မုတ္တမတိုက်နယ်ဆေးရုံမှ လူနာများအား ရွှေ့ပြောင်းနေစဉ် (ဓာတ်ပုံ-မော်လမြိုင်လူမှုကူညီကယ်ဆယ်ရေးအဖွဲ့)
ဇူလိုင် ၇ ရက် ညနေပိုင်းအချိန်က မိုးသည်းထန်စွာ ရွာသွန်းမှုကြောင့် ပေါင်မြို့နယ် မုတ္တမမြို့ရှိ တိုက်နယ်ဆေးရုံဝင်းနှင့် ဆေးရုံအတွင်းသို့ ရေဝင်ရောက်ခဲ့ပြီး ဆေးရုံမှ လူနာများ အရေးပေါ်ရွှေ့ပြောင်းခဲ့ရကြောင်း သိရသည်။
မုတ္တမတိုက်နယ်ဆေးရုံမှ လူနာများအား မြန်မာနိုင်ငံရဲတပ်ဖွဲ့၊ မီးသတ်တပ်ဖွဲ့၊ ကြက်ခြေနီတပ်ဖွဲ့၊ မော်လမြိုင် လူမှုကယ်ဆယ်ရေးအဖွဲ့ ၊ ရာမည လူမှုကယ်ဆယ်ရေး အဖွဲ့၊ ကျိုက်ခနဲ နယ်မြေ ၁၆ လူမှုကယ်ဆယ်ရေးအဖွဲ့၊ ဘိုဘိုဝင်း လူမှုကူညီကယ်ဆယ်ရေး စသည့် မော်လမြိုင်မြို့မှ လူမှု ကူညီကယ်ဆယ်ရေးအဖွဲ့များ၊ မုတ္တမမြို့မှ လူမှု ကူညီကယ်ဆယ်ရေးအဖွဲ့များ၊ ပေါင်မြို့မှ လူမှုကူညီကယ်ဆယ်ရေးအဖွဲ့များနှင့် မြို့ခံ ပြည်သူများ ပူးပေါင်းကာ မုတ္တမတိုက်နယ် ဆေးရုံမှ ၊ မုတ္တမမြို့ရှိ မြစေတီနန်းဦး ပရိယတ္တိစာသင်တိုက်၊ ထိုမှ မော်လမြိုင်ပြည်သူ့ ဆေးရုံကြီးနှင့် အမျိုးသမီးနှင့် ကလေးဆေးရုံများသို့ လူနာပေါင်း ၃၂ ဦးအား ပို့ဆောင်ပေးခဲ့ကြကြောင်း သိရသည်။ လူနာများအား ဆေးရုံမှ ည ၇ နာရီမှ စတင်သယ်ဆောင်ပြီး ည ၈ နာရီအချိန်ထိ သယ်ယူပြီးစီးခဲ့ကြောင်း သိရသည်။
မော်လမြိုင်မြို့တွင် ဇွန်လလယ်ပိုင်းက မိုးသည်းထန်စွာ ရွာသွန်းမှုကြောင့် မော်လမြိုင်မြို့ တောင်ရိုးတန်းရှိ ဆံတော်ရှင် ကျိုက်သလ္လံစေတီတော်ကြီး၏ အရှေ့ဘက် စောင်းတန်းဘေးတွင် မြေပြိုကျခဲ့ပြီး စောင်းတန်းအနီးရှိ ဓာတ်လှေကား အနည်းငယ် တိမ်းစောင်းမှု ဖြစ်ပွားခဲ့ကြောင်း၊ ယင်းဓာတ်လှေကားအောက်ဘက် ဈေးဆိုင်ခန်းများမှ လူများအား ရွှေ့ပြောင်းခိုင်းခဲ့ရပြီး စေတီတော်ကြီး၏ အနောက်ဘက် စောင်းတန်းအနီးတွင်လည်း မြေပြိုကျမှုကြောင့် အုတ်တံတိုင်းပြိုကျမှုဖြစ်ပွားခဲ့ကြောင်း သိရသည်။
