ဇန်နဝါရီ ၁၉ ရက်က ပြုလုပ်သည့် ပြည်ထောင်စုလွှတ်တော် အစည်းအဝေး မစတင်မီ တက်ရောက် လာသူများကို တွေ့ရစဉ် (ဓာတ်ပုံ-စည်သူ)
၂၀၁၆-၂၀၁၇ ဘဏ္ဍာနှစ်အတွင်း ပြည်ထောင်စုအစိုးရအဖွဲ့က ပြည်တွင်း၊ ပြည်ပချေးငွေကျပ် ၇၅၉၃ ဒသမ ၀ ဘီလျံ ချေးယူခဲ့ပြီး ပြည်ထောင်စုဘဏ္ဍာငွေ အရအသုံးဆိုင်ရာ ဥပဒေကို ပြင်ဆင်သည့် ဥပဒေအရ ချေးယူခွင့် ပြုထားသည့် ကျပ်သန်းပေါင်း သိန်း ၅၀ (ကျပ် ၅၀၀၀ ဒသမ ၀၀ ဘီလျံ) ထက် ကျပ် ၂၅၉၃ ဒသမ ၀ ဘီလျံ ပိုမိုချေးယူခဲ့ကြောင်း ပြည်သူ့ငွေစာရင်း ပူးပေါင်းကော်မတီက သုံးသပ်ခဲ့သည်။
ဇန်နဝါရီ ၁၉ ရက်က ပြုလုပ်သည့် ပြည်ထောင်စုလွှတ်တော် အစည်းအဝေးတွင် ပြည်သူ့ငွေစာရင်း ပူးပေါင်းကော်မတီက ၂၀၁၆-၂၀၁၇ ဘဏ္ဍာနှစ်အစိုးရ၏ ကြွေးမြီဆိုင်ရာ နှစ်ပတ်လည် အစီရင်ခံစာနှင့် ပတ်သက်ပြီး လေ့လာတွေ့ရှိချက်နှင့် သဘောထားမှတ်ချက် အစီရင်ခံစာ တင်သွင်းခဲ့သည်။
အဆိုပါ အစီရင်ခံစာတွင်၂၀၁၆-၂၀၁၇ ဘဏ္ဍာနှစ်အတွင်း ပြည်ထောင်စု အစိုးရအဖွဲ့က ရယူခဲ့သော ပြည်တွင်း၊ ပြည်ပချေးငွေ နှစ်ရပ်ပေါင်းမှာ ကျပ် ၇၅၉၃ ဒသမ ၀ ဘီလျံဖြစ်ရာ ၂၀၁၆ ခုနှစ် ပြည်ထောင်စု၏ ဘဏ္ဍာငွေ အရအသုံးဆိုင်ရာ ဥပဒေကို ပြင်ဆင်သည့် ဥပဒေအရ ချေးယူခွင့်ပြုထားသည့် ကျပ်သန်းပေါင်းသိန်းငါးဆယ် (ကျပ် ၅၀၀၀ ဒသမ ၀၀ ဘီလျံ) ထက် ကျပ် ၂၅၉၃ ဒသမ ၀ ဘီလျံ ပိုမိုချေးယူခဲ့သည်ကို တွေ့ရှိရကြောင်း ဖော်ပြထားသည်။
ပြည်တွင်းချေးငွေ အနေဖြင့် အစိုးရငွေတိုက်စာချုပ်များ ရောင်းချခြင်း ကျပ် ၁၂၀၁ ဒသမ ၆ ဘီလျံ၊ အစိုးရငွေတိုက်လက်မှတ် လေလံတင်ရောင်းချခြင်း ကျပ် ၃၆၂၂ ဒသမ ၇ ဘီလျံ၊ အစိုးရငွေတိုက်လက်မှတ် ဗဟိုဘဏ် သို့ရောင်းချခြင်း ကျပ် ၂၃၁၀ ဒသမ ၃ ဘီ လျံဖြစ်ပြီး ပြည်ပချေးငွေ ကျပ် ၄၅၈ ဒသမ ၄ ဘီလျံ၊ စုစုပေါင်း ကျပ် ၇၅၉၃ ဒသမ ၀ ဘီ လျံဖြစ်ကြောင်း အစီရင်ခံစာတင်သွင်းခဲ့သည်။
ထို့ပြင် အလားတူကာလအတွင်း ပြည်ပ ချေးငွေ အမေရိကန်ဒေါ်လာ ၆၁၂ ဒသမ ၉၈၃ သန်းကို ပြန်လည်ပေးဆပ်နိုင်ခဲ့ရာတွင် တရုတ်နိုင်ငံသို့ အမေရိကန်ဒေါ်လာ ၄၂၆ ဒသမ ၆၃၉ သန်းဖြစ်ကြောင်း၊ ဝန်ကြီးဌာနအလိုက် ပြန်လည်ပေးဆပ်မှုတွင် လျှပ်စစ်နှင့် စွမ်းအင်ဝန်ကြီးဌာနမှ အမေရိကန်ဒေါ်လာ ၂၈၆ ဒသမ ၆၀၆ သန်း၊ စက်မှုဝန်ကြီးဌာနမှ အမေရိကန်ဒေါ်လာ ၁၀၈ ဒသမ ၃၇၂ သန်း၊ စီမံကိန်းနှင့် ဘဏ္ဍာရေး ဝန်ကြီးဌာနမှ အမေရိကန်ဒေါ်လာ ၈၂ ဒသမ ၇၃၈ သန်းဖြင့် အများဆုံး ပေးဆပ်ခဲ့ကြောင်း ပြည်သူ့ငွေစာရင်း ပူးပေါင်းကော်မတီက အစီရင်ခံစာ တင်သွင်းခဲ့သည်။
၂၀၁၆-၂၀၁၇ ဘဏ္ဍာနှစ်အတွင်း ရယူခဲ့သည့် ပြည်တွင်းပြည်ပ ချေးငွေများအနက် ပြည်တွင်းချေးငွေဖြစ်သည့် အစိုးရငွေတိုက် စာချုပ်များ ရောင်းချမှုနှင့် အစိုးရငွေတိုက်လက်မှတ် လေလံတင် ရောင်းချမှုတို့ကို တိုးတက်ဆောင်ရွက် နိုင်ခဲ့ကြောင်း၊ မြန်မာနိုင်ငံတော် ဗဟိုဘဏ်သို့ အစိုးရငွေတိုက်လက်မှတ် ရောင်းချမှုကို လျှော့ချဆောင်ရွက် နိုင်ခဲ့ကြောင်း၊ ၂၀၁၆-၂၀၁၇ ဘဏ္ဍာနှစ်အတွင်း ရယူခဲ့သော ပြည်ပချေးငွေ အားလုံးသည် သက်သာသော ချေးငွေများဖြစ်ကြောင်း အစီရင်ခံစာတွင် ဖော်ပြထားသည်။
၂၀၁၆-၂၀၁၇ ဘဏ္ဍာနှစ်အတွင်း ပြည်ထောင်စု အစိုးရအဖွဲ့က ရယူခဲ့သော ပြည်တွင်း၊ ပြည်ပချေးငွေ နှစ်ရပ်ပေါင်းမှာ ကျပ် ၇၅၉၃ ဒသမ ၀ ဘီလျံဖြစ်ရာ ၂၀၁၆ ခုနှစ် ပြည်ထောင်စု၏ ဘဏ္ဍာငွေ အရအသုံးဆိုင်ရာ ဥပဒေကို ပြင်ဆင်သည့် ဥပဒေအရ ချေးယူခွင့်ပြုထားသည့် ကျပ်သန်းပေါင်း သိန်းငါးဆယ် (ကျပ် ၅၀၀၀ ဒသမ ၀၀ ဘီလျံ) ထက် ကျပ် ၂၅၉၃ ဒသမ ၀ ဘီလျံ ကျော်လွန်ခဲ့သော်လည်း ပြည်တွင်းချေးယူငွေ ပြန်လည် ပေးဆပ်မှုကို ကျပ် ၄၈၃၉ ဒသမ ၁ ဘီလျံအထိ ဆောင်ရွက်နိုင်ခဲ့သည့်အတွက် အသားတင်ချေးငွေပမာဏကို လျှော့ချနိုင်ခဲ့ကြောင်း ပြည်သူ့ငွေစာရင်း ပူးပေါင်းကော်မတီက အစီရင်ခံစာ တင်သွင်းခဲ့သည်။
