်္ဂါလီမွတ်စလင်များအပေါ် လူမျိုးစုလိုက် သုတ်သင်မှု ဆက်လက်လုပ်ဆောင်နေသည်ဟု အဆိုပါလူ့အခွင့်အရေးအဖွဲ့က စွပ်စွဲပြောကြားခဲ့သည်။ လွန်ခဲ့သည့် သြဂုတ်လ၌ ရခိုင်ပြည်နယ်မြောက်ပိုင်းတွင် အကြမ်းဖက်နှိမ်နင်းမှု စတင်ခဲ့ပြီးနောက် ဘင်္ဂါလီမွတ်စလင် ၆၉၀,၀၀၀ ခန့်သည် မြန်မာနိုင်ငံမှ ထွက်ပြေးသွားခဲ့ကြပြီးဖြစ်သည်။

လုံခြုံရေးတပ်ဖွဲ့ဝင်များသည် ဘင်္ဂလားဒေ့ရှ်နိုင်ငံသို့ထွက်ပြေးရန်ကြိုးစားသည့် ဘင်္ဂါလီမွတ်စလင်မိသားစုများကို စစ်ဆေးရေးဂိတ်များ၌ လုယက်ဓားပြတိုက်ခြင်း ပြုလုပ်ခဲ့ကြပြီး အမျိုးသမီးများနှင့် မိန်းကလေးများကို ၎င်းတို့ရွာများမှနေ၍ ပြန်ပေးဆွဲမှုများ ပြုလုပ်လျက် အခြားသူများကိုလည်း ကြောက်လန့်၍ ထွက်ပြေးအောင် လုပ်ဆောင်နေသည်ဟု AI က အစီရင်ခံခဲ့သည်။

သို့သော် ၎င်းတို့ ဘင်္ဂလားဒေ့ရှ်သို့ ဆက်လက်ထွက်ပြေးနေရသည့် အဓိကအကြောင်းရင်းမှာ အစာရေစာပြတ်လပ်မှုကြောင့်ဖြစ်သည်ဟု ဘင်္ဂါလီမွတ်စလင်များက ဆိုသည်။

“ကျွန်တော်တို့ စားစရာမရနိုင်ပါဘူး။ ဒါကြောင့် ကျွန်တော်တို့ ထွက်ပြေးရတာပါ” ဟု ရခိုင်ပြည်နယ် ဘူးသီးတောင်မြို့အနီးရှိ ရွာတစ်ရွာမှ အသက် ၃၀ အရွယ်ရှိ ဒယ်ဒါဘီဂမ်းက AI သို့ ပြောကြားခဲ့သည်။

မြန်မာလုံခြုံရေးတပ်များက ဘင်္ဂါလီမွတ်စလင်များအား လယ်ကွင်းများ၊ ဈေးများ နှင့် လူသားချင်းစာနာထောက်ထားမှုဆိုင်ရာ အကူအညီများ အသုံးပြု၍မရအောင် ပိတ်ဆို့ထားမှုကြောင့် နေရာအများအပြားတွင် စားနပ်ရိက္ခာပြတ်လပ်မှုများ ဖြစ်ပေါ်စေခဲ့သည်ဟု AI က ပြောကြားခဲ့သည်။

“မြန်မာအာဏာပိုင်တွေရဲ့ တမင်တကာ လုပ်ဆောင်မှုတွေက သူတို့ရွာတွေမှာ ဆက်ပြီး နေထိုင်ဖို့ ကြိုးစားတဲ့ ဘင်္ဂါလီမွတ်စလင် အများအပြားကို အစာငတ်ပြတ်စေပါတယ်” ဟု AI က ဆိုသည်။