ရှမ်းလူမျိုးအလိုက် အမျိုးသားအဆင့်နိုင်ငံရေးဆွေးနွေးပွဲ ကြိုတင်ပြင်ဆင်မှုအဖြစ် ရှမ်းအဖွဲ့အစည်းများမှ ကိုယ်စားလှယ်များပါဝင်သော အဖွဲ့ငါးဖွဲ့ဖြင့် ရှမ်းလူမျိုးများနေထိုင်သည့်နေရာများသို့ ဒီဇင်ဘာ ၁၇ ရက်မှ စတင်သွားရောက်ကာ သဘောထားရယူမည်ဖြစ်ကြောင်း ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ပါတီတွဲဖက်အတွင်းရေးမှူး (၂) စိုင်းကျော်ညွန့်က ပြောကြားသည်။
ထိုသို့သွားရောက်မည့် အဖွဲ့ငါးဖွဲ့အနက်တစ်ဖွဲ့သည် ရှမ်းပြည်နယ်ပြင်ပရှိ ရှမ်းလူမျိုးများနေထိုင်ရာဒေသများသို့ သွားရောက်မည်ဖြစ်ပြီး လေးဖွဲ့မှာ ရှမ်းပြည်နယ်အတွင်း နေရာများခွဲကာ သွားရောက်မည်ဖြစ်ကြောင်း ၎င်းကပြောကြားသည်။
အဆိုပါအဖွဲ့ငါးဖွဲ့တွင် ရှမ်းနိုင်ငံရေးပါတီများ၊ ရှမ်းလက်နက်ကိုင်အဖွဲ့ဝင်များ၊ ရှမ်းအရပ်ဘက်အဖွဲ့အစည်းများမှ ကိုယ်စားလှယ်များ ပါဝင်မည်ဖြစ်ကြောင်း သိရသည်။
ရှမ်းလူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲကျင်းပနိုင်ရေးအတွက် ရှမ်းပြည်ညီညွတ်ရေးကော်မတီ (CSSU) ၏ ကြိုတင်ပြင်ဆင်သည့် အလုပ်ရုံဆွေးနွေးပွဲကို ဒီဇင်ဘာ ၁၂ ရက်မှ ၁၄ ရက်အထိ ကျင်းပခဲ့သည်။
ထို့ပြင် နိုင်ငံရေးဆွေးနွေးပွဲတွင် ဆွေးနွေးရန်သတ်မှတ်ထားသည် ကဏ္ဍငါးခုအား ရှမ်းအဖွဲ့အစည်းအသီးသီးမှ တာဝန်ယူထားသူများက သက်ဆိုင်ရာကဏ္ဍအလိုက် အဖွဲ့များခွဲ၍ ဆွေးနွေးခြင်းနှင့် ပြည်သူလူထုထံ သွားရောက်မည့် အဖွဲ့ငါးဖွဲ့ဖွဲ့စည်းခြင်းတို့အား ဒီဇင်ဘာ ၁၅ ရက်တွင် ထပ်မံဆွေးနွေးခဲ့ကြောင်း သိရသည်။
“အဖွဲ့ငါးဖွဲ့နဲ့ ကျွန်တော်တို့ပြည်သူတွေနဲ့ သွားတွေ့ဆုံတဲ့ပွဲလုပ်ပါ့မယ်။ ကျွန်တော်တို့ရေးဆွဲထားတဲ့မူဝါဒတွေ၊ ပေါ်လစီတွေကို ပြည်သူတွေကိုချပြမယ်။ သွားတင်ပြမယ်ပေါ့ဗျာ။ ပြည်သူတွေ ပြန်ပြီးအကြံပြုတာတွေ၊ အကြံပြုချက်တွေ။ ပြည်သူတွေသဘောထားတွေပေါ့လေ။ အဲဒီသဘောထားတွေပေါင်းပြီးတော့၊ သတ်မှတ်ထားတဲ့မြို့တွေကို သွားလို့ပြီးပြီဆိုရင်တော့ဖြင့် ကျွန်တော်တို့ တောင်ကြီးမှာ နောက်တစ်ခါပြန်တွေ့မှာဖြစ်ပါတယ်။ အဲဒီမှာ ပြည်သူနဲ့တွေ့ဆုံတုန်းမှာရရှိခဲ့တဲ့ အချက်အလက်တွေပြန်ပြီးတော့ ကျွန်တော်တို့စုပေါင်းပြီးတော့ ရေးဆွဲထားတဲ့မူဝါဒတွေပေါ်မှာ ပြည်သူတွေရဲ့သဘောထားတွေ၊ ပြည်သူတွေရဲ့တုံ့ပြန်မှုတွေအကုန်လုံးကို ပြန်ပြီးတော့စဉ်းစားတော့ ကျွန်တော်တို့က ဒုတိယမူကြမ်းလိုမျိုး ပြန်လုပ်မယ့်သဘောရှိပါတယ်။ မူဝါဒတွေကို ပြန်ပြုပြင်သင့်တာတွေ ဖြည့်စွက်မွမ်းမံတာတွေ အကုန်လုံးပေါ့ဗျာ။ အဲဒါတွေ ပြန်လုပ်မှာဖြစ်ပါတယ်။ လုပ်ပြီးပြီဆိုကာမှပဲ အကြိုပွဲလိုမျိုးတစ်ပွဲဖြစ်ဖြစ်လုပ်မယ်။ ပြီးမှပဲ အမျိုးသားအဆင့်လုပ်မယ်ဆိုတဲ့ပုံစံကတော့ လောလောဆယ် အကြမ်းဖျင်းစီစဉ်ထားပါတယ်” ဟု စိုင်းကျော်ညွန့်က ပြောကြားသည်။
တပ်မတော်နှင့် NCA ရေးထိုးထားသည့် ရှမ်းပြည်ပြန်လည်ထူထောင်ရေးကောင်စီ (RCSS/SSA) အကြား လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲ (ရှမ်း) ကျင်းပမည့်နေရာ အငြင်းပွားနေမှုအပေါ် နိုဝင်ဘာ ၂၇ ရက်ကပြုလုပ်သည့် တစ်နိုင်ငံလုံးပစ်ခတ်မှုရပ်စဲရေး သဘောတူစာချုပ် အကောင်အထည်ဖော်မှုဆိုင်ရာ ညှိနှိုင်းအစည်းအဝေး (JICM) တွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ကြားဝင်စေ့စပ်ညှိနှိုင်းပေးမှုအရ ရှမ်းပြည်နယ် လင်းခေးမြို့၌ ပြုလုပ်ရန်ဆုံးဖြတ်ခဲ့သဖြင့် ယခုကဲ့သို့ ကြိုတင်ပြင်ဆင်မှုများ ပြုလုပ်လာခြင်းလည်းဖြစ်သည်။
လူမျိုးအလိုက် အမျိုးသားအဆင့်နိုင်ငံရေးဆွေးနွေးပွဲ (ရှမ်း) ကျင်းပခွင့်အား ပြည်ထောင်စုငြိမ်းချမ်းရေးညီလာခံ-၂၁ ရာစုပင်လုံ ဒုတိယအစည်းအဝေးမတိုင်မီကပင် ခွင့်ပြုထားသော်လည်း ဆွေးနွေးပွဲကျင်းပမည့်နေရာအား တပ်မတော်ဘက်မှ မိုင်းပန်မြို့၊ မုံးထော်၊ မုံးထမြို့၊ နမ့်ပန်ခွန်မြို့တို့တွင်သာကျင်းပရန် ထောက်ခံခဲ့ပြီး RCSS/SSA က တောင်ကြီးမြို့ (သို့မဟုတ်) ပင်လုံမြို့၌ ကျင်းပရန်တောင်းဆိုခဲ့သဖြင့် အငြင်းပွားခဲ့ခြင်းဖြစ်သည်။
လူမျိုးအလိုက် အမျိုးသားအဆင့်နိုင်ငံရေးဆွေးနွေးပွဲအား NCA ရေးထိုးထားသည့် တိုင်းရင်းသားလက်နက်ကိုင်အဖွဲ့ဦးဆောင်၍ တရားဝင်နိုင်ငံရေးပါတီ ပူးပေါင်းကာကျင်းပခွင့်ရှိပြီး လူမျိုးအလိုက်အမျိုးသားအဆင့် နိုင်ငံရေးဆွေးနွေးပွဲ (ရှမ်း) ကျင်းပရန် RCSS/SSA၊ ရှမ်းနိုင်ငံရေးပါတီများ၊ အရပ်ဘက်အဖွဲ့အစည်းများက အကြိုဆွေးနွေးပွဲများကျင်းပထားပြီး မူဝါဒမူကြမ်းများရရှိထားကာ နိုင်ငံရေးသိက္ခာအရ တောင်ကြီး (သို့မဟုတ်) ပင်လုံတွင်သာ ကျင်းပခွင့်ပေးရန် RCSS/SSA က အစဉ်တစိုက်တောင်းဆိုခဲ့ပြီးနောက် လင်းခေးမြို့တွင်ကျင်းပရန် သဘောတူခဲ့ခြင်းဖြစ်သည်။
ပြည်ထောင်စုငြိမ်းချမ်းရေးညီလာခံ- ၂၁ ရာစုပင်လုံ ဒုတိယအစည်းအဝေးမတိုင်မီက အမျိုးသားအဆင့်နိုင်ငံရေးဆွေးနွေးပွဲများ ကျင်းပရာတွင် လူမျိုးအလိုက် အမျိုးသားအဆင့်နိုင်ငံရေးဆွေးနွေးပွဲအား (ချင်း)၊ (ပအိုဝ်း)၊ (ကရင်) သုံးပွဲ၊ ဒေသအလိုက် အမျိုးသားအဆင့်နိုင်ငံရေးဆွေးနွေးပွဲအား (ပဲခူး)၊ (တနင်္သာရီ)၊ (ရှမ်း) သုံးပွဲကျင်းပခဲ့ပြီး အဆိုပါခြောက်ပွဲမှရရှိထားသည့် သဘောထားစာတမ်းများကို စုစည်းကာ ပြည်ထောင်စုငြိမ်းချမ်းရေးညီလာခံ-၂၁ ရာစုပင်လုံ ဒုတိယအစည်းအဝေးတွင် တင်သွင်းဆုံးဖြတ်မှုများ ပြုလုပ်ခဲ့သည်။ အကြောင်းအရာအလိုက် အမျိုးသားအဆင့်နိုင်ငံရေးဆွေးနွေးပွဲ (သို့မဟုတ်) အရပ်ဘက်အဖွဲ့အစည်းများဖိုရမ်ကို နေပြည်တော်တွင် ၂၁ ရာစုပင်လုံ ဒုတိယအစည်းအဝေးမတိုင်မီက ကျင်းပခဲ့သော်လည်း ညီလာခံသို့ စာတမ်းတင်သွင်းခဲ့ခြင်းမရှိပေ။
