နယူးဇီလန်နိုင်ငံမှာကျင်းပလျက်ရှိတဲ့ အကြိမ်(၂၀)မြောက် ဖီဖာယူ-၂၀ကမ္ဘာ့ဖလားပြိုင်ပွဲသတင်းများကို အချိန်နဲ့တပြေးညီ တင်ဆက်နိုင်ရန်အတွက် နယူးဇီလန်နိုင်ငံသို့ရောက်ရှိနေသော Premier Eleven Sports Journals အယ်ဒီတာချုပ်ဖြစ်သူ ကိုမြတ်ထွဋ်ဝင်းရဲ့ပေးပို့မှုများကို ပရိသတ်များသိရှိစေရန် ဖော်ပြလိုက်ပါတယ်။ နယူးဇီလန်နိုင်ငံအကြောင်း သတင်းအယ်ဒီတာတစ်ဦးရဲ့ အတွေ့အကြုံ၊ ဖီဖာယူ-၂၀ကမ္ဘာ့ဖလားပြိုင်ပွဲနဲ့ ပတ်သက်တဲ့ သတင်းဆောင်းပါး၊ မှတ်တမ်းဓာတ်ပုံတွေကို First Eleven  နဲ့ Premier Eleven  အားကစားဂျာနယ်များမှာ ချိတ်ဆက်ဖော်ပြပေးသွားမှာ ဖြစ်ပါတယ် ...
 
ကိုဇင်မင်းမောင်ရေ ...
 
ဖီဖာယူ-၂၀ကမ္ဘာ့ဖလားပြိုင်ပွဲကျင်းပရာ နယူးဇီလန်နိုင်ငံမှာ ဆက်ရှိနေရပေမယ့် ကျွန်တော့်ရဲ့စိတ်အာရုံတွေက စင်ကာပူမြေက မြန်မာပရိသတ်တွေနဲ့ မြန်မာနိုင်ငံအနှံ့အပြားက မြန်မာဘောလုံးချစ်ပရိသတ်တွေဆီမှာ တဝဲလည်လည် ရှိနေတယ်လို့ပြောရမလိုပါပဲဗျာ။ နယူးဇီလန်ရောက်တုန်း ဖီဖာယူ-၂၀ပြိုင်ပွဲကို ဗိုလ်လုပွဲအထိ ကြည့်လိုက်ဦးမယ်လို့ ဆုံးဖြတ်ပြီး ငှားနေတဲ့အခန်းကို ရက်ထပ်တိုး၊ လေယာဉ်လက်မှတ်ကို ရက်ရွှေ့စီစဉ်ပြီးကာမှ ဆီးဂိမ်းစ်ပြိုင်ပွဲမှာ မြန်မာယူ-၂၃ အသင်းက ဗိုလ်လုပွဲထိရောက်၊ မြန်မာတစ်နိုင်ငံလုံး က ပရိသတ်တွေ တစ်ဝုန်းဝုန်းနဲ့ အားပေးနေကြတာတွေကို Facebook  ကနေတစ်ဆင့် တွေ့မြင်နေရတော့ မြန်မာနိုင်ငံကိုပဲ ပြန်ပြေးရမလိုလို၊ စင်ကာပူကိုသွားပြီး ဗိုလ်လုပွဲပြေးကြည့်ရမလိုလို ထိုင်မရ ထမရဖြစ်နေတာ အမှန်ပါပဲဗျာ။
 
နည်းပညာဖွံ့ဖြိုးတိုးတက်လာတော့ ဘောလုံးပွဲတွေကို  Youtube က တိုက်ရိုက်ကြည့်ရှုလို့ရတာ တော်တော်အဆင်ပြေတယ်ဗျ။ မြန်မာယူ- ၂၀အသင်းရဲ့ပွဲစဉ်တွေကို ဘောလုံးကွင်းထဲ ကိုယ်တိုင်ကိုယ်ကျ လိုက်အားပေးပြီး မြန်မာဘောလုံးကို ရူးသွပ်ကြတဲ့၊ ကိုယ့်မြန်မာအသင်း အောင်မြင်တာကို တွေ့ချင်နေကြတဲ့ နယူးဇီလန်ရောက် မြန်မာပရိသတ်တွေကတော့ ခုအချိန်မှာ မြန်မာယူ-၂၃ အသင်းအတွက် စိတ်ဆန္ဒတွေ ပြင်းပြနေတာကိုလည်း တွေ့နေရတယ်ဗျာ။  Youtube ကနေ ဆီးဂိမ်းစ်ဘောလုံးပွဲစဉ်တွေ တိုက်ရိုက်ကြည့်ပြီး တစ်ယောက်နဲ့တစ်ယောက် ဖုန်းတွေဆက် အပျော်တွေ ကူးစက်နေကြတာကြည့်ပြီး ကျွန်တော်လည်း သူတို့အတွက်ရော၊ ကိုယ့်မြန်မာဘောလုံးအတွက်ပါ ကြည်နူးပီတိဖြစ်နေရပါတယ်။
 

 
နယူးဇီလန်နိုင်ငံ၊ အော်ကလန်မြို့၊ New Lynn ရှိ ရတနာဒီပကျောင်းတိုက်မှ ဆရာတော်နှစ်ပါးနှင့် ကိုစည်သူ၊ ကိုမြတ်ထွဋ်ဝင်းတို့အား တွေ့ရစဉ်
 
ကိုယ့်မြန်မာပရိသတ်တွေ ဘောလုံးအပေါ် ချစ်မြတ်နိုးတာ၊ နိုင်ငံချစ်စိတ်၊ မျိုးချစ်စိတ်တွေ ပြင်းထန်တာ “မြန်မာ” ဆိုတဲ့အမည်နာမကို ကမ္ဘာနဲ့ ရင်ဘောင်တန်းချင်တာတွေကတော့ တခြားဘယ်လူမျိုး၊ ဘယ်ပရိသတ်တွေနဲ့မဆို ယှဉ်ပြိုင်ရင် မရှုံးနိုင်တာတော့ အသေအချာပဲ အစ်ကိုရေ။ မြန်မာယူ-၂၀၊ ယူ-၂၃အသင်းတွေအပေါ် ပြည်တွင်း၊ ပြည်ပပရိသတ်တွေရဲ့ အားပေးပုံကို အစ်ကိုတို့ အတွေ့ပဲလေ။ ကျွန်တော်တော့ ဒီမှာ နယူးဇီလန်ပရိသတ်တွေအားပေးပုံကို မြန်မာပရိသတ်တွေနဲ့နှိုင်းယှဉ်မိပြီး စိတ်ပျက်မိတာ အမှန်ပါပဲဗျာ။ ပေါ်တူဂီနဲ့ နယူးဇီလန်ကစားခဲ့တဲ့ ရှုံးထွက်(၁၆) သင်းအဆင့်ပွဲစဉ်တုန်းကဆို ဒီလောက်အရေးပါတဲ့ပွဲဖြစ်နေတာတောင် ကွင်းမပြည့်ဘူးဗျာ။ ကျွန်တော်အခြေချနေထိုင်တဲ့ အော်ကလန်မြို့နဲ့ မိုင် (၈၀)လောက်ဝေးတဲ့ ဟာမီလ်တန်ကိုသွားတုန်း က လမ်းမှာ အော်ကလန်ကဆင်းလာမယ့် နယူးဇီလန်ပရိသတ်တွေကြောင့် လမ်းတွေပိတ်မလားလို့ ထင်ခဲ့ပေမယ့် လက်တွေ့မှာတော့ လမ်းမပိတ်တဲ့အပြင် ဟာမီလ်တန်မြို့တွင်းမှာလည်း ခြောက်တီးခြောက်ကပ်ဖြစ်နေတာ တွေ့ခဲ့ရတယ်။ ကွင်းထဲမှာလည်း နယူးဇီလန်ပရိသတ်ထက် ပေါ်တူဂီပရိသတ်တွေကတောင် အသံပိုကျယ်နေတာ တွေ့ခဲ့ရတယ်။ နယူးဇီလန်ပရိသတ်တွေအတွက်တော့ ဒီပွဲမှာ သူတို့အသင်း အရှုံးအတွက် အသင့်ပြင်ထားတဲ့ပုံပဲ။ ကွင်းထဲမှာ နယူးဇီလန်အသင်းက ပေါ်တူဂီကို ခြေသိပ်မပြတ်ဘဲ ယှဉ်ကစားနိုင်ခဲ့တာတောင် “Portugal ” ဆိုတဲ့ အော်သံတွေကို All White ဆိုတဲ့အော်သံတွေက မလွှမ်းမိုးနိုင်ခဲ့ဘူး။ အစကတည်းက သူတို့အသင်းကို မမျှော်လင့်ခဲ့တော့ ဒီပွဲရှုံးလည်း ခပ်အေးအေးပဲ အိမ်ပြန်ခဲ့ကြတာကို တွေ့ရတယ်။ ဒီပွဲမှာ ပေါ်တူဂီက နံပါတ် (၁၀) မားကို့စ်လိုပက်စ်(မန်စီးတီး)က လီဗာပူးလ် ကစားသမား ကော်တင်ဟိုလို မွှေနှောက်ကစားပြခဲ့ပြီး နံပါတ် (၁၃) ရီကွီချိုကတော့ အရင်က ပေါ်တူဂီနောက်ခံလူ မီဂွဲလ်လို ပုံစံမျိုးကစားပြခဲ့တယ်။ နံပါတ် (၉) အင်ဒရီဆေးလ်ဗားကတော့ ပေါ်တူဂီ တိုက်စစ်မှူးဟောင်း ပေါ်လက်တာလို အရပ်အမောင်းကောင်းတဲ့ တိုက်စစ်မှူးဖြစ်ပေမယ့် ပေါ်လက်တာလိုပဲ အခွင့်အရေးတွေ တော်တော်ဖြုန်းတာလည်း တွေ့မိတယ်။ ဘာပဲပြောပြော ပေါ်တူဂီအသင်းမှာ ကမ္ဘာ့အဆင့်ကို တိုးလာနိုင်မယ့် မျိုးဆက်သစ် အတော်များများတွေ့ခဲ့ရတယ်။
 
ဖီဖာ ယူ-၂၀ ကမ္ဘာ့ဖလားပြိုင်ပွဲက ရှုံးထွက်၊ ကွာတားအဆင့် ပွဲစဉ်တွေ ရောက်လာတာတောင် ကျွန်တော်ရောက်ခဲ့ဖူးတဲ့ ၂၀၁၀ တောင်အာဖရိကကမ္ဘာ့ဖလားလို နိုင်ငံတကာက ပရိသတ်တွေနဲ့ စည်စည်ကားကားလည်း သိပ်မရှိ။ မြန်မာ ယူ-၂၀ အသင်း ပြန်သွားပြီးကတည်းက ကျွန်တော်လည်း ဒီပြိုင်ပွဲမှာ သတင်းလိုက်ယူရတာ အားက ခပ်လျော့လျော့ဆိုတော့ ပြိုင်ပွဲအကြောင်းအရာတွေထက် အခြားအကြောင်းအရာလေးတွေ၊ အတွေ့အကြုံလေးတွေ ရေးချင်တယ်ဗျာ။ အော်ကလန် မြို့မြောက်ပိုင်း North Shore  က  North Habour Stadium မှာ ရှုံးထွက်ပွဲစဉ်သွားကြည့်တဲ့ တစ်ရက်မှာ အော်ကလန်အနောက်ပိုင်း New Lynn က မြန်မာဘုန်းကြီးကျောင်းကို NZ Pure က ကိုစည်သူ၊ သြစတြေးလျက ယူ-၂၀ ပွဲလာကြည့်တဲ့ ကိုဇေယျာတို့နဲ့အတူ ရောက်ဖြစ်ခဲ့တယ်။ ရတနာဒီပလို့ အမည်ရတဲ့ ဒီကျောင်းကို မဟာသန္တိသုခ ဗုဒ္ဓသာသနာပြုကျောင်းတည်ထောင်ခဲ့တဲ့ ပီနန်ဆရာတော် ဦးပညာဝံသ ကကြီးမှူးအကောင်အထည်ဖော်ခဲ့တာဖြစ်ပြီး ၂၀၀၂ခုနှစ်ကတည်းက စတင်တည်ရှိခဲ့တာလို့လည်း သိရပါတယ်။ နယူးဇီလန်ရောက် တိုင်းရင်းသားလူမျိုးပေါင်းစုံအပါအဝင် မြန်မာလူမျိုးတွေရဲ့ သဒ္ဓါတရားကြောင့် ဘုန်းကြီးကျောင်းဟာ ကျယ်ကျယ်ဝန်းဝန်း၊ ခံ့ခံ့ညားညားနဲ့ ပြည့်ပြည့်စုံစုံရှိတာကို တွေ့ရပါတယ်။ ဒီကျောင်းမှာ ကျောင်းထိုင်ဆရာတော် ဦးသုမန အပါအဝင် ဆရာတော်နှစ်ပါးသာ သီတင်းသုံးနေထိုင်ပြီး တရားအားထုတ်ဖို့ အလွန်ကောင်းတဲ့ ဆိတ်ငြိမ်တဲ့နေရာလေးဖြစ်တာကို တွေ့ခဲ့ရပါတယ်။ ကျွန်တော်တို့ရောက်သွားချိန်က ညနေစောင်း ညစာစားချိန်ဖြစ်တာကြောင့် ဆရာတော်တွေ ကျွေးမွေးတဲ့ ထမင်းနဲ့ ဟင်းပေါင်းကို (၃)ဦးသား မြိန်ရည်ယှက်ရည် စားသောက်ခဲ့ကြပါတယ်။ နယူးဇီလန်နိုင်ငံမှာ မြန်မာတွေ အခြေချနေထိုင်တာများတဲ့ အော်ကလန်မြို့မှာ ဘုန်းကြီးကျောင်း (၃)ကျောင်း၊ ဝယ်လင်တန်မြို့မှာ ဘုန်းကြီးကျောင်း (၁)ကျောင်း၊ စုစုပေါင်း (၄)ကျောင်းရှိနေပြီး နောက်ထပ် ကျောင်းတစ်ကျောင်းကို ဟာမီလ်တန်မြို့မှာ အကောင်အထည်ဖော်ဖို့ ဆရာတော် ဦးသုမနတို့ ဦးစီးကြိုးပမ်းနေတာကိုလည်း တွေ့ခဲ့ရပါတယ်။ ဟာမီလ်တန်မြို့မှာလည်း မြန်မာအတော်များများရှိတာကြောင့် မြို့ခံ မြန်မာဗုဒ္ဓဘာသာဝင်တွေနဲ့ ဆရာတော်တွေ၊ ရတနာဒီပကျောင်းဂေါပကအဖွဲ့ဝင်တွေ ညှိနှိုင်းတိုင်ပင်ဆောင်ရွက်နေတယ်လို့ သိရပါတယ်။
 

 
နယူးဇီလန်ဘက်သို့ ဂိုးသွင်းပြီး အောင်ပွဲခံနေသည့် ပေါ်တူဂီကစားသမားများ
 
နယူးဇီလန်ကို မြန်မာနိုင်ငံက ရောက်ရှိလာသူတွေက ပုံစံအမျိုးမျိုး၊ အကြောင်းအမျိုးမျိုးနဲ့ ရောက်ရှိလာတာဖြစ်လို့ နိုင်ငံအနှံ့အပြားမှာ သူ့အစုနဲ့သူ တကွဲတပြားစီရှိနေကြတာကိုလည်း တွေ့ရပါတယ်။ ဒီလို မြန်မာတွေ တကွဲတပြားဖြစ်နေတာကို အချင်းချင်း စုစည်းမိအောင် စည်းစည်းလုံးလုံးဖြစ်အောင် ကြိုးပမ်းနေကြသူတွေကိုလည်း တွေ့ရပါတယ်။ မြန်မာ ယူ-၂၀ အသင်း ဖန်ဂရေးမှာ အုပ်စုပွဲကစားတုန်းက မြန်မာပရိသတ်တွေ တစ်စုတစ်စည်းတည်းသွားနိုင်အောင်၊ ဘောလုံးပွဲကို အဆင်ပြေပြေကြည့်နိုင်အောင် အော်ကလန် အခြေစိုက် “မြန်မာ့ဂုဏ်ရည်”ဆိုတဲ့ အဖွဲ့က စီစဉ်ပေးခဲ့တယ်ဆိုတာ သိရလို့ ဒီအဖွဲ့ရဲ့ အတွင်းရေးမှူးအဖြစ် တာဝန်ယူထားတဲ့ ကိုရဲအောင်ဆိုသူကို ဒီအဖွဲ့အစည်းအကြောင်း မေးမြန်းဖြစ်ခဲ့ပါတယ်။ ဒီအဖွဲ့အစည်းလေးကို လူမှုရေးအဖွဲ့အစည်းအဖြစ် ပြီးခဲ့တဲ့နှစ် နိုဝင်ဘာလအတွင်းမှာ စတင်စုစည်းကာ ဖွဲ့စည်းတည်ထောင်ဖြစ်ကြောင်းနဲ့ နယူးဇီလန်ရောက် မြန်မာလူမျိုးတွေရဲ့ သာရေးနာရေးကိစ္စတွေမှာ အကူအညီပေးသွားဖို့ ရည်ရွယ်ကြောင်း ရှင်းပြပါတယ်။
 

 
အမေရိကန်နှင့်ပွဲအပြီး ပရိသတ်များနှင့်အတူ ဆားဘီးယားကစားသမားများ အောင်ပွဲခံနေစဉ်
 
ဒါ့အပြင် ဒီက စာပေဝါသနာရှင်တွေ စုစည်းထုတ်ဝေထားတဲ့ “ကင်းဝေးကြိုးကြာ” ဆိုတဲ့ ဂျာနယ်လေးကိုလည်း တွေ့ခဲ့ရပါတယ်။ ရတနာဒီပ ကျောင်းထိုင်ဆရာတော် ဦးသုမနက ကြီးမှူးပြီး စာပေချစ်မြတ်နိုးသူတွေ စုပေါင်းထုတ်ဝေတဲ့ ဒီဂျာနယ်လေးကို စီးပွားရေးအရ ထုတ်ဝေတာမဟုတ်ဘဲ (၃)လတစ်ကြိမ် အခမဲ့ဖြန့်ချိ ထုတ်ဝေတာဖြစ်ကြောင်း သိရပါတယ်။ နယူးဇီလန်နိုင်ငံရဲ့ Printing နဲ့ အခြားစရိတ်စကကြီးမားမှုတွေကြောင့် ဒီဂျာနယ်ကို စုပေါင်းထုတ်ဝေသူတွေဟာ အိတ်စိုက်သာဖြစ်ပြီး တစ်ကြိမ်ထုတ်ဝေရင် နယူးဇီလန်ဒေါ်လာ (၁၅၀၀) လောက် (အမေရိကန်ဒေါ်လာ ၁၁၂၀ ခန့်) ကုန်ကျကြောင်း သိရပါတယ်။ နယူးဇီလန်ရောက် စာပေဝါသနာကြီးသူတွေ ထုတ်ဝေတဲ့ ဒီဂျာနယ်ကို အခုနှစ်အစပိုင်းမှာ ပထမအကြိမ် စတင်ထုတ်ဝေခဲ့ပြီး ပြီးခဲ့တဲ့မေလက ဒုတိယအကြိမ်ထုတ်ဝေခဲ့ကာ အဓိကဖြန့်ချိရေးကတော့ မြန်မာလူမျိုးတွေ အရောက်အပေါက်များတဲ့ ရတနာဒီပဘုန်းကြီးကျောင်းဖြစ်တယ်လို့ စာရေးဆရာတစ်ဦးဖြစ်သူ ညိုထက်ညိုက ရှင်းပြပါတယ်။ ဒီဂျာနယ်လေးကို ဖတ်ရှုလေ့လာခဲ့ရာမှာ စာမျက်နှာ(၁၆) မျက်နှာသာပါဝင်ပေမယ့် Wood - Free စာရွက်သားကောင်းကောင်း၊ ပုံနှိပ်အရည်အသွေးကောင်းကောင်းနဲ့ထုတ်ဝေထားပြီး သတင်း၊ ဆောင်းပါး၊ သုတ၊ ရသစုံလင်စွာပါဝင်တာကိုလည်း တွေ့ရပါတယ်။ ကင်းဝေးကြိုးကြာစာပေ အနုပညာအင်အားစုဟာ စာပေဝါသနာအရ ဂျာနယ်ကို အိတ်စိုက်ပြီး အခမဲ့ထုတ်ဝေရုံသာမက မြန်မာနိုင်ငံသားတွေ စာပေအသိတိုးဖို့ တစ်တပ်တအား ပါဝင်ခဲ့တာကိုလည်း တွေ့ခဲ့ရပါတယ်။ ဗိုလ်ချုပ်ဇနီး ဒေါ်ခင်ကြည် အမှတ်တရဖောင်ဒေးရှင်းက စီစဉ်ဆောင်ရွက်နေတဲ့ ရွေ့လျားစာကြည့်တိုက်ကို အလှူငွေပေးအပ်လှူဒါန်းခဲ့ကြတာဖြစ်ပြီး အမျိုးသားဒီမိုကရေစီအဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်ကိုယ်တိုင် အလှူငွေလက်ခံရယူခဲ့တာကို ဂျာနယ်နောက်ကျောမှာ သတင်းအဖြစ် တွေ့ခဲ့ရပါတယ်။
 

 
အိမ်ရှင်နယူးဇီလန်အား အနိုင်ရပြီးနောက် ပေါ်တူဂီပရိသတ်များအား တွေ့ရစဉ်
 
ပြီးခဲ့တဲ့ဇွန်(၁၄)ရက် တနင်္ဂနွေနေ့မှာတော့ အော်ကလန်မြို့က North Habour Stadium မှာ ကွာတားဖိုင်နယ်ပွဲစဉ်တစ်ပွဲဖြစ်တဲ့ အမေရိကန်နဲ့ ဆားဘီးယားတို့ရဲ့ပွဲကို သွားကြည့်ဖြစ်ပါတယ်။ ယူ-၂၀ ကမ္ဘာ့ဖလားပြိုင်ပွဲမှာ ကွာတားဖိုင်နယ်ပွဲစဉ်တွေကို တစ်ရက်တည်း ကစားခဲ့တာဖြစ်ပြီး ပွဲရလဒ်တွေကတော့ အစ်ကိုသိတဲ့အတိုင်းပါပဲ။ ကွာတား(၄)ပွဲမှာ ကမောက်ကမပဲပြောရမလား၊ ခြေညီတယ်ပဲ ပြောရမလား၊ ယူ-၂၀ ကစားသမားတွေ ဂိုးမသွင်းတတ်ဘူးပဲ ပြောရမလား။ ဘာပြောရမှန်းကို မသိအောင် ရလဒ်တွေက ဆန်းကြယ်လွန်းပါတယ်။ ကွာတား(၄)ပွဲမှာ သရေကျတာ(၃)ပွဲ၊ စုစုပေါင်းသွင်းဂိုး(၃)ဂိုး၊ ဘဲဥမကွဲတာ က (၅)သင်း၊ ပယ်နယ်တီက (၃၆)လုံး။ ပွဲအားလုံး ညှိကန်ကြသလားလို့ထင်ရလောက်အောင် တိုက်ဆိုင်လွန်းပါတယ်။ ကျွန်တော်သွားကြည့်ခဲ့တဲ့ အမေရိကန်-ဆားဘီးယားပွဲက ဂိုးမရှိခဲ့ပေမယ့် ပွဲချိန်အတွင်းတော့ နှစ်သင်းစလုံး အခွင့်အရေးတွေ ကိုယ်စီရခဲ့ကြပါတယ်။ အဆုံးသတ်ဂိုးသွင်းတာ အားနည်းတာကြောင့် နှစ်သင်းစလုံးဂိုးမရခဲ့တာဖြစ်ပြီး ပွဲကတော့ ပွဲကောင်းတစ်ပွဲဖြစ်ခဲ့ပါတယ်။ အမေရိကန်အသင်းမှာပါဝင်တဲ့ အာဆင်နယ်က ဂျာမနီဖွား လူငယ်ကစားသမား ဇီလာလမ်ကတော့ အသင်းအတွက် ကြိုးစားကစားပေးသော်ငြား ကျန်အသင်းဖော်တွေနဲ့ သိပ်ပြီး အချိတ်အဆက်မမိတာ တွေ့ရပါတယ်။ ပွဲအပြီး ပယ်နယ်တီကတော့ တကယ့်ကို ရင်လှိုက်သည်းဖိုပါပဲ။ 
ပထမဆုံးကန်တဲ့ ဘောလုံးကို အမေရိကန်တိုက်စစ်မှူး ရူဘင်လွဲ ချော်ခဲ့ပြီး၊ ဒုတိယမြောက် ပယ်နယ်တီကို ဆားဘီးယားတိုက်စစ်မှူး မန်ဒစ် လွဲချော်ခဲ့တာကြောင့် (၅)လုံးစီကန်အပြီးမှာ (၄-၄)နဲ့ သရေ ဖြစ်နေပါတယ်။ (၆)လုံးမြောက် ပယ်နယ်တီကို အမေရိကန် က ဆိုနိုရာကန်ပြီး မဝင်တော့တဲ့အချိန် ဆားဘီးယား ပင်နယ်တီအလှည့်ရောက်ချိန်က ဇာတ်ရှိန်အမြင့်ဆုံးပါပဲ။ ဒီပယ်နယ်တီကို ဆားဘီးယားဂိုးသမား ရာကိုဗစ် ကန်သွင်းပြီး ဂိုးသမား(၂)ဦးရဲ့ ပယ်နယ်တီအားပြိုင်မှုကို ပရိသတ်တွေ ရင်လှိုက်သည်းလှိုက် ခံစားခဲ့ရတာပါ။ ရာကိုဗစ်ရဲ့ ကန်သွင်းမှုကို အမေရိကန်ဂိုးသမား စတက်ဖန်က တားဆီးပြီးတဲ့နောက်မှာ ပယ်နယ်တီက ဇာတ်လမ်းမပြီးသေးဘဲ ဆက်လက်ဆုံးဖြတ်ခဲ့ရာမှာ ဆာဘီးယား က (၉)လုံးမြောက် ပယ်နယ်တီကို ဝင်အောင်ကန်သွင်းပြီး ပွဲအဖြေကို အဆုံးသတ်ပေးခဲ့ပါတယ်။
 

 
ဆီမီးဖိုင်နယ်တက်သွားသည့် ဆားဘီးယားအသင်း၏ ပရိသတ်များ
 
ဒီပွဲမှာ ဆာဘီးယားပရိသတ်အတော်များများ လာရောက်အားပေးတာကို တွေ့ရပြီး ကျွန်တော်တို့ မြန်မာပရိသတ်တွေ အမေရိကန်နဲ့ပွဲတုန်းက အားပေးသလိုပဲ ကွင်းရဲ့အထူးတန်းပွဲကြည့်စင် မျက်နှာချင်းဆိုင်မှာ အစုလိုက်အပြုံလိုက် အားပေးကြတာကို တွေ့ရပါတယ်။ 
ဆာဘီးယားအလံတွေ၊ အင်္ကျီတွေနဲ့ တခဲနက်အားပေးပုံက ကျွန်တော်တို့ မြန်မာပရိသတ်တွေလိုပဲ အားရစရာကောင်းလွန်ပြီး ပယ်နယ်တီနဲ့ အနိုင်ရပြီးချိန်မှာ ကစားသမားတွေနဲ့အတူ ပျော်မြူးနေကြတဲ့မြင်ကွင်းက တကယ့်ကို ကြည်နူးစရာပါပဲ။ ပွဲအပြီး ပျော်ရွှင်မြူးတူးစွာ ကွင်းထဲက ထွက်လာတဲ့ ဆာဘီးယားပရိသတ်အချို့ကို ဓာတ်ပုံရိုက်ပြီး ဆာဘီးယားကနေ ဒီအထိလိုက်ပြီး အားပေးတာလားလို့ စပ်စုကြည့်ပါတယ်။ သူတို့ထဲကတစ်ဦးက ဆာဘီးယားကနေ ဒီအထိ လိုက်ပါသူတွေက ကစားသမား အချို့ရဲ့မိသားစုတွေသာဖြစ်ပြီး (၃၀)ဦးဝန်းကျင် ခန့်သာရှိကြောင်း၊ ကျန်ပရိသတ်တွေအားလုံးက ခရိုက်ချက်ချ်၊ ဝယ်လင်တန်၊ ဟာမီလ်တန် အစရှိ တဲ့ မြို့အသီးသီးမှာ အခြေချနေထိုင်တဲ့ ဆာဘီးယားတွေဖြစ်ကြောင်း အဖြေပေးပါတယ်။ သူ အဖြေပေးချိန်မှာ ကျွန်တော့်မျက်လုံးထဲ ဒီမှာအခြေချနေထိုင်တဲ့ မြန်မာပရိသတ်တွေရဲ့ပုံရိပ်တွေက ပေါ်လာပြန်ပါတယ်။ ဖန်ဂရေး၊ ဝယ်လင်တန်မြို့တွေမှာ ကွင်းထဲ သံကုန်အော်ဟစ်ခဲ့ကြတဲ့ နယူး ဇီလန်မြေက မြန်မာပရိသတ်တွေ ခုတော့လည်း မိမိတို့ရဲ့ နေအိမ်တွေမှာ ကွန်ပျူတာရှေ့၊ လက်ပ်တော့ရှေ့ ငုတ်တုတ်ထိုင်ရင်း Youtube က တိုက်ရိုက်လာတဲ့ မြန်မာယူ-၂၃ဆီးဂိမ်းစ်ဘောလုံးပွဲစဉ်တွေကို သံကုန်ဟစ်အားပေးနေကြပြန်ပါပြီ။ ကျွန်တော်လည်း သမိုင်းဝင် ပြိုင်ဘက်ထိုင်းနဲ့ အပီနွှဲမယ့် ဗိုလ်လုပွဲကို အားပေးဖို့ အားမွေးရဦးမှာမို့ ကျွန်တော်ရဲ့ဆောင်းပါးကို ဒီမှာပဲ အဆုံးသတ်လိုက်ပါရစေဗျာ။
 
ဆက်လက်ဖော်ပြပါမည်။