သန့်ရှင်းသောစွမ်းအင် အကြောင်းနှင့် ပတ်သက်ပြီး မီဒီယာတွေ့ဆုံပွဲ ပြုလုပ်စဉ်
ယခုနှစ်အတွင်း ကရင်ပြည်နယ်နှင့် တနင်္သာရီတိုင်းဒေသကြီး အတွင်းရှိ ရွာကိုးရွာမှ အိမ်ခြေ တစ်ထောင်ခန့်အား ဆိုလာမီး ဖြန့်ဖြူးပေးနိုင်ရန် ဆောင်ရွက်နေကြောင်း WWF မှ စွမ်းအင်ဌာနမန်နေဂျာ ဦးရွှန်းစိုဦးက သြဂုတ် ၇ ရက်တွင် ရန်ကုန်မြို့ သံတမန်လမ်းရှိ WWF ရုံးတွင်ပြုလုပ်သည့် သန့်ရှင်းသော စွမ်းအင်အကြောင်းနှင့် ပတ်သက်ပြီး မီဒီယာတွေ့ဆုံပွဲတွင် ပြောကြားသည်။
“နှစ်မကုန်ခင်မှာ အိမ်ခြေတစ်ထောင် ဆိုလာနဲ့ မီးလင်းတော့မှာပါ။ ပြည်နယ်၊ တိုင်းဒေသကြီး အစိုးရက ဦးဆောင်မယ်ဆိုရင် ကျွန်တော်တို့ဘက်က အကူအညီ အလုံးအရင်းနဲ့ ပံ့ပိုးပေးနိုင်ဖို့ပေါ့။ တနင်္သာရီမှာ ရွာခြောက်ရွာ အိမ်ခြေ ၇၅၀ လောက်၊ ကရင်မှာက ရွာနှစ်ရွာ အိမ်ခြေ ၂၅၀ လောက်ဆိုလာနဲ့ မီးပေးနိုင်ဖို့ လုပ်နေတာပါ” ဟု WWF မှ စွမ်းအင်ဌာန မန်နေဂျာ ဦးရွှန်းစိုဦးက ပြောကြားသည်။
လျှပ်စစ်မီးသည် အမြဲတမ်းလိုအပ်နေကြောင်း၊ အစိုးရဘက်မှ ဦးဆောင်ပေးမည်ဆိုပါက ဝိုင်းဝန်းကူညီမည် ဖြစ်ကြောင်း ဦးရွှန်းစိုဦးက ပြောကြားသည်။
“မြန်မာနိုင်ငံက ဖွံ့ဖြိုးတိုးတက်ဆဲနိုင်ငံလေ။ ဟိုဟာမလုပ်နဲ့ ဒီဟာမလုပ်နဲ့ ပြောမယ့်အစား လက်ရှိမှာတော့ အစိုးရအဖွဲ့အစည်းတွေရော လူမှုအဖွဲ့အစည်းတွေရော ပူးပေါင်းပြီးတော့ ၂၀၁၇ ခုနှစ်မှာဆို မြန်မာနိုင်ငံအတွက် စွမ်းအင်ဘယ်လို ထုတ်လုပ်လို့ရလဲ ဆိုတာကို Clean Energy ပေါ် မူတည်ပြီး report တစ်ခုထုတ်လိုက်တယ်။ အဲဒီကနေပြီး ဘာတွေဆင့်ပွား ဖြစ်လာလဲဆိုရင် အစိုးရနဲ့ပူးပေါင်းပြီး အစိုးရဝန်ထမ်း ၂၂ ယောက်ကို ပြန်လည်ပြည့်ဖြိုးမြဲစွမ်းအင် ဝင်လာရင် ဘယ်လိုလုပ်ရမလဲ ဆိုတာကို နှစ်နှစ်ပရောဂျက်နဲ့ သင်ကြားပေးနေတယ်” ဟု ဦးရွှန်းစိုဦးက ပြောကြားသည်။
ထို့ပြင် မြန်မာနိုင်ငံတွင် ပြန်ပြည့်မြဲစွမ်းအင်အတွက် ဥရောပအဖွဲ့အစည်းများမှ ဒေါ်လာသန်းနှင့်ချီ ထောက်ပံ့ပေးမည့် ကိစ္စများ ရှိနေကြောင်း၊ လက်ရှိတွင် WWF နှင့် ဒိန်းမတ်၊ ဆွီဒင်အစိုးရ၊ ပုဂ္ဂလိက လုပ်ငန်းရှင်များ၊ နိုင်ငံတကာမှ ပညာရှင်များက နည်းပညာအကူအညီများ၊ ငွေကြေးအထောက်အပံ့များ ပေးနေကြောင်း ဦးရွှန်းစိုဦးက ပြောကြားသည်။
မြန်မာနိုင်ငံ၏ ရာခိုင်နှုန်း ၇၀ သည် လျှပ်စစ်မီးကို သုံးစွဲနိုင်ခြင်း မရှိသေးကြောင်း၊ နေရောင်ခြည်၊ လေနှင့် သဘာဝဓာတ်ငွေ့များ ရရှိနိုင်သည့် အချိန်တွင် ပြန်လည်ပြည့်ဖြိုး မြဲရင်းမြစ်များကို ထပ်တိုးအသုံးပြုပါက စွမ်းအင်ပြဿနာကို ဖြေရှင်းနိုင်သည့်အပြင် ၁၀၀ ရာခိုင်နှုန်း သန့်ရှင်းသော စွမ်းအင်အနာဂတ်ကို ဖော်ဆောင်နိုင်မည်ဖြစ်သည်။
သန့်ရှင်းသော စွမ်းအင်အကြောင်းနှင့် ပတ်သက်ပြီး မီဒီယာတွေ့ဆုံပွဲ ပြုလုပ်ရခြင်းမှာ မြန်မာနိုင်ငံအတွက် အသင့်တော်ဆုံးဖြစ်သည့် သန့်ရှင်းသောစွမ်းအင် အကြောင်းနှင့် ပတ်သက်ပြီး လုပ်ဆောင်ရန် လိုအပ်သည့် ကိစ္စရပ်များကို ပိုမိုပြည့်စုံစွာ နားလည်သဘော ပေါက်စေရန်အတွက် လုပ်ဆောင်ခဲ့ခြင်းဖြစ်ကြောင်း သိရသည်။
