ကမ္ဘာ့ဈေးကွက်တွင် ဒေါ်လာဈေး အနည်းငယ်ကျခဲ့ပြီး တရုတ်ယွမ်ငွေတန်ဖိုး ပြန်တက်ခဲ့ကာ ပြည်တွင်းဈေးကွက်အတွင်း တစ်ဒေါ်လာကျပ် ၁၃၉၀ အထိ ပြန်လည်ကျဆင်းခဲ့ကြောင်း နိုင်ငံခြားငွေကြေးရောင်းဝယ်သူများထံမှ သိရသည်။
ကမ္ဘာ့ဒေါ်လာဈေး အညွှန်းကိန်းသည် ဇူလိုင် ၃ ရက်တွင် ကျဆင်းခဲ့ပြီး ၉၄ ဒသမ ၃၂ ပွိုင့်ဖြင့် ဈေးပိတ်ခဲ့ကာ ဇူလိုင် ၄ ရက် မွန်းလွဲပိုင်းတွင်လည်း ၉၄ ဒသမ ၁၉ ပွိုင့်အထိ ဆက်လက် ကျဆင်းခဲ့သည်။ တရုတ်ယွမ်ငွေမှာ တစ်ရက်အတွင်း ၁ ရာခိုင်နှုန်းကျော်တန်ဖိုး ပြန်တက်ခဲ့ပြီး ပြည်တွင်းဈေးကွက်၌ ဇူလိုင် ၄ ရက် ဒေါ်လာဈေးမှာ ၁၃၉၀-၁၃၉၅ ကြား အတက်အကျ ဖြစ်ပေါ်နေသည်။
၂၀၁၈ ခုနှစ် မေလမှစတင်ကာ ကမ္ဘာ့ဒေါ်လာဈေးအညွှန်းကိန်း သိသိသာသာ ပြန်လည်မြင့်တက်ခဲ့ခြင်းဖြစ်ပြီး ပြည်တွင်းဈေးကွက်၌ ငါးလအတွင်း လအလိုက်ဖြစ်ပေါ်သော နိုင်ငံခြားငွေလဲနှုန်း အနိမ့်ဆုံးနှင့် အမြင့်ဆုံးနှုန်းများမှာ ဇန်နဝါရီတွင် ၁၃၂၃-၁၃၅၄ ကျပ်၊ ဖေဖော်ဝါရီတွင် ၁၃၂၃-၁၃၃၁ ကျပ်၊ မတ်တွင် ၁၃၂၆-၁၃၃၄ ကျပ်၊ ဧပြီတွင် ၁၃၂၄-၁၃၃၂ ကျပ်၊ မေတွင် ၁၃၃၂-၁၃၅၁ ကျပ်၊ ဇွန်တွင် ၁၃၄၅-၁၄၀၇ တို့ဖြစ်ပြီး ဇွန်လတွင် ကွာဟချက် အများဆုံး ဖြစ်ပေါ်ခဲ့သည်။
ပြီးခဲ့သည့် မတ်လအတွင်း အမြင့်ဆုံး ဈေးနှုန်းအဖြစ် မတ် ၂၁ ရက်တွင် ၁၃၃၄ ကျပ် ဖြစ်ပေါ်ခဲ့သော ဒေါ်လာဈေးသည် မတ် ၂၉ ရက်တွင် ၁၃၂၈ ကျပ်အထိ၊ ဧပြီလဆန်းတွင် ၁၃၂၄ ဝန်းကျင်အထိ ကျဆင်းခဲ့သည်။ ထို့နောက် ဧပြီလကုန်ပိုင်း ၂၈ ရက်တွင် ၁၃၃၁ ကျပ်၊ မေ ၂၁ ရက်တွင် ၁၃၅၁ ကျပ်အထိ မြင့်တက်ခဲ့ပြီး ဇွန် ၁၁ ရက်တွင် ၁၃၄၆ ကျပ်၊ ဇွန် ၁၅ ရက်တွင် ၁၃၅၅ ကျပ်၊ ဇွန် ၁၆ ရက်တွင် ၁၃၆၅ ကျပ်၊ ဇွန် ၂၀ ရက်တွင် ၁၃၆၈ ကျပ်၊ ဇွန် ၂၁ ရက်တွင် ၁၃၇၅ ကျပ်၊ ဇွန် ၂၆ ရက်တွင် ၁၃၈၃၊ ဇွန် ၂၇ ရက်တွင် ၁၃၉၅၊ ဇွန် ၂၈ ရက်တွင် ၁၄၀၇ ကျပ်ဝန်းကျင် ဖြစ်ပေါ်ခဲ့သည်။ ဇူလိုင် ၁ ရက်တွင် ၁၃၈၄ ကျပ်အထိ ကျဆင်းခဲ့ပြီး ဇူလိုင် ၃ ရက်တွင် ကျပ် ၁၄၀၀၊ ဇူလိုင် ၄ ရက်တွင် ၁၃၉၀ ကျပ်အထိ ဖြစ်ပေါ်ခဲ့သည်။
