ပေါက်မြို့နယ် သစ်ချိုကုန်းကျေးရွာရှိ အထကကျောင်းခွဲ၌ ဆရာကန်တော့ပွဲ ပြုလုပ်နေစဉ် Drop Bomb ကျရောက်ပေါက်ကွဲမှု ဖြစ်ပွားခဲ့ကြောင်း မြန်မာနိုင်ငံရဲတပ်ဖွဲ့၏ သတင်းထုတ်ပြန်ချက်အရ သိရသည်။
ဇန်နဝါရီ ၂၆ ရက် မွန်းလွဲ ၁ နာရီခွဲတွင် မကွေးတိုင်းဒေသကြီး ပေါက်မြို့နယ် သစ်ချို ကုန်းကျေးရွာရှိ အခြေခံပညာအထက်တန်းကျောင်းခွဲ၌ ကျောင်းဆရာ ဆရာမ ၁၃ ဦးနှင့် ကျောင်းသား ကျောင်းသူ ၂၆၁ ဦးတို့က ဆရာကန်တော့ပွဲအခမ်းအနားပြုလုပ်နေစဉ် PDF အဖွဲ့အင်အား (စိစစ်ဆဲ) က အဆိုပါကျောင်း၏ အနောက်မြောက်ဘက် နှစ်မိုင်ခန့်အကွာရှိ ကျောက်ကာကျေးရွာဘက်မှနေ၍ Drone ယာဉ်အသုံးပြု၍ Drop Bomb တစ်လုံးအား ပစ်ချတိုက်ခိုက်ခဲ့သဖြင့် ကျောင်းအုပ်ကြီးရုံးခန်းရှေ့ ခြောက်ပေခန့်အကွာ မြေကွက်လပ်သို့ ကျရောက်ပေါက်ကွဲခဲ့ကြောင်း၊ ပေါက်ကွဲမှုကြောင့် ရုံးခန်းပြတင်းပေါက်မှန် သုံးချပ်ပေါက် ကွဲစထိမှန်ပျက်စီးခဲ့ကာ လူထိခိုက်ဒဏ်ရာရရှိခြင်းမရှိကြောင်း သိရသည်။
အဆိုပါဖြစ်စဉ်နှင့်ပတ်သက်ပြီး Drone ယာဉ်အသုံးပြု၍ Drop Bomb များ ပစ်ချတိုက်ခိုက်ခဲ့သူများအား အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သိရသည်။
