ငွေစက္ကူ အပါအဝင် အရေးကြီးသော စာရွက်စာတမ်းများ ရိုက်ထုတ်နေသည့် လုံခြုံရေးနှင့်ဆိုင်သော ပုံနှိပ်လုပ်ငန်းများမှ ဘဏ္ဍာနှစ်စဉ် အမြတ်အစွန်းရရှိနေပြီး လာမည့် ၂၀၁၈-၂၀၁၉ ဘဏ္ဍာနှစ်အတွက် ကျပ်သန်းပေါင်း ၂၅၉၂၆ ကျော်ရရှိရန် ခန့်မှန်းထားကြောင်း စီမံကိန်းနှင့် ဘဏ္ဍာရေးဝန်ကြီးဌာနမှ သိရသည်။
ပြည်ထောင်စုဘဏ္ဍာရန်ပုံငွေ အစီအစဉ်ဖြင့် ဆောင်ရွက်သော နိုင်ငံတော်စီးပွားရေး အဖွဲ့အစည်းများအဖြစ် ၂၆ ဖွဲ့အထိ ရှိနေပြီး စီမံကိန်းနှင့် ဘဏ္ဍာရေးဝန်ကြီးဌာန၏ လက်အောက်တွင် မြန်မာ့စီးပွားရေးဘဏ်၊ မြန်မာ့ရင်းနှီးမြှုပ်နှံမှုနှင့် ကူးသန်းရေးဘဏ်၊ မြန်မာ့နိုင်ငံခြား ကုန်သွယ်မှုဘဏ်၊ မြန်မာ့လယ်ယာဖွံ့ဖြိုးရေးဘဏ်၊ မြန်မာ့အာမခံလုပ်ငန်းနှင့် လုံခြုံရေးနှင့်ဆိုင်သော ပုံနှိပ်လုပ်ငန်းများ စသည့် ခြောက်ဖွဲ့ရှိနေကြောင်း ဖော်ပြထားသည်။
စီမံကိန်းနှင့် ဘဏ္ဍာရေးဝန်ကြီးဌာန အနေဖြင့် ယင်းလုပ်ငန်း ခြောက်ခုမှ ကျပ်သန်းပေါင်း ၁၉၂၅၁၅ ကျော် အမြတ်အစွန်း ရရှိရန် ခန့်မှန်းထားပြီး မြန်မာ့စီးပွားရေးဘဏ်မှ ကျပ်သန်းပေါင်း ၁၁၂၅၄ ကျော်၊ မြန်မာ့ရင်းနှီးမြှုပ်နှံမှုနှင့် ကူးသန်းရေးဘဏ်မှ ကျပ်သန်းပေါင်း ၃၈၉၃၆ ကျော်၊ မြန်မာ့နိုင်ငံခြား ကုန်သွယ်မှုဘဏ်မှ ကျပ်သန်းပေါင်း ၂၆၅၅၇ ကျော်၊ မြန်မာ့လယ်ယာဖွံ့ဖြိုးရေးဘဏ်မှ ကျပ်သန်းပေါင်း ၅၁၄၂၀ ကျော်၊ မြန်မာ့ အာမခံလုပ်ငန်းမှ ကျပ်သန်းပေါင်း ၃၈၄၂၀ ကျော်နှင့် လုံခြုံရေးနှင့် ဆိုင်သော ပုံနှိပ်လုပ်ငန်းများမှ ကျပ်သန်းပေါင်း ၂၅၉၂၆ ကျော်ရရှိရန် ခန့်မှန်းထားကြောင်း သိရသည်။
လုံခြုံရေးနှင့် ဆိုင်သော ပုံနှိပ်လုပ်ငန်းများမှ ဘဏ္ဍာနှစ်အလိုက် ရရှိခဲ့သည့် အမြတ်အစွန်းများမှာ ၂၀၁၆-၂၀၁၇ ဘဏ္ဍာနှစ် ရှေ့ပြေး အမှန်စာရင်းအရ အသုံးစရိတ် ကျပ်သန်းပေါင်း ၄၅၀၂၂ ကျော်နှင့် ဝင်ငွေ ကျပ်သန်းပေါင်း ၉၄၆၂၂ ကျော် ရရှိခဲ့၍ ကျပ် ၄၉၅၅၉ သန်းကျော် အမြတ်အစွန်း ရရှိခဲ့ကြောင်း သိရသည်။
၂၀၁၇-၂၀၁၈ ဘဏ္ဍာနှစ် ယာယီ အမှန်စာရင်းအရ အသုံးစရိတ် ကျပ်သန်း ၅၀၇၉၆ ကျော်နှင့် ဝင်ငွေ ကျပ်သန်းပေါင်း ၇၆၈၃၅ ကျော် ရရှိခဲ့၍ ကျပ်သန်း ၂၆၀၃၈ ကျော် အမြတ်အစွန်း ရရှိခဲ့ကြောင်း သိရသည်။
ထို့ပြင် ၂၀၁၈ ဘဏ္ဍာနှစ်တိုတွင် မူလ ခန့်မှန်းခြေအရ ဝင်ငွေ ကျပ်သန်း ၃၉၀၀၀ ရှိပြီး အသုံးစရိတ် ကျပ် ၁၈၈၁၀ သန်းကျော် ဖြစ်၍ ကျပ် ၂၀၁၈၉ သန်းကျော် အမြတ်အစွန်း ရရှိကာ ၂၀၁၈-၂၀၁၉ ဘဏ္ဍာနှစ်တွင်မူ လုံခြုံရေးနှင့် ဆိုင်သော ပုံနှိပ်လုပ်ငန်းများမှ ဝင်ငွေအဖြစ် ကျပ်သန်းပေါင်း ၇၃၀၀၀ ရရှိရန် ခန့်မှန်းထားပြီး အသုံးစရိတ် ကျပ်သန်း ၄၇၀၇၃ ကျော် ရှိရန် ခန့်မှန်းထားကာ အမြတ်အစွန်းအဖြစ် ကျပ်သန်းပေါင်း ၂၅၉၂၆ ကျော် ရရှိရန် ခန့်မှန်းထားကြောင်း စီမံကိန်းနှင့် ဘဏ္ဍာရေးဝန်ကြီးဌာနမှ သိရသည်။
ငွေစက္ကူ၊ ထီလက်မှတ်၊ စာချုပ်များနှင့် တံဆိပ်ခေါင်းများ ရိုက်ထုတ်နေသည့် လုံခြုံရေးနှင့် ဆိုင်သော ပုံနှိပ်လုပ်ငန်းများစက်ရုံကို ယခင်က ကာကွယ်ရေးဝန်ကြီးဌာန၏ လက်အောက်တွင် တည်ရှိကြောင်း ဖော်ပြခဲ့သည်။ ၂၀၁၈ ဘဏ္ဍာနှစ်တို၏ ၂၀၁၈ ခုနှစ် ပြည်ထောင်စု၏ အခွန်အကောက် ဥပဒေပုဒ်မ ၁၄ (ဃ) ၏ ကုန်သွယ်လုပ်ငန်းခွန် မကျသင့်စေရ သတ်မှတ်ချက် ၂၃ တွင် “ကာကွယ်ရေးဝန်ကြီးဌာန၏ လုံခြုံရေးနှင့်ဆိုင်သော ပုံနှိပ်လုပ်ငန်းမှ ပုံနှိပ်ထုတ်ဝေမှု၊ ဝန်ဆောင်မှု လုပ်ငန်းများ”ကို ကုန်သွယ်လုပ်ငန်းခွန် မကျသင့်စေကြောင်း ဖော်ပြထားသော်လည်း ၂၀၁၈-၂၀၁၉ ဘဏ္ဍာနှစ် နိုင်ငံတော်ပိုင် စီးပွားရေး အဖွဲ့အစည်းများ၏ ကုန်သွယ်မှု အရှုံးအမြတ် စာရင်းများနှင့် ဘဏ္ဍာရေး အခြေအနေဖော်ပြချက်တွင်မူ စီမံကိန်းနှင့် ဘဏ္ဍာရေးဝန်ကြီးဌာန၏ လက်အောက်တွင် လုံခြုံရေးနှင့်ဆိုင်သော ပုံနှိပ်လုပ်ငန်းများ စက်ရုံမှ အမြတ်ရရှိကြောင်း ဖော်ပြထားသည်ကို တွေ့ရှိရသည်။
ထိုသို့ ကာကွယ်ရေးဝန်ကြီးဌာန လက်အောက်တွင် နှစ်စဉ်ဖော်ပြခဲ့သည့် လုံခြုံရေး နှင့်ဆိုင်သော ပုံနှိပ်လုပ်ငန်းများကို စီမံကိန်း နှင့် ဘဏ္ဍာရေးဝန်ကြီးဌာန လက်အောက်တွင် ဖော်ပြထားခြင်းနှင့် ပတ်သက်၍ အသေးစိတ် သိရှိလိုသည်များကို စီမံကိန်းနှင့် ဘဏ္ဍာရေး ဝန်ကြီးဌာနမှ ပြောရေးဆိုခွင့် ရှိသူများထံ သြဂုတ် ၂ ရက်က ဆက်သွယ်ရာ ကိုင်ဆောင်သည့်ဖုန်းများ စက်ပိတ်ထားကြောင်းသာ တုံ့ပြန်ခဲ့သည်။ ထို့ကြောင့် စီမံကိန်းနှင့် ဘဏ္ဍာရေးဝန်ကြီးဌာနမှ ပြောရေးဆိုခွင့် ရှိသူများနှင့် အဆက်အသွယ် ရရှိပါက လုံခြုံရေးနှင့် ဆိုင်သော ပုံနှိပ်လုပ်ငန်းများစက်ရုံနှင့် ပတ်သက်သည့် သတင်း အချက်အလက်များကို ဆက်လက်ဖော်ပြပေးမည် ဖြစ်သည်။
