၂၀၁၇ ခုနှစ် တက္ကသိုလ်ဝင် စာမေးပွဲတွင် မန္တလေး အိုးဘိုအကျဉ်းထောင်မှ အောင်မြင်ခဲ့သူများအား ပြစ်ဒဏ်လျှော့ပေးခဲ့သည့် အခမ်းအနား ပြုလုပ်စဉ်
ယခုနှစ် တက္ကသိုလ်ဝင်စာမေးပွဲတွင် မန္တလေး အိုးဘိုအကျဉ်းထောင်မှ အောင်မြင်ခဲ့သူများကို ပြစ်ဒဏ်လျှော့ပေးခဲ့ရာ သြဂုတ် ၁၈ ရက်တွင် သုံးဦးလွတ်မြောက်ခဲ့ကြောင်း သတင်းရရှိသည်။
“ဂုဏ်ထူးတစ်ဘာသာနဲ့ ရိုးရိုးအောင်မြင်သူတွေကို ပြစ်ဒဏ်ရဲ့ လေးပုံတစ်ပုံ လျှော့ပေးပါတယ်။ ဂုဏ်ထူးနှစ်ဘာသာနဲ့ အထက်ကိုတော့ ပြစ်ဒဏ်ရဲ့ထက်ဝက် လျှော့ချပေးပါတယ်။ တစ်နှစ်အောက် ပြစ်ဒဏ်ကျန်ရှိနေသူတွေကို လွတ်ငြိမ်းချမ်းသာခွင့် ပေးပါတယ်။ ကျောင်းသား ကျောင်းသူတွေကို ပြင်ပလောကမှာ တက္ကသိုလ်ပညာတွေ ဆက်လက်သင်ကြားစေဖို့ရယ်၊ လူမှုရေးအရ ငဲ့ညှာမှုရယ်၊ နိုင်ငံတော်ရဲ့ စေတနာကို နားလည်ပြီး နိုင်ငံအတွက် အကျိုးပြုမယ့် သားကောင်း သမီးရတနာတွေဖြစ်ဖို့ ရည်ရွယ်ပြီး နိုင်ငံတော်သမ္မတကြီးက လွှတ်ပေးတာပါ” ဟု အိုးဘိုအကျဉ်းထောင်မှ ထောင်ပိုင်ကြီး ဦးထွန်းထွန်းက ပြောကြားသည်။
ယနေ့လွတ်မြောက်ခဲ့သူများမှာ နှစ်ဘာသာဂုဏ်ထူးရှင် မောင်ထွန်းကိုကို၊ တစ်ဘာသာ ဂုဏ်ထူးရှင် မောင်ဇင်မင်းထွန်းနှင့် မလုပန်တို့ ဖြစ်ကြောင်း သိရသည်။
အဆိုပါ သုံးဦးသည် ကျခံရမည့်ပြစ်ဒဏ် တစ်နှစ်အောက်သာ ကျန်ရှိတော့သဖြင့် လွတ်မြောက်ခဲ့ခြင်း ဖြစ်ကြောင်း သိရသည်။ ကျန်ရှိနေသေးသည့် သူများမှာလည်း ရိုးရိုးအောင်မြင်သူနှင့် တစ်ဘာသာ ဂုဏ်ထူးရှင်များသည် ပြစ်ဒဏ်၏ လေးပုံတစ်ပုံ လျှော့ခြင်း၊ နှစ်ဘာသာနှင့်အထက် ဂုဏ်ထူးရှင်များသည် ပြစ်ဒဏ်၏ ထက်ဝက်လျှော့ပေးသည့် ခံစားခွင့်များ ရရှိမည်ဖြစ်သည်။
ယခုနှစ်၂၀၁၇ တက္ကသိုလ်ဝင်စာမေးပွဲတွင် မန္တလေး အိုးဘိုအကျဉ်းထောင်မှ ဝင်ရောက်ဖြေဆိုသူ ၅၅ ဦးအနက် ၂၇ ဦး အောင်မြင်ခဲ့ရာ သုံးဘာသာဂုဏ်ထူးရှင် လေးဦး၊ နှစ်ဘာသာဂုဏ်ထူးရှင် လေးဦး၊ တစ်ဘာသာ ဂုဏ်ထူးရှင် ၁၃ ဦးနှင့် ရိုးရိုးအောင်မြင်သူ ခြောက်ဦးရှိခဲ့သဖြင့် အောင်ချက်ရာခိုင်နှုန်းမှာ ၄၉ ဒသမ ၁၀ ရာခိုင်နှုန်း ရှိခဲ့သည်ဟု သိရသည်။
ယခင်နှစ် ၂၀၁၆ ကဝင်ရောက် ဖြေဆိုသူမှာ ၁၁ ဦးသာရှိခဲ့ပြီး ယခုနှစ် ဆယ်တန်းစာမေးပွဲဝင် ရောက်ဖြေဆိုသူမှာ ၅၅ ဦးထိရှိခဲ့သောကြောင့် ငါးဆခန့် များပြားခဲ့သည်ဟု သိရသည်။
ယခင်နှစ်များက အိုးဘိုထောင်မှ ဆယ်တန်းစာမေးပွဲ ဖြေဆိုလိုသူများ အနေဖြင့် ရန်ကုန်အင်းစိန် စာစစ်ဌာနသို့ သွားရောက်ဖြေဆိုရသဖြင့် ထောင်ဝင်စာ အခက်အခဲ ရှိသောကြောင့် ဖြေဆိုမှု နည်းပါးခဲ့ကြောင်း၊ ထို့ကြောင့် ၂၀၁၆-၂၀၁၇ စာသင်နှစ်မှစတင်ပြီး မန္တလေး အိုးဘိုအကျဉ်းဦးစီးဌာနတွင်သာ စာစစ်ဌာနပြုလုပ်၍ ဖြေဆိုစေခဲ့ကြောင်း၊ အကျဉ်းသားများထဲမှ ကျောင်းဆရာဟောင်းများက ပညာသင်ကြားပေးခဲ့ခြင်း ဖြစ်သည်။
ယခုနှစ်၂၀၁၇-၂၀၁၈ တွင် ဝင်ရောက်ဖြေဆိုသူမှာ ၅၅ ဦးထိရှိခဲ့သောကြောင့် အကျဉ်းသားဆရာများ အပါအဝင် ပညာဒါန ပြုလုပ်လိုသူ ပြင်ပဆရာများက ပါဝင်ရောက် သင်ကြားပေးခဲ့ခြင်း ဖြစ်သည်။
၂၀၁၆-၂၀၁၇ ခုနှစ် ပညာသင်နှစ်တွင် မန္တလေးအိုးဘိုအကျဉ်းထောင် စာစစ်ဌာနမှနေ၍ ဝင်ရောက်ဖြေဆိုခဲ့သူ ၁၁ ဦးအနက် ခုနစ်ဦးအောင်မြင်ကာ သုံးဘာသာဂုဏ်ထူးရှင်တစ်ဦး၊ တစ်ဘာသာ ဂုဏ်ထူးရှင်လေးဦးနှင့် ရိုးရိုးအောင်မြင်သူနှစ်ဦး ပေါ်ထွက်ခဲ့ကြောင်းနှင့် မြန်မာနိုင်ငံ အကျဉ်းဦးစီးဌာန အနေဖြင့် အိုးဘိုအကျဉ်းထောင်သည် သုံးဘာသာ ဂုဏ်ထူးရှင် ပထမဆုံး ပေါ်ထွက်ခဲ့ခြင်းလည်းဖြစ်သည်။
အဆိုပါ သုံးဘာသာ ဂုဏ်ထူးထွက်ရှိခဲ့သည့် ရွှန်းလဲ့ဝေကျော် (၁၉နှစ်) မှာ မူးယစ်ဆေးဝါးမှုဖြင့် ထောင်ဒဏ် ၁၀ နှစ် ကျခံနေရသူဖြစ်ပြီး သူမအပါအဝင် တက္ကသိုလ်ဝင် တန်းစာမေးပွဲတွင် ဂုဏ်ထူးဖြင့် အောင်မြင်ခဲ့သည့် အကျဉ်းကျခံနေရသူ ငါးဦးကို သမ္မတလွတ်ငြိမ်းချမ်းသာဖြင့် ၂၀၁၇ နှစ် သြဂုတ် ၇ ရက်က လွှတ်ပေးခဲ့ကြောင်း သိရသည်။
