ပြီးခဲ့သည့်တစ်ပတ်က ရုရှားအကျဉ်းထောင်အတွင်း သေဆုံးသွားသည့် အတိုက်အခံနိုင်ငံရေးသမား အလက်ဆီနာဗာနီ၏ညီ အိုလက်ဂ်နာဗာနီကို ရုရှားပြည်ထဲရေးဝန်ကြီးဌာနက ဖေဖော်ဝါရီ ၂၀ ရက်တွင် အလိုရှိစာရင်း၌ ထပ်ထည့်လိုက်သည်။
အိုလက်ဂ်နာဗာနီသည် ၂၀၂၂ ခုနှစ် ၊ ဇန်နဝါရီကလည်း ယခုကဲ့သို့ပင် စာရင်းသွင်းခံထားရသည်။
လက်ရှိ သူ မည်သည့်နိုင်ငံတွင်ရောက်နေသည်ကို မည်သူမှမသိကြပေ။ကိုဗစ်စည်းမျဉ်းများကို ချိုးဖောက်မှုဖြင့် အိုလက်ဂ်နာဗာနီကို ၂၀၂၁ ခုနှစ်၊ ဩဂုတ်တွင် မော်စကိုတရားရုံးက ဆိုင်းငံ့ထောင်ဒဏ်တစ်နှစ် ချမှတ်ခဲ့သည်။
သို့သော်ဆိုင်းငံ့ထောင်ဒဏ်ကို လက်တွေ့ကျခံစေရန် အကျဉ်းထောင်အရာရှိများက တောင်းဆိုသဖြင့် ၂၀၂၂ ခုနှစ် ၊ ဖေဖော်ဝါရီတွင် မော်စကိုတရားရုံးက သဘောတူလိုက်သည်။ထိုအချိန် အိုလက်ဂ်နာဗာနီက ရုရှားမှ ထွက်ပြေးသွားပြီဖြစ်သည်။
၂၀၁၄ ခုနှစ်တွင် အိုလက်ဂ်နှင့် အလက်ဆီနာဗာနီတို့ ညီအစ်ကိုနှစ်ဦးကို ရုရှားကုမ္ပဏီနှစ်ခုမှ ဒေါ်လာငါးသိန်းခန့် ခိုးမှု၊ ငွေမည်းခဝါချမှုတို့ဖြင့် ထောင်ဒဏ်သုံးနှစ်ခွဲချမှတ်လိုက်သည်။သို့သော်အလက်ဆီ၏ထောင်ဒဏ်က ဆိုင်းငံ့ခံရသည်။၂၀၁၈ ခုနှစ်၊ ဇွန်တွင် အိုလက်ဂ်နာဗာနီ ထောင်မှလွတ်လာသည်။
ရုရှားအစိုးရဝေဖန်ရေးသမား အလက်ဆီနာဗာနီကမူ အာတိတ်ဒေသရှိ Polar Wolf အကျဉ်းထောင်တွင် ပြီးခဲ့သည့်တစ်ပတ်က သေဆုံးသွားပြီဖြစ်သည်။သူသည် ၎င်းအကျဉ်းထောင်သို့ မနှစ်က ဒီဇင်ဘာကတည်းက ရွှေ့ပြောင်းခံထားရသည်။