သာပေါင်းမြို့နယ် ငါးဟင်းဂံကြေးတိုင်အင်းကို လွှတ်တော်ကိုယ်စားလှယ်၏ အချက်အလက် မှားယွင်းစွာ တင်ပြခဲ့မှုကို အခြေခံ၍ တိုင်းဒေသကြီးအစိုးရအဖွဲ့မှ ကြေးတိုင်ပယ်ဖျက်ကာ အစုအဖွဲ့ ရေလုပ်သားများအား ချထားပေးခဲ့ခြင်းနှင့် ပတ်သက်၍ နစ်နာသူ အင်းလုပ်သားကြီးက စက်တင်ဘာ ၃ ရက်တွင် ပုသိမ်မြို့၌ သတင်းစာရှင်းပွဲတစ်ခု ပြုလုပ်ခဲ့ကြောင်း သတင်းရရှိသည်။
ငါးဟင်းဂံအင်းမှာ ငါးလုပ်ငန်းဦးစီးဌာနမှ ကြေးတိုင်အင်းတစ်ခုအဖြစ် သတ်မှတ်ထားသော အင်းတစ်ခုဖြစ်ပြီး လက်ရှိလုပ်ငန်း လုပ်ကိုင်နေသူ ဦးလှဆန်းအား သုံးနှစ်ကြေးတိုင်အဖြစ် ချထားပေးခဲ့ကြောင်း၊ ယခုနှစ် အင်းရာသီတွင်လည်း မူလလုပ်ကိုင်နေသူ ဦးလှဆန်းကိုပင် ကြေးတိုင်ဆက်လက် ချထားပေးပြီး အင်းခွန်ငွေနှင့် ငါးသားပေါက်ဖိုးငွေများကို ငါးလုပ်ငန်းဦးစီးဌာနသို့ ပေးသွင်းပြီးဖြစ်ကြောင်း၊ ယင်းသို့ ကြေးတိုင်အင်း ချထားပေးပြီးနောက် သာပေါင်းမြို့နယ် မဲဆန္ဒနယ် အမှတ်(၂)မှ တိုင်းဒေသကြီးလွှတ်တော်ကိုယ်စားလှယ် ဦးအောင်အောင်ဦးက ငါးဟင်းဂံအင်းမှာ ယခင်နှစ် အင်းတန်ဖိုး ငါးသိန်းကျပ်သာရှိကြောင်း၊ ယင်းအင်းမှာ စပါးငါးပြဿနာ ရှိသောကြောင့် ကြေးတိုင်ချထားမပေးသင့်ဘဲ အင်းအနီးရှိ အစုအဖွဲ့ ရေလုပ်သားများကိုသာ ချထားပေးသင့်ကြောင်း ငါးလုပ်ငန်းဦးစီးဌာနနှင့် တိုင်းဒေသကြီးအစိုးရထံ တင်ပြမှုအရ ကြေးတိုင်အင်းအဖြစ်မှ ပြန်လည်ရုပ်သိမ်းခဲ့ပြီး အစုအဖွဲ့ရေလုပ်သားများကို ချထားပေးခဲ့ကြောင်း၊ ယင်းကဲ့သို့ အစုအဖွဲ့ ရေလုပ်သားများအား ချထားပေးရန်အတွက် ဦးအောင်အောင်ဦး၏ တင်ပြချက်များမှာ မှားယွင်းနေပြီး လွှတ်တော်ကိုယ်စားလှယ် တင်ပြသကဲ့သို့ ငါးစပါးပြဿနာများ မရှိကြောင်းနှင့် အင်းတန်ဖိုးငွေမှာလည်း ငွေကျပ်သိန်း ၂၀ ကျော် တန်ဖိုးရှိ အင်းတစ်ခုဖြစ်သောကြောင့် ကြေးတိုင်အင်းအဖြစ်မှ ပြန်လည်ရုပ်သိမ်းခံရမှုမှာ နစ်နာမှုများ ရှိနေသောကြောင့် သတင်းစာ ရှင်းလင်းပွဲ ပြုလုပ်ရခြင်းဖြစ်ကြောင်း သိရသည်။
“ကြေးတိုင်ချထားပေးပြီးသား အင်းတွေကို အစုအဖွဲ့ရေလုပ်သားတွေကို မပေးရဘူးလို့ စည်းကမ်းချက်ထဲမှာ ပါပါတယ်၊ ကျွန်တော်က ဒီအင်းကို သုံးနှစ်ကြေးတိုင်ရထားတာပါ။ ဒီနှစ်မှာလည်း ကြေးတိုင်ဆက်ပေးလို့ ကျွန်တော်က အင်းခွန်တွေ ငါးသားပေါက်ဖိုးတွေက အစ ပေးသွင်းပြီးပါပြီ။ ဒီအချိန်ကျမှ လွှတ်တော်ကိုယ်စားလှယ်ရဲ့ တင်ပြချက်ကြောင့်ဆိုပြီး ကြေးတိုင်ကိုပယ်ဖျက်ပြီး အစုအဖွဲ့ကို ပေးလိုက်ပါတယ်။ လွှတ်တော်ကိုယ်စားလှယ်ရဲ့ တင်ပြချက်တွေကလည်း အကုန်မှားယွင်းနေပါတယ်။ ငါးစပါးပြဿနာတွေ ရှိတယ်လို့ သူကပြောတာလည်း မှားပါတယ်။ ဒီရှင်းလင်းပွဲမှာ အင်းနဲ့ထိစပ်နေတဲ့ တောင်သူတွေအများကြီးပါပါတယ်။ သူတို့ကို မေးလို့ရပါတယ်။ ဘာပြဿနာမှ မရှိပါဘူး။ နောက်တစ်ခုက သူက အင်းတန်ဖိုးကို ငါးသိန်းလို့လိမ်ပြီးတော့ တင်ပြပါတယ်။ အင်းရဲ့ တကယ်တန်ဖိုးဟာ သိန်း ၂၀ ကျော်ပါတယ်။ ဒီလိုလိမ်ပြီးတော့ တင်ပြတာဟာ အဂတိတရားကြောင့်လားဆိုတာကို ဖော်ထုတ်ပေးဖို့ အဂတိလိုက်စားမှု တိုက်ဖျက်ရေး ကော်မရှင်ကိုလည်း ပို့ထားပါတယ်။ သူတို့ချထားပေးတဲ့ အစုအဖွဲ့ ရေလုပ်သားဆိုတာမှာလည်း အင်းနားက လယ်သမား နည်းနည်းပဲပါပါတယ်။ အခုဒီမှာရောက်နေတဲ့ လယ်သမားကြီးတွေကို မေးလို့ရပါတယ်။ အခုလို ကြေးတိုင်ချထားပေးပြီး ငွေကြေးတွေသွင်းပြီး ရင်းနှီးမြှုပ်နှံမှုတွေလုပ်ပြီးမှ လွှတ်တော်ကိုယ်စားလှယ်ရဲ့ မှားယွင်းစွာ တင်ပြချက်ကို အတည်ယူပြီးတော့ အစိုးရအဖွဲ့က ဆုံးဖြတ်ခဲ့တာမှာ ကျွန်တော်တို့ အရမ်းနစ်နာပါတယ်” ဟု ငါးဟင်းဂံ အင်းကြေးတိုင်ရရှိခဲ့သူ ဦးလှဆန်းက ပြောကြားသည်။
အဆိုပါ သတင်းစာ ရှင်းလင်းပွဲနှင့် ပတ်သက်၍ သာပေါင်းမြို့နယ် မဲဆန္ဒနယ်(၂)မှ ဦးအောင်အောင်ဦးထံ ဆက်သွယ်မေးမြန်းရာတွင် “ကြေးတိုင်အင်းတွေကို ပြန်လည်စိစစ်ဖို့ အစိုးရချမှတ်ပေးတဲ့ မူဝါဒတွေအရ ကျွန်တော်တို့ စိစစ်ခဲ့တာမှာ ဒီအင်းဟာ သုံးနှစ်ဆက်တိုက် ငါးစပါးပြဿနာတွေ ဖြစ်ဖူးထားလို့ အစုအဖွဲ့ကို ချထားပေးသင့်ကြောင်း သဘောထားပေးခဲ့တာပါ၊ အစုအဖွဲ့ကို ချထားပေးတာမှာ သိန်း ၄၀ အောက် အင်းတွေကိုဆိုရင် ချထားပေးလို့ရပါတယ်။ အင်းရဲ့တန်ဖိုးကတော့ ငါးသိန်းဆိုတာ အဆောလျင်စွာ ပြောဆိုမိတာပါ” ဟု ပြောကြားသည်။
သာပေါင်းမြို့နယ်အတွင်း ကြေးတိုင်လုပ်ပိုင်ခွင့်ရအင်း ၄၁ အင်းရှိပြီး ငါးဟင်းဂံအင်းလည်း ပါဝင်ကြောင်း သိရသည်။
