သြဂုတ် ၂၀ ရက်တွင် ပေကျင်းရှိ နိုင်ငံတော်ဧည့်ဂေဟာ၌ မလေးရှားဝန်ကြီးချုပ် မဟာသီယာ (ဝဲ ဒုတိယမြောက်) နှင့် တရုတ်သမ္မတရှီကျင်ပင်း (ယာ) တို့ ဆွေးနွေးနေကြစဉ် (Photo - AFP)

သြဂုတ် ၂၁ ရက်တွင် ပေကျင်းသို့ သွားရောက်စဉ်အတွင်း မလေးရှားဝန်ကြီးချုပ် မဟာသီယာမိုဟာမက်က စုစုပေါင်းဒေါ်လာ ၂၂ ဘီလျံတန်ဖိုးရှိ တရုတ်အထောက်အပံ့ယူထားသည့် စီမံကိန်းသုံးခုကို မလေးရှားက ၎င်း၏ ကြွေးမြီများအား ပြန်ဆပ်နိုင်ရန် နည်းလမ်းရှာတွေ့သည်အချိန်အထိ ဖျက်သိမ်းသွားမည်ဖြစ်ကြောင်း အတည်ပြုခဲ့သည်။ ထိုစီမံကိန်းများသည် မလေးရှားအရှေ့ဘက် ကမ်းရိုးတန်းကို ထိုင်းတောင်ပိုင်းနှင့် ကွာလာလမ်ပူနှင့် ချိတ်ဆက်သည့် ရထားလမ်းစီမံကိန်း ECRL နှင့် ဓာတ်ငွေ့ပိုက်လိုင်း စီမံကိန်းနှစ်ခု ဖြစ်ကြသည်။

ECRL စီမံကိန်းအား မလုပ်ဆောင်တော့သည့် အကြောင်းရင်းများအား တရုတ်ခေါင်းဆောင်များကို ရှင်းပြခဲ့ကြောင်း မဟာသီယာက ငါးရက်ကြာ တရုတ်ခရီးစဉ်အပြီးတွင် မလေးရှားသတင်းထောက်များကို ပြောကြားခဲ့သည်။ ငွေကြေးအများအပြား ချေးယူရသော ယင်းစီမံကိန်းများသည် ၎င်းတို့က မတတ်နိုင်သော၊ ကြွေးပြန်မဆပ်နိုင်သော အနေအထားဖြစ်ကြောင်း၊ လက်ရှိတွင် မလေးရှားအတွက် ထိုစီမံကိန်းများလည်း မလိုအပ်သေးကြောင်း၊ လတ်တလောတွင် ၎င်းတို့၏ ဘဏ္ဍာရေးလိုငွေပြမှုကို ဖြေရှင်းရမည်ဖြစ်ကြောင်း မဟာသီယာက ပြောကြားခဲ့သည်။ ဒေါ်လာဘီလျံ ၂၅၀ ခန့်အထိ  မြင့်တက်လာသော မလေးရှားအစိုးရကြွေးမြီကို လျှော့ချနိုင်ရန်လည်း မဟာသီယာက ကြိုးပမ်းနေသည်။

သြဂုတ် ၂၀ ရက်တွင် တရုတ်ဝန်ကြီးချုပ် လီခယ်ကျင်းနှင့် တွေ့ဆုံခဲ့ပြီးနောက် မဟာသီယာက တရုတ်သည် မလေးရှား၏ ဘဏ္ဍာရေးပြဿနာများအား ဖြေရှင်းမှုတွင် အကူအညီပေးမည်ဟု ယုံကြည်ကြောင်း ပြောကြားခဲ့သည်။ ထို့ပြင် လွတ်လပ်စွာ ကုန်သွယ်ရေးအနေအထား၌ ဆင်းရဲသောနိုင်ငံများသည် ချမ်းသာသောနိုင်ငံများနှင့် ယှဉ်နိုင်စွမ်းမရှိသောကြောင့် ကိုလိုနီပုံစံသစ်တစ်မျိုး ဖြစ်ပေါ်နေကြောင်းလည်း မဟာသီယာက သတိပေးခဲ့သည်။

ဒေါ်လာဘီလျံ ၂၀ တန်ဖိုးရှိ ECRL ရထားလမ်းစီမံကိန်းသည် တရုတ်အကြီးဆုံး အင်ဂျင်နီယာကုမ္ပဏီဖြစ်သော China Communication Company နှင့် ကန်ထရိုက်စာချုပ် ချုပ်ထားခြင်းဖြစ်ပြီး တရုတ်ပို့ကုန်သွင်းကုန်ဘဏ်မှ ချေးငွေဖြင့် အများဆုံးထောက်ပံ့ထားသည်။ ဒေါ်လာ ၂ ဒသမ ၃၂ ဘီလျံကုန်ကျမည့် ဓာတ်ငွေ့ပိုက်လိုင်း စီမံကိန်းကုန်ကျစရိတ်၏ ၈၈ ရာခိုင်နှုန်းကို တရုတ်ကန်ထ ရိုက်ကုမ္ပဏီထံ ပေးထားပြီးဖြစ်သော်လည်း စီမံကိန်းသည် ၁၃ ရာခိုင်နှုန်းသာပြီးစီးသေးကြောင်း မလေးရှားဘဏ္ဍာရေးဝန်ကြီးဌာနက ပြီးခဲ့သော ဇူလိုင်တွင် ထုတ်ပြန်ခဲ့သည်။

ထိုပိုက်လိုင်းစီမံကိန်းတစ်ခုသည် ဘော်နီယိုကျွန်းစုရှိ ဆာဘားပြည်နယ်တွင် လုပ်ဆောင်နေပြီး အခြားစီမံကိန်းမှာ မလေးရှားကျွန်းစုရှိ မလက္ကာမှမြောက်ဘက်ရှိ ကဒါးပြည်နယ်သို့ ချိတ်ဆက်ဖောက်လုပ်မည် ဖြစ်သည်။ တရုတ်နှင့်ဆက်နွှယ်သော သဘောတူညီချက်များအား ပြန်လည်ပြင်ဆင်ရန် ညှိနှိုင်းသွားမည်ဟု ခြိမ်းခြောက်ထားသော်လည်း မဟာသီယာက နှစ်နိုင်ငံအကြား စီးပွားရေးဆက်ဆံရေး ခိုင်မာစေရန် တရုတ်ခရီးစဉ်အတွင်း ကြိုးပမ်းခဲ့သည်။

ပြီးခဲ့သောမေတွင်လည်း မဟာသီယာသည် စင်ကာပူနှင့် မလေးရှားတို့အကြား နှစ်ပေါင်းများစွာက သဘောတူညီချက်ရထားသည့် အမြန်ရထားလမ်းတည်ဆောက်ရန် အစီအစဉ်အများအပြားကိုလည်း ကုန်ကျစရိတ်များပြားသည်ဟုဆိုကာ ရွှေ့ဆိုင်းခဲ့သည်။

Ref ; AFP