ဂွမြို့နယ်အတွင်းမှ မိုးစပါးစိုက်ပျိုးနေမှုမြင်ကွင်း (ဓာတ်ပုံ- သားကြီး)
ရခိုင်ပြည်နယ်အတွင်း မိုးစပါးစိုက်ပျိုးရန်အတွက် တောင်သူများအား ချေးငွေထုတ်ချေးမှုကို အချိန်ထပ်မံတိုးမြှင့်ခဲ့ကြောင်းနှင့် သြဂုတ် ၃၁ ရက်အထိ ထုတ်ချေးမည်ဖြစ်ကြောင်း သိရသည်။
မြန်မာ့လယ်ယာဖွံ့ဖြိုးတိုးတက်ရေးဘဏ် အနေဖြင့် နှစ်စဉ် မေမှ စက်တင်ဘာလ ကုန်အထိ မိုးစပါးစိုက်ပျိုးစရိတ်ချေးငွေထုတ် ချေးလေ့ရှိသော်လည်း ယခုနှစ်တွင် လုပ်ငန်း ကြန့်ကြာမှုများ ရှိနေသည့်အတွက် သြဂုတ်လအထိ ထပ်မံတိုးချဲ့ထုတ်ချေးပေးနေခြင်း ဖြစ်ကာ ရခိုင်ပြည်နယ်ရှိ မြို့နယ် ၁၇ မြို့နယ် အတွင်း ထုတ်ချေးပေးနေခြင်းဖြစ်ကြောင်း သိရသည်။
“တောင်သူတွေရဲ့ကြွေးဆပ်တာ နောက်ကျမှုတွေ ပါတယ်။ လုပ်ငန်းလုပ်ကိုင်ရတာ နှောင့်နှေးကြန့်ကြာမှုတွေရှိတဲ့အတွက် သတ်မှတ်ကာလမှာ မပြီးနိုင်ခဲ့ဘူး။ အဲဒါကြောင့် ရုံးချုပ်ကနေပြီးတော့ ထပ်ပြီးတော့ အချိန် နှစ်လ ထပ်တိုးလိုက်တယ်။ သြဂုတ် ၃၁ ရက် နောက်ဆုံးထားပြီး ထုတ်ချေးပေးဖို့ ဖြစ်ပါတယ်။ အခုဆိုရင် တောင်သူ ၉၂,၀၀၀ ကျော်အတွက် ကျပ် ၆၉ ဒသမ ၁၉ ဘီလျံကို ထုတ် ပေးထားပြီးဖြစ်တယ်။ နောက်ထပ် တောင်သူ ၆၀,၀၀၀ ခန့်ကိုလည်း ထုတ်ချေးပေးသွားဖို့ ရှိပါတယ်။ ကျန်တာတွေက တောင်သူဦးရေ များပြားတဲ့ ကျောက်တော်၊ မင်းပြားမြို့နယ်တို့က တောင်သူတွေ အများအားဖြင့် ပါဝင်တယ်” ဟု မြန်မာ့လယ်ယာဖွံ့ဖြိုးတိုးတက်ရေး ဘဏ်မှ မန်နေဂျာဦးအေးသိန်းက ပြောကြားသည်။
ထို့ပြင် ယခုနှစ်တွင် တောင်သူအရေအတွက် ယခင်နှစ်ထက်များလာသည့်အတွက် တောင်သူများအား ချေးငွေထုတ်ချေးမှုအပိုင်းတွင် ကျပ်သန်း ၄၅၀ ခန့် တိုးမြှင့်ချေး မည်ဖြစ်ကြောင်း သိရသည်။
