ကမ္ဘာ့အပူဆုံးမြို့ ၁၅ မြို့တွင် မြန်မာနိုင်ငံမှ ချောက်မြို့သည် ထိပ်ဆုံးမှ ရပ်တည်နေပြီး မကွေး၊ မင်းဘူး၊ ညောင်ဦးနှင့် စစ်ကိုင်းမြို့များလည်း ပါဝင်ကြောင်း မိုးလေဝသသတင်းများ ဖော်ပြလျက်ရှိသည့် Eldoradoweather ၌ ဖော်ပြထားသည်။
ဧပြီ ၂၃ ရက်တွင် ကမ္ဘာ့အပူဆုံးမြို့ ၁၅ မြို့တွင် မြန်မာနိုင်ငံမှချောက်မြို့သည် ၄၅ ဒသမ ၈ ဒီဂရီစင်တီဂရိတ်တွင်ရှိကာ နံပါတ် (၁) အဖြစ် ရပ်တည်လျက်ရှိသည်။
မကွေးမြို့သည် ၄၅ ဒီဂရီစင်တီဂရိတ်နှင့် နံပါတ် (၃) နေရာတွင်ရှိနေပြီး မင်းဘူးမြို့မှာ ၄၄ ဒသမ ၅ ဒီဂရီစင်တီဂရိတ်ဖြင့် နံပါတ် (၇) နေရာတွင်ရှိနေသည်ကို တွေ့ရသည်။
ညောင်ဦးမြို့သည် ၄၄ ဒသမ ၅ ဒီဂရီစင်တီဂရိတ်ဖြင့် နံပါတ် (၈) နေရာတွင်လည်းကောင်း၊ စစ်ကိုင်းမြို့မှာ ၄၃ ဒသမ ၈ ဒီဂရီစင်တီဂရိတ်ဖြင့် နံပါတ် (၁၅) နေရာတွင်လည်းကောင်း တည်ရှိနေသည်ကို တွေ့ရသည်။
မကွေးတိုင်းဒေသကြီး ချောက်မြို့သည် ဧပြီလမှစတင်ပြီး ကမ္ဘာ့အပူဆုံးမြို့များတွင် ထိပ်ဆုံးနေရာ၌ ရောက်ရှိနေသည့်မြို့တစ်မြို့လည်းဖြစ်သည်။
မြန်မာနိုင်ငံ မိုးလေဝသနှင့် ဇလဗေဒညွန်ကြားမှုဦးစီးဌာန၏ ထုတ်ပြန်ချက်များအရ ဧပြီလတတိယပတ်အတွင်း မြန်မာနိုင်ငံအလယ်ပိုင်းဒေသများတွင် ဧပြီလပျမ်းမျှအပူချိန်၏ ၁ ဒသမ ၅ ဒီဂရီ ဆဲလ်စီးယပ်နှင့်အထက် နေ့အပူချိန်ပိုနိုင်ကြောင်း ထုတ်ပြန်ခဲ့သည်။
နေပြည်တော်၊ စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ရှမ်းပြည်နယ်၊ ကယားပြည်နယ်နှင့် မွန်ပြည်နယ်တို့တွင် ဧပြီလပျမ်းမျှအပူချိန်၏ ၁ ဒသမ ၅ ဒီဂရီဆဲလ်စီးယပ်နှင့်အထက် ပိုနိုင်ပြီး ကချင်၊ ချင်း၊ ရခိုင်နှင့် ကရင်ပြည်နယ်တို့တွင် ဧပြီလပျမ်းမျှအပူချိန်ခန့်သာရှိနိုင်ကြောင်း မိုးဇလက ထုတ်ပြန်ခဲ့သည်။
