ကျောက်မဲမြို့အနီးတဝိုက်တွင် တိုက်ပွဲများဖြစ်ပွားနေပြီး လက်နက်ကြီးထိမှန်မှုကြောင့် ကျောက်မဲမြို့ပေါ်တွင် နေထိုင်သူ နှစ်ဦး သေဆုံးခဲ့သည်ဟု ဒေသခံအချို့၏ ပြောကြားချက်အရ သိရသည်။
ဇွန် ၂၅ ရက် နံနက်ပိုင်းမှ စတင်ကာ ကျောက်မဲမြို့အနီးတဝိုက်တွင် လက်နက်ကြီး၊ လက်နက်ငယ် ပစ်ခတ်သံများ ကြားခဲ့ရပြီးနောက် ကျောက်မဲမြို့ပေါ်တွင် သွားလာနေသည့် ဒေသခံများ မရှိသလောက် ဖြစ်သွားကြောင်း သိရသည်။
" ဒီနေ့မနက်ပိုင်းမှာ သေနတ်သံတွေ ကြားနေရတယ်။ လက်နက်ကြီး လက်နက်ငယ်သံတွေကြားပြီးတော့ ကျောက်မဲမြို့ပေါ်မှာတော့ လူအသွားအလာ တော်တော်လေးကို နည်းသွားတယ်။ ဆိုင်တွေလည်း အကုန်ပိတ်ထားတယ်။" ဟု ကျောက်မဲ မြို့ ဒေသခံတစ်ဦးက ပြောကြားသည်။
ထို့ပြင် ဇွန် ၂၅ ရက် နံနက် ၈ နာရီခန့်တွင် ကျောက်မဲမြို့အတွင်းရှိ အခွန်လွတ်စျေးရှေ့သို့ လက်နက်ကြီးကျည် ကျရောက်ပေါက်ကွဲခဲ့ပြီး အမျိုးသားတစ်ဦးနှင့် အမျိုးသမီးတစ်ဦး သေဆုံးခဲ့ကာ ၁၄ နှစ်အရွယ် မိန်းကလေးငယ်တစ်ဦး လက်နက်ကြီးကျည်စ ထိမှန်ခဲ့သည်ဟု ဒေသခံလူမှုကူညီရေးအသင်းအချို့က လူမှုကွန်ရက်စာမျက်နှာအချို့တွင် ဖော်ပြထားချက်အရ သိရသည်။
ထို့ပြင် ပြင်ဦးလွင်မှ လားရှိုးသို့လာရောက်နေသည့် မော်တော်ယာဉ်များမှာလည်း လမ်းတွင် ပစ်ခတ်မှုများ ဖြစ်ပွားနေသဖြင့် ပိတ်မိနေခြင်းများလည်း ရှိနေသည်ဟု ဒေသခံအချို့က ပြောကြားသည်။
" အသိတယောက်က ပြင်ဦးလွင်ကနေ လားရှိုးကိုလာတာ။ ပြင်ဦးလွင်ကနေ တက်လာတာ စဉ့်အင်ဖောင်ဆိပ်ကို မနက် ၉ နာရီလောက်အမှီလာတာ။ မနက် ၅ နာရီလောက်က ပြင်ဦးလွင်ကနေထွက်လာတာ ဆမ်မဆယ်နဲ့ နောင်ချိုကြားထဲရောက်တော့ ပစ်ခတ်သံတွေကြားရတော့ သူလည်းရှေ့ဆက်မတက်ရဲတော့ဘူး။ နောက်ပြန်ဆုတ်ဖို့ကိုတောင် တော်တော်ခက်တယ်။ နောက်တခုက ကျောက်မဲနဲ့ ဂုတ်တွင်းကြား။ ကျောက်မဲ စခန်းသာနဲ့ ဂုတ်တွင်းကြားပေါ့။ အဲ့ဒီနားလေးမှာလည်း ပစ်ခတ်သံတွေကြားတယ်" ဟု လားရှိုးဒေသခံတစ်ဦးက ပြောကြားသည်။
ထို့ပြင် လားရှိုးမြို့နှင့် သီပေါမြို့အကြားရှိ ဆွတ်လမ်းရွာတံတားမှာလည်း ဖျက်ဆီးခံထားရပြီး ကျောက်မဲနှင့် သီပေါမြို့အကြားရှိ ကျင်သီတံတားကိုလည်း ပိတ်ထားသည်ဟု ဒေသခံများထံမှ သိရသည်။
" ဆွတ်လမ်းရွာတံတားက ရွာတံတားလို့ ပြောရမှာပေါ့။ ပေ ၂၀ လောက်ရှိတယ်။ ဒါပေမဲ့ သူက ပြည်ထောင်စုလမ်းမကြီးပေါ်ကတံတား" ဟု ဒေသခံတစ်ဦးက ပြောကြားသည်။
" အခုက လားရှိုး- မန္တလေး၊ လားရှိုး- ရန်ကုန်စသဖြင့် သွားမယ်ဆိုရင် အခုဟာက အရင်တုန်းက သွားတဲ့ လားရှိုး- မိုင်းရယ်- နမ့်လန်- ရပ်စောက်လမ်းဆိုရင်လည်း အခုချိန်က မိုးတွင်းဖြစ်နေတော့ တော်တော်အဆင်မပြေဘူး။ အခုသွားမယ်ဆိုရင် လားရှိုး- မိုင်းရယ်- ကျေးသီး ရှမ်းပြည်တောင်ပိုင်းဘက်ကနေ သွားရမယ့် သဘောဖြစ်နေတယ်" ဟု လားရှိုးဒေသခံတစ်ဦးက ပြောကြားသည်။
