ဒီဇင်ဘာ ၁၂ ရက်က စင်ကာပူတွင် လျှပ်စစ်ကား ငှားရမ်းဝေမျှရေး ဝန်ဆောင်မှု စတင်စဉ် ပြသထားသော BlueSG လျှပ်စစ်ကားများ(Photo: AFP)
စင်ကာပူနိုင်ငံတွင် လျှပ်စစ်ကား ငှားရမ်းဝေမျှရေး ဝန်ဆောင်မှုတစ်ခုကို ဒီဇင်ဘာ ၁၂ ရက်က စတင်လိုက်ကြောင်းသိရသည်။ ထိုနောက်ဆုံးပေါ် သယ်ယူပို့ဆောင်ရေးပုံစံသည် နေရာအလွန်ရှားပါးသည့် စင်ကာပူတွင် ကားပိတ်ဆို့မှုမဖြစ်စေရန်၊ လူတို့အနေဖြင့် ကားများပိုင်ဆိုင်စရာ မလိုစေရန် ရည်ရွယ်ကြောင်းသိရသည်။
ပြင်သစ်မှ Bollore အုပ်စု၏ လက်ခွဲလုပ်ငန်းဖြစ်သော BlueSG သည် ကားစီး ရေ ၈၀၊ အားသွင်းသည့်နေရာ ၃၂ ခုဖြင့် ၎င်းင်းတို့၏ ဝန်ဆောင်မှုကို စတင်လိုက်ခြင်း ဖြစ်ပြီး လာမည့်နှစ်များအတွင်း ယာဉ်စီးရေ ကို ၁၀ ဆ ကျော်အထိ တိုးမြှင့်သွားရန်စီစဉ် ထားသည်။ ယခုလျှပ်စစ်ကား ငှားရမ်းဝေမျှ ရေးဝန်ဆောင်မှုမှာ လူဦးရေ ၅ ဒသမ၆သန်း နေထိုင်သော ဘဏ္ဍာရေး ဗဟိုချက်စင်ကာပူ နိုင်ငံတွင် ယာဉ်ကြောပိတ်ဆို့မှုများ မဖြစ်ပေါ်စေရန် အစိုးရ၏ နောက်ဆုံးကြိုးပမ်းမှု ဖြစ်လာခဲ့သည်။ စင်ကာပူအစိုးရသည် ယခင်ကတည်းက ကားတစ်စီး ပျမ်းမျှတန်ဖိုးကို အမေရိကန် ဒေါ် လာ ၈၀၀၀၀ ကျော်ကျ သင့်စေရန် များပြားလှသည့်လိုင်စင်ကြေး သတ်မှတ်ခြင်း၊ လမ်းများပေါ်တွင်သွားနေသော ကားစီးရေကို ထပ်တိုးမလာစေရန်ကန့် သတ်ထားခြင်း၊ အများပြည်သူ သယ်ယူပို့ ဆောင်ရေးလုပ်ငန်းများတွင် အများအပြား ရင်းနှီးမြှုပ်နှံခြင်းအစရှိသည့် တင်းကျပ်သော စည်းကမ်းအများအပြားကိုလည်း ချမှတ်ထားပြီးဖြစ်သည်။
ယခုလျှပ်စစ်ကားစီမံကိန်းမှာလည်း အစိုးရနှင့် ပူးပေါင်းထားခြင်းဖြစ်ပြီး ကားကုမ္ပဏီက ကမ္ဘာပေါ်၌ ပါရီပြီးလျှင် ဒုတိယအကြီးဆုံးကားဝေမျှ ငှားရမ်းရေးဝန်ဆောင်မှုကို စင်ကာပူတွင် ဆောင်ရွက်နိုင်ရန် မျှော်မှန်းထားကြောင်း သိရသည်။ BlueSG ကုမ္ပဏီသည် ၎င်းတို့၏ကားစီးရေကို ယခုနှစ်ကုန်တွင် ၁၀၀ အထိ တိုးမြှင့်ရန်စီစဉ်ထားပြီး ၂၀၂၀ ပြည်နှစ်တွင်မူ ကားစီးရေ ၁၀၀၀ နှင့် အားသွင်းသည့်နေရာကို ၂၀၀၀ အထိရှိလာစေရန် တိုးမြှင့်ပေးသွားမည်ဖြစ်သည်။
ထိုင်ခုံလေးခုံနှင့် တံခါးနှစ်ပေါက်ပါသော Bluecar များသည် အထူးတည်ဆောက်ထားခြင်းဖြစ်ပြီး စမတ်ကားတစ်စင်းထက် အနည်းငယ်ပိုကြီးကာ အီတလီရထားလုံး တည်ဆောက်ရေးလုပ်ငန်း Pininfarina က ဒီဇိုင်းဆွဲထားခြင်းဖြစ်သည်။
အသုံးပြုသူများသည် လျှပ်စစ်ကားတစ်စီးအား အွန်လိုင်းပေါ်မှသော်လည်းကောင်း မိုဘိုင်း App တစ်ခုဖြင့်သော်လည်းကောင်း ကြိုတင်ခေါ်ယူနိုင်မည်ဖြစ်သည်။ ငှားရမ်းမည့်ကားကို သွားမည့်အကွာအဝေးနှင့် မဟုတ်ဘဲ ငှားရမ်းမည့်အချိန်ကို တွက်ပြီး အားသွင်းပေးထားမည်ဖြစ်သည်။ ထို့အပြင် လစဉ်အဖွဲ့ဝင်ကြေးဖြစ်သော စင်ကာပူ ၁၅ ဒေါ်လာ (အမေရိကန် ၁၁ ဒေါ်လာ) သွင်းနိုင်သည့် နည်းလမ်းလည်း ရှိသေးသည်။
စင်ကာပူသည် လူဦးရေထူထပ်ပြီး ကောင်းမွန်သော ကားလမ်းကွန်ရက်ရှိနေသဖြင့် အရှေ့တောင်အာရှဒေသသို့ ချင်းနင်းဝင်ရောက်လိုသည့် ယခုကားဝန်ဆောင်မှုလုပ်ငန်းကို စတင်ရန် စံပြနေရာတစ်ခုဖြစ်နေသည်ဟု သိရသည်။
