မိုဘိုင်းဖုန်းများတွင် အခွန်တံဆိပ်ခေါင်းကပ်ရန် စီစဉ်နေဆဲဖြစ်ကြောင်း ပြည်တွင်းအခွန်များ ဦးစီးဌာနမှ သတင်းရရှိသည်။ မိုဘိုင်းဖုန်းများတွင် အခွန်တံဆိပ်ခေါင်းကပ်မည့် အစီအစဉ်နှင့်ပတ်သက်၍ ဝယ်ယူသုံးစွဲမည့်သူများအကြားတွင် နားလည်မှုလွဲမှား ခြင်းများရှိနေကြောင်း သိရသည်။
“မိုဘိုင်းဖုန်းတွေမှာ အခွန်တံဆိပ်ခေါင်း ကပ်မှာနဲ့ပတ်သက်ပြီး စီစဉ်နေတုန်း ဖြစ်ပါတယ်။ ဈေးကွက်ထဲမှာ လုပ်ဆောင်သွားဖို့ရှိပါတယ်” ဟု ပြည်တွင်းအခွန်များ ဦးစီးဌာနမှ တာဝန်ရှိသူက ပြောကြားသည်။
တင်သွင်းဖြန့်ချိသူအနေဖြင့် နိုင်ငံခြားမှ စတင်တင်သွင်းရာတွင် အကောက်ခွန် ငါးရာခိုင်နှုန်း၊ ကုန်သွယ်လုပ်ငန်းခွန် ငါးရာခိုင်နှုန်းနှင့် ကြိုတင်ခွန် နှစ်ရာခိုင်နှုန်းဖြစ်ကြောင်း သိရသည်။ အာဆီယံနိုင်ငံအတွင်းရှိ စက်ရုံများမှ ထုတ်လုပ်သော ပစ္စည်းများကို တင်သွင်းရာတွင် AEC သဘောတူညီချက်အရ အကောက်ခွန်ငါးရာခိုင်နှုန်း ကင်းလွတ်ခွင့် ရရှိမည်ဖြစ်သည်။ တင်သွင်းသူကဆိုင်များသို့ ပြန်လည်ရောင်းချရာတွင် ကျပ်တစ်သိန်းတန်ဖုန်းကို ငါးရာခိုင်နှုန်း ထပ်ဆောင်း ကောက်ခံကာ ကျပ် ၁၀၅၀၀၀ တောင်းခံပြီး အဆိုပါ ကျပ်ငါးထောင်ကို အခွန်ရုံးသို့ ဆိုင်နာမည်ဖြင့်ပေးသွင်းကာ Form 31 ထုတ်ယူ၍ ဆိုင်သို့ပြန်လည်ပေးအပ်ထားရမည်ဖြစ်ကြောင်း သိရသည်။
Form 31 ကို ရောင်းချသူထံမှမကောက်ဘဲ ဆောင်ပေးခြင်းမှာမူ သက်ဆိုင်ရာ အမှတ်တံဆိပ်အလိုက် မူဝါဒအပေါ်တွင်သာ မူတည်ကြောင်းသိရသည်။
ပြသရောင်းချသူအနေဖြင့် တင်သွင်း ရောင်းချသူထံမှ Form 31 ကိုရယူထားရန် လိုအပ်ပြီး ရယူထားခြင်းမရှိပါက တင်သွင်းသူအစား ရောင်းချသူ ဖုန်းဆိုင်အနေဖြင့် ရောင်းချမည့်တန်ဖိုးအပြည့်နီးပါးအပေါ် ကုန်သွယ်လုပ်ငန်းခွန် ငါးရာခိုင်နှုန်း ပေးဆောင်ရန် တာဝန်ရှိလာမည်ဖြစ်ကြောင်း သိရသည်။
တင်သွင်းသူမှ အခွန်ဆောင်ထားပြီးသား ဖြစ်ပါက ရောင်းချသူအနေဖြင့် အမြတ်တင်ရောင်းချသည့် တန်ဖိုးကွာခြားချက်အပေါ်တွင်သာ ငါးရာခိုင်နှုန်းအခွန်ပေးဆောင်ရန် လိုအပ်ကြောင်း သိရသည်။ ကျပ်တစ်သိန်းတန်ဖုန်းကို တင်သွင်းသူက အခွန်ဆောင်ထား ပြီးသားဖြစ်ပါက ရောင်းချသူအနေဖြင့် ကျပ် ၁၁၀၀၀၀ ဖြင့်ရောင်းချမည်ဆိုပါက ကျပ်တစ်သောင်းအပေါ်တွင်သာ အခွန်ငါးရာခိုင်နှုန်း ပေးဆောင်ရန် လိုအပ်ခြင်းဖြစ်သည်။ တင်သွင်းသူကအခွန်ဆောင်ထားခြင်း မရှိလျှင် ရောင်းချသူအနေဖြင့် ကျပ် ၁၁၀၀၀၀ အပေါ်တွင် ငါးရာခိုင်နှုန်း အခွန်ပေးဆောင်ရန် တာဝန်ရှိလာမည် ဖြစ်သည်။
ထို့ကြောင့် သုံးစွဲသူအချို့ယူဆနေသကဲ့သို့ စမတ်ဖုန်းများ ဝယ်ယူရာတွင် ဝယ်ယူမည့်တန်ဖိုးအပေါ် ဝယ်ယူသုံးစွဲသူက အခွန်ဆောင်ရမည် မဟုတ်ကြောင်း သိရသည်။ ယခင်ကပင် တရားဝင် အာမခံပါရှိသော အလုံးနှင့် နယ်စပ်သွင်း အလုံးတို့မှာ ဈေးကွက် အတွင်း ဈေးနှုန်းကွာခြားမှုများ ရှိနေကြောင်း သိရသည်။
သို့သော် အခွန်မဆောင်သော မိုဘိုင်းဖုန်းများအပေါ် ကိုင်တွယ်မှု အားနည်းပါက ဈေးကွက်ယှဉ်ပြိုင်မှုတွင် အခွန်ဆောင်သော မိုဘိုင်းဖုန်းများနှင့် အခွန်ဆောင်ထားခြင်း မရှိသော မိုဘိုင်းဖုန်းများအကြား အခက်အခဲများ ဖြစ်ပေါ်လာနိုင်ကြောင်း လုပ်ငန်းရှင်များက သုံးသပ်ကြသည်။
