ရုရှားနိုင်ငံအခြေစိုက် VK လူမှုကွန်ရက်တွင် ဖွင့်ထားသော ဗိုလ်ချုပ်မှူးကြီးမင်းအောင်လှိုင်၏ Pageကို တွေ့ရစဉ်

ရုရှားနိုင်ငံ အခြေစိုက် VK လူမှုကွန်ရက်တွင် ဗိုလ်ချုပ်မှူးကြီး မင်းအောင်လှိုင် (Senior General Min Aung Hlaing) အပါအဝင် တပ်မတော် ကာကွယ်ရေးဦးစီးချုပ်ရုံးနှင့် မြဝတီသတင်းဌာန၏ page များ ဖွင့်လှစ်ထားကြောင်း သတင်းရရှိသည်။

အဆိုပါ VK လူမှုကွန်ရက်တွင် Senior General Min Aung Hlaing Page အား သြဂုတ် ၂၈ ရက်က စတင် ဖွင့်လှစ်ခဲ့သည်ကို တွေ့ရပြီး ဗိုလ်ချုပ်မှူးကြီး မင်းအောင်လှိုင်၏ ရုရှားခရီးစဉ်များကို ထုတ်ပြန်ထားသည်ကို တွေ့ရပြီး သြဂုတ် ၂၉ ရက် နံနက်ပိုင်းက ဒုတိယသမ္မတ ဦးဟင်နရီဗန်ထီးယူနှင့် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်တို့ ဆွာမြို့ရှိ ဆွာချောင်း ရေလှောင်တမံ ကျိုးပေါက်မှု အခြေအနေများကို သွားရောက် ကြည့်ရှု စစ်ဆေးနေသည့် သတင်းနှင့် ဓာတ်ပုံများကို ယင်း Page တွင် ထုတ်ပြန်ထားသည်ကို တွေ့ရသည်။

လူ့အခွင့်အရေး ချိုးဖောက်မှုများအတွက် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် အခြား ထိပ်တန်း ဗိုလ်ချုပ်များ၏ အကောင့်များကို Facebook က သြဂုတ် ၂၇ ရက်တွင် ဖယ်ရှားခဲ့ပြီးနောက် ယခုကဲ့သို့ VK လူမှုကွန်ရက်တွင် တပ်မတော်နှင့် ပတ်သက်သည့် Page များ ဖွင့်လှစ်လာခြင်းလည်း ဖြစ်သည်။

Facebook ၏ ထုတ်ပြန်ချက်တွင် စုစုပေါင်း Facebook အကောင့် ၁၈ ခု၊ Instagram အကောင့် တစ်ခုနှင့် Follower ၁၂ သန်းနီးပါး ရှိသော Facebook စာမျက်နှာ ၅၂ ခုအား ဖယ်ရှားလိုက်ကြောင်းနှင့် ယင်းအကောင့်များနှင့် စာမျက်နှာများမှ အချက်အလက်များကိုမူ ထိန်းသိမ်းထားကြောင်း ဖော်ပြခဲ့သည်။

တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် မြန်မာ့ တပ်မတော်၏ မြဝတီ ရုပ်မြင်သံကြားကွန်ရက် အပါအဝင် မြန်မာနိုင်ငံမှ လူပုဂ္ဂိုလ်နှင့် အဖွဲ့အစည်း ၂၀ တို့အား ပိတ်ပင်လိုက်သည်ဟု Facebook က ပြောကြားသည်။

ကုလသမဂ္ဂ လူ့အခွင့်အရေးကောင်စီက အာဏာ အပ်နှင်းထားသော မြန်မာနိုင်ငံနှင့် ပတ်သက်သည့် အချက်အလက် ရှာဖွေရေးမစ်ရှင်က သြဂုတ် ၂၇ ရက်၌ပင် ထုတ်ပြန်ခဲ့သော အစီရင်ခံစာ တစ်ရပ်တွင် ယင်းပုဂ္ဂိုလ်များနှင့် အဖွဲ့အစည်းများသည် မြန်မာနိုင်ငံတွင် ပြင်းထန်သည့် လူ့အခွင့်အရေး ချိုးဖောက်မှုများကို ကျူးလွန်ခဲ့ သို့မဟုတ် ထောက်ကူခဲ့ကြောင်း အထောက်အထားများ တွေ့ရှိရသည်ဟု ပြောကြားထားသည်။

Facebook တွင် ချိတ်ဆက်ထားသည့် အစစ်အမှန် မဟုတ်သော အပြုအမူ၌ ပါဝင်နေသည့် စာမျက်နှာ ၄၆ ခုနှင့် အကောင့် ၁၂ ခုကိုလည်း ဖယ်ရှားခဲ့ကြောင်း Facebook က ပြောကြားသည်။

မကြာသေးမီက စုံစမ်းစစ်ဆေးမှု တစ်ရပ်အတွင်း ၎င်းတို့သည် မြန်မာတပ်မတော်၏ မက်ဆေ့ချ်များကို တိတ်တိတ်ပုန်း တွန်းအားပေးသည့် လွတ်လပ်သော သတင်းစာမျက်နှာများနှင့် ထင်မြင်ချက် စာမျက်နှာများအား အသုံးပြုနေကြောင်း တွေ့ရှိခဲ့ရသည်ဟုလည်း Facebook က ပြောကြားခဲ့သည်။ Facebook သည် လူများအား ၎င်းတို့ ပြုလုပ်သည့် အဆက်အသွယ်များကို ယုံကြည်မှုရှိနိုင်စေရန် လိုလားသောကြောင့် ယင်းအပြုအမူမျိုးကို Facebook ၌ ပိတ်ပင်ထားသည်ဟု ဆိုသည်။

ယခုနှစ်အတွင်း အစောပိုင်းက ဖွဲ့စည်းခဲ့သော လွတ်လပ်သည့် လူ့အခွင့်အရေးဆိုင်ရာ ရိုက်ခတ်မှုအား လေ့လာသုံးသပ်မှုမှ တစ်ဆင့် အပါအဝင် Facebook သည် မြန်မာနိုင်ငံ ၌ Facebook နှင့်ပတ်သက်၍ တလွဲအသုံးပြုမှုများကို ကာကွယ်ရန် ဆက်လက် လုပ်ဆောင်သွားမည်ဟုလည်း Facebook က ပြောကြားခဲ့သည်။