တိုင်ပတ်သည့် မေးခွန်းနှင့်အဖြေမျိုးကို လွှတ်တော်အနေဖြင့်မလိုလားကြောင်း ပြည်သူ့လွှတ်တော်ဥက္ကဋ္ဌ ဦးဝင်းမြင့်က ပြောကြားသည်။
နေပြည်တော်၌ ဇန်နဝါရီ ၂၂ ရက်ကကျင်းပသည့် ပြည်သူ့လွှတ်တော်အစည်းအဝေး၌ လေးမျက်နှာမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးဇော်မင်းသိန်း၏ မြို့ဝင်ကြေး ကောက်ယူနေမှုများနှင့်ပတ်သက်၍ မေးမြန်းမှုအပေါ် နေပြည်တော်ကောင်စီဝင် ဦးအောင်မြင်ထွန်းက ပြန်လည်ဖြေကြားမှုအပြီးတွင် ဦးဝင်းမြင့်က အထက်ပါကဲ့သို့ ပြောကြားခဲ့ခြင်းဖြစ်သည်။
လွှတ်တော်၌ ကိုယ်စားလှယ်များအနေဖြင့် ဒေသအခြေအနေနှင့်ပတ်သက်၍ မေးခွန်းမေးမြန်းရာတွင် ထိထိမိမိမေးရန် လိုအပ်သလို လာရောက်ဖြေကြားသည့် အဖွဲ့အစည်းများကလည်း မေးခွန်းကို တိတိကျကျဖြေကြားရန် လိုအပ်ကြောင်း၊ ပြည်နယ်နှင့်တိုင်းများက မြို့ဝင်ကြေးကောက်ယူမှုကို ပယ်ဖျက်ပေးရန် အစီအစဉ်မရှိဘူးဆိုပါက ဘာကြောင့်မရှိလဲဆိုသည်ကို အကျိုးအကြောင်းဖြင့် ဖြေကြားရန်လိုကြောင်း၊ ပြည်နယ်နှင့်တိုင်းများက ထိုကဲ့သို့ဖြေပါသည်ဟုဆိုပြီး လွှတ်တော်တွင် မရေရာမသေချာဘဲဖြင့် လာဖြေရန်မသင့်ကြောင်း ပြည်သူ့လွှတ်တော်ဥက္ကဋ္ဌ ဦးဝင်းမြင့်က ပြောကြားသည်။
“အဲဒီလိုအဖြေမျိုးရတယ်ဆိုရင် ကျွန်တော်တို့ကို ဖြေကြားရန်အသင့်မဖြစ်သေးဘူးလို့ ပြောထားရင်လည်း ဒီမေးခွန်းပေါ်မှာမဟုတ်ဘူး။ ဖြေကြားရန်အသင့်ဖြစ်ပြီလို့ပြောလို့ ကျွန်တော်တို့က ဒီမေးခွန်းကိုဖော်ရတာ။ ဒါကြောင့်မို့လို့ ဖြေကြားရန်အသင့်ဖြစ်တယ်ဆိုရင် လာဖြေတဲ့အခါမှာ ထိရောက်မှုရှိအောင်၊ သက်ရောက်မှုရှိအောင် ပြည်နယ်၊ တိုင်းတွေက ပို့တဲ့အချက်အလက်တွေပေါ်မှာ နောက်ဆုံး ပြည်ထောင်စုအစိုးရကို ပို့ဖို့လိုရင်လည်းပို့။ ကိုယ့်ဟာကိုယ်ပို့ရမှာ။ လွှတ်တော်က ပို့ရမှာမဟုတ်ဘူး။ ကိုယ့်ဟာကိုယ်ပို့ပြီးတော့ အဲဒီကနေဖြေကြားတဲ့ သဘောထားကိုရပြီးမှ ကျွန်တော်တို့ကို ဖြေဖို့ကောင်းတယ်။ လွှတ်တော်ကိုး။ ဒီလိုသာဖြေမယ်ဆိုရင် ကျွန်တော်တို့ ဗန်းစကားပြောသလို တိုင်ပတ်နေလိမ့်မယ်။ မေးခွန်းနဲ့အဖြေတွေက။ ကျွန်တော်တို့တိုင်ပတ်တဲ့ မေးခွန်းနဲ့အဖြေမျိုးတော့ ကျွန်တော်တို့လွှတ်တော်မှာ ကျွန်တော်တို့အနေနဲ့ မလိုလားပါဘူး။ ဒါပွင့်ပွင့်လင်းလင်း ပြောပါမယ်။ တိကျတဲ့အဖြေမျိုးလိုချင်တယ်” ဟု ဦးဝင်းမြင့်က ပြောကြားသည်။
ထို့ပြင် လွှတ်တော်သို့ မေးခွန်းများနှင့်ပတ်သက်၍ လာရောက်ဖြေကြားသည့် အဖွဲ့အစည်းများအနေဖြင့် ပြည့်ပြည့်စုံစုံဖြင့် လွှတ်တော်တွင် လူကြားကောင်းအောင် ဖြစ်စေချင်ကြောင်း၊ အထူးအလေးအနက်ထားစေလိုကြောင်း ဦးဝင်းမြင့်က ဆက်လက်ပြောကြားသည်။
ဧရာဝတီတိုင်း လေးမျက်နှာမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးဇော်မင်းသိန်းက “မြို့ဝင်ကြေးကောက်ယူနေမှုများအား ပိုမိုသင့်လျော်ကောင်းမွန်သော နည်းလမ်းများဖြင့် စီမံဆောင်ရွက်ပေးရန် အစီအစဉ် ရှိ မရှိ” ကို မေးမြန်းခဲ့ခြင်းဖြစ်သည်။
ကယားပြည်နယ်တွင် ၂၀၁၇ ခုနှစ် ဧပြီမှစ၍ မြို့ဝင်ကြေးများ ရုပ်သိမ်းဖြစ်ကြောင်း၊ ကချင်ပြည်နယ်တွင်လည်း ၂၀၁၇ ခုနှစ် ဇူလိုင်က ဖျက်သိမ်းပြီးဖြစ်ကြောင်းနှင့် တနင်္သာရီနှင့် ရခိုင်ပြည်နယ်တွင်၂၀၁၈ ခုနှစ် ဧပြီတွင် ဖျက်သိမ်းမည်ဖြစ်ကြောင်းသိရပြီး ထို့ကြောင့် တစ်နိုင်ငံလုံးအတိုင်းအတာဖြင့် တစ်ပြေးညီဖျက်သိမ်းပေးပြီး ပိုမိုသင့်လျော်ကောင်းမွန်သည့် နည်းလမ်းများဖြင့် ပေါင်းစပ်ညွှန်ကြားသွားရန် ဦးဇော်မင်းသိန်းက တင်ပြသည်။
“တိုင်းဒေသကြီး၊ ပြည်နယ်များရဲ့ တင်ပြချက်များအရ တင်ပြရမယ်ဆိုရင် အဓိကကျတဲ့ အခွန်ငွေကောက်ခံရတဲ့ကိစ္စဟာ ဥပမာ ရန်ကုန်တိုင်းကတင်ပြတာဆိုလို့ရှိရင် ဝင်ငွေလျာထားချက်က ၆ ဒသမ ၅၅ ဘီလျံရှိပါတယ်။ မြို့ဝင်ကြေးကောက်ခံခြင်းမှ ရငွေဟာ ၁ ဒသမ ၃၃ ဘီလျံဖြစ်တဲ့အတွက် ဝင်ငွေရဲ့ ရာခိုင်နှုန်း ၂၀၊ ၃၀ ဖြစ်ပါတယ်။ တိုင်းဒေသကြီးကိုလည်း ဘဏ္ဍာအခွန်ငွေ ပေးသွင်းရပါတယ်။ အဓိကကျတဲ့လမ်းမကြီးများ သန့်ရှင်းရေး၊ နေ့စဉ်ဆောင်ရွက်ပေးရတဲ့ အသုံးစရိတ်၊ လမ်းမီးထွန်းခြင်း၊ ရေစီးရေလာကောင်းမွန်အောင် ပြုပြင်ခြင်း၊ အသစ်ဖောက်လုပ်ခြင်းများ၊ လမ်းအသစ်ဖောက်လုပ်ခြင်းများ လုပ်ရပါတယ်။ အဲဒီတော့ ဥပဒေနဲ့အညီ ကောက်ခံတာဖြစ်တဲ့အတွက် အခုနတုန်းက ကိုယ်စားလှယ်ကြီးတင်ပြသလိုပါပဲ။ ကျန်တဲ့မြို့နယ်တွေကတော့ တိုင်းဒေသကြီးနဲ့ ပြည်နယ်အစိုးရများရဲ့အဖွဲ့ဝင်များက ဖြေကြားကြတာကတော့ မြို့ဝင်ဘီးကောက်လိုင်စင်များကို ဖျက်သိမ်းပေးဖို့ရာ အစီအစဉ်မရှိသေးပါကြောင်း ဖြေကြားပါတယ်” ဟု နေပြည်တော်ကောင်စီဝင် ဦးအောင်မြင်ထွန်းက လွှတ်တော်သို့ ဖြေကြားသည်။
ပြည်သူများ အခက်အခဲမရှိစေရန် အဆင်ပြေမည့်နည်းလမ်းများဖြင့် ဆောင်ရွက်ပေးရန်နှင့် ဥပဒေနှင့်မညီသည့်ဂိတ်များကို လာမည့်ဘဏ္ဍာနှစ်မှစ၍ တိတိကျကျဖျက်သိမ်းပေးရန် အစီအစဉ် ရှိ မရှိ ဆက်စပ်မေးခွန်းကို ဦးဇော်မင်းသိန်းက မေးမြန်းသည်။
အဆိုပါ ဆက်စပ်မေးခွန်းအား နေပြည်တော်ကောင်စီဝင် ဦးအောင်မြင်ထွန်းက “ကျွန်တော့်အနေဖြင့် ကိုယ်စားဖြေကြားရတာဖြစ်တဲ့အတွက် အစိုးရအဖွဲ့ရုံးကိုတော့ ၂၀၀၈ ဖွဲ့စည်းပုံအခြေခံဥပဒေနဲ့အညီ ပြည်နယ်၊ တိုင်းဒေသကြီးများက စီမံခန့်ခွဲပိုင်ခွင့်ရှိတဲ့လမ်းများ၊ တံတားများဆိုတဲ့ကိစ္စကိုတော့ ကျွန်တော်တို့ အကြံပြုတင်ပြသွားနိုင်မှာပဲဖြစ်ပါတယ်။ ကျန်တဲ့ကိစ္စတွေကတော့ ကျွန်တော်တို့က ဖြေကြားလို့မရဘဲနဲ့ ပြည်ထောင်စုအစိုးရကိုပဲ အကြံပြုတင်နိုင်မှာဖြစ်ပါတယ်။ လွှတ်တော်ရဲ့သဘောထားကို အကြံပြုတင်ပြနိုင်မှာဖြစ်ပါကြောင်း လေးစားရှင်းလင်း ဖြေကြားအပ်ပါတယ်” ဟုဖြေကြားသည်။
