နိုင်ငံခြားသားများသာ ကစားခွင့်ရှိမည့် ကာစီနိုရုံများ တည်ထောင်ခြင်း၊ ဖွင့်လှစ်ခြင်းကို သတ်မှတ်ချက်များနှင့်အညီ ပြည်ထောင်စုအစိုးရအဖွဲ့က ခွင့်ပြုနိုင်မည့်အချက် ပါဝင်သော လောင်းကစားဥပဒေကြမ်းအား ပြည်သူ့လွှတ်တော်တွင် အတည်ပြုခဲ့ကြောင်း သတင်းရရှိသည်။
နေပြည်တော်၌ စက်တင်ဘာ ၁၂ ရက်က ပြုလုပ်သော ဒုတိယအကြိမ် ပြည်သူ့လွှတ်တော် နဝမပုံမှန်အစည်းအဝေး ၁၇ ရက်မြောက်နေ့တွင် ၂၀၁၈ ခုနှစ် လောင်းကစား ဥပဒေကြမ်းနှင့်ပတ်သက်၍ တင်သွင်းထားသည့် ပြင်ဆင်ချက်အဆိုအား ဆွေးနွေးပြီး လွှတ်တော် အဆုံးအဖြတ်ရယူကာ အတည်ပြုခဲ့ခြင်း ဖြစ်သည်။
“ပြည်သူ့ရေးရာ စီမံခန့်ခွဲမှုကော်မတီက တင်လာတယ်။ လွှတ်တော်ကို ကျွန်တော်တို့ ဥပဒေကြမ်းက အစီရင်ခံစာတင်တယ်။ ဒီအပေါ်မှာ လွှတ်တော်ကိုယ်စားလှယ် ၁၂ ဦးက ဆွေးနွေးတယ်။ ဆွေးနွေးတဲ့နေရာမှာ သူတို့ကြိုက်တဲ့ စကားလုံးလေးတွေ ထည့်ပေးလိုက်တယ်။ သဘောထားကွဲလွဲတာတော့ တစ်ယောက်ပဲ။ ကာစီနိုဥပဒေ မဟုတ်ဘူး။ ကာစီနိုဥပဒေက နိုင်ငံတကာမှာ ပုဒ်မပေါင်းနည်းတာ မဟုတ်ဘူး။ ဒီဥပဒေက လောင်းကစားဥပဒေပါ ကာစီနိုဥပဒေ မဟုတ်ပါဘူး” ဟု ထန်းတပင်မဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးနေမျိုးထွန်းက ဆိုသည်။
၂၀၁၈ ခုနှစ် လောင်းကစားဥပဒေကြမ်းကို ပြည်သူ့လွှတ်တော်၊ ပြည်သူ့ရေးရာ စီမံခန့်ခွဲမှုကော်မတီသည် မျက်မှောက်ခေတ်စနစ်နှင့် ကိုက်ညီသော လောင်းကစားဥပဒေအသစ် ပေါ်ပေါက်လာစေရန်၊ ခေတ်ကာလအလျောက် ဆန်းသစ်ပေါ်ပေါက်လာသော လောင်းကစားနည်းသစ်များကို ထိန်းချုပ်စေရန်နှင့် အောင်ဘာလေထီနှင့် ကာစီနိုရုံများ ကဲ့သို့သော ကံစမ်း၊ ဉာဏ်စမ်းကစားမှုများကို နိုင်ငံသားများ၏ အကျိုးစီးပွားမထိုက်စေဘဲ ဥပဒေပြု၍ ခွင့်ပြုနိုင်ရန် ရည်ရွယ်ချက်များဖြင့် ရေးဆွဲ၍ သြဂုတ် ၂၁ ရက်က ပြုလုပ်သော ဒုတိယအကြိမ် ပြည်သူ့လွှတ်တော် နဝမပုံမှန်အစည်းအဝေး ၁၁ ရက်မြောက်နေ့တွင် တင်သွင်းခဲ့ခြင်းဖြစ်သည်။
ပြည်သူ့လွှတ်တော်၊ ပြည်သူ့ရေးရာ စီမံခန့်ခွဲမှုကော်မတီက တင်သွင်းသော ၂၀၁၈ ခုနှစ် လောင်းကစားဥပဒေကြမ်းတွင် အခန်း ၆ ခန်းနှင့် အပိုင်းပေါင်း ၂၃ ပိုဒ် ပါရှိသော်လည်း အခန်း(၇) အပိုဒ် ၂၂ တွင် အောင်ဘာလေထီကို ပြည်ထောင်စုအစိုးရအဖွဲ့က တာဝန်ပေးအပ်သည့် စီမံကိန်းနှင့် ဘဏ္ဍာရေးဝန်ကြီးဌာန၊ ပြည်တွင်းအခွန်များ ဦးစီးဌာနကသာ လုပ်ကိုင်ဆောင်ရွက်ခွင့်ရှိသည်နှင့် အပိုဒ် ၂၃ တွင် ပြည်ထောင်စုအစိုးရအဖွဲ့သည် ကာစီနိုရုံ (သတ်မှတ်ချက်များနှင့်အညီ မှတ်ပုံတင်ထားပြီး ခွင့်ပြုထားသည့်နေရာ သို့မဟုတ် အဆောက်အအုံ၌သာ ဖွင့်လှစ်ခွင့်ပြုထားသည့် နိုင်ငံခြားသားများသာ သီးသန့် လောင်းကစားခွင့်ရှိသော နေရာ) တည်ထောင်ခြင်း၊ ဖွင့်လှစ်ခြင်းကို သတ်မှတ်ချက်များနှင့်အညီ စိစစ်ခွင့်ပြုနိုင်သည်ဟု ဥပဒေကြမ်းကော်မတီက စီစစ်၍ အသစ်ဖြည့်စွက်ချက်အဖြစ် ထည့်သွင်းခဲ့ခြင်းဖြစ်သည်။
ကာစီနိုများနှင့်ပတ်သက်၍ သတ်မှတ်ထားသော ယဉ်ကျေးမှုနယ်မြေများတွင် ခွင့်ပြုပေးမည်မဟုတ်ဘဲ နိုင်ငံခြားသားများ ဝင်ထွက်သွားလာရန် လွယ်ကူသည့် နေရာများကို အဓိကထားကာ နိုင်ငံတကာ ခရီးသွားလာရေးနှင့် မြန်မာ့စီးပွားရေးအတွက် ရည်ရွယ်ကာ ၂၀၁၈ ခုနှစ် လောင်းကစားဥပဒေကြမ်းကို ရေးဆွဲထားခြင်းဖြစ်ကြောင်း သိရသည်။
လက်ရှိကျင့်သုံးနေသော ၁၉၆၈ ခုနှစ် လောင်းကစားဥပဒေသည် မဆလခေတ်တွင် ရေးဆွဲပြဋ္ဌာန်းခဲ့သော ဥပဒေဖြစ်ရာ လက်ရှိအုပ်ချုပ်ရေးပုံစံနှင့် ကိုက်ညီမှုမရှိခြင်း၊ ဥပဒေပါ ထောင်ဒဏ် ငွေဒဏ်များမှာ ယခုကာလနှင့် ကိုက်ညီမှုမရှိခြင်း၊ မြန်မာနိုင်ငံ ရဲတပ်ဖွဲ့၏ ဖွဲ့စည်းပုံအင်အား ပြောင်းလဲလာခြင်းနှင့် ခေတ်မီနည်းပညာများ တိုးတက်ပေါ်ပေါက်လာသောကြောင့် လက်တွေ့ကျင့်သုံးရန် အခက်အခဲရှိကြောင်း သိရသည်။
