ဓာတ်ပုံ - မျိုးထက်ပိုင်

လူမှုကွန်ရက်တွင် ပျံ့နှံ့နေသော ရွှေတိဂုံစေတီတော် ကြံ့ခိုင်ရေးအတွက် လွန်ဖောက်ပြီး စစ်ဆေးမှု ပြုလုပ်မည့် ကိစ္စသည် မဟုတ်မှန်ကြောင်းနှင့် စစ်ဆေးမှုများကို ဓာတ်ရောင်ခြည်၊ အသံလှိုင်းနှင့် လျှပ်စစ်သံလိုက် တိုင်းတာနည်းတို့ဖြင့် ဆောင်ရွက်မည်ဖြစ်ကြောင်း သာသနာရေးနှင့် ယဉ်ကျေးမှု ဝန်ကြီးဌာနမှ ထုတ်ပြန်ခဲ့သည်။

“နားစွန်နားဖျားကြားပြီး ပြောကြတာ။ ဆွေးနွေးတုန်းက ဘာတွေလုပ်မယ် ဆိုတာကို သေချာမသိဘဲ ကြားမိတာတွေကို မှတ်ချက်ယူကုန် ကြတယ်ထင်တယ်။ ရွှေတိဂုံစေတီတော်ကြီးကို စစ်ဆေးပြီးတော့ လိုအပ်တာကို ပညာရှင်တွေ ညှိနှိုင်းဆောင်ရွက်မယ်။ အခုကတော့ အထဲမှာ ဘာချို့ယွင်းချက်ရှိနေလဲ ဆိုတာကို တိုင်းတာမယ်။ ခေတ်မီကိရိယာတွေနဲ့ တိုင်းတာမှာဖြစ်တယ်။ ရွှေတိဂုံစေတီတော်ကြီးကိုလည်း လွန်မဖောက်ပါဘူး” ဟု ရွှေတိဂုံစေတီတော် ဂေါပကအဖွဲ့ဝင် ဦးအောင်မြတ်က ပြောကြားသည်။

လူမှုကွန်ရက် အင်တာနက် စာမျက်နှာများပေါ်၌ Naymin Thuက၊ အရှင် အဂ္ဂဉာဏ၊ ဆာရဲရင့်၊ မော်မော် အကောင့်များဖြင့် “ရွှေတိဂုံစေတီတော်ကို ရွှေပြားခွာပြီး အပေါက်ဖောက်ကြမည်ဖြစ်သည်။ စေတီတော်ကြီးကို လွန်ဖြင့်ထိုးဖောက် တုန်ခါစေခြင်းသည် ငလျင်ထက် ပိုမိုပြင်းထန်သော ထိခိုက်မှုကို ဖြစ်စေကာ အက်ကြောင်းများ ဖြစ်စေနိုင်သည်။ ရွှေပြားများ ခွာခြင်းနှင့် အပေါက်ဖြစ်စေခြင်းသည်လည်း ဟန်ချက်ညီ ထိန်းထားမှုကို ဂဟေဆက် ပျက်စေမည်ဖြစ်ကြောင်း” ဇူလိုင် ၁ ရက်တွင် ဖော်ပြထားသည်ကို တွေ့ရကြောင်း ထုတ်ပြန်ချက်တွင် ဖော်ပြထားသည်။

ဆက်လက်၍ ထုတ်ပြန်ချက်တွင် ဇွန် ၂၄ ရက်၌ ဆောက်လုပ်ရေး ဝန်ကြီးဌာနမှ တာဝန်ရှိသူများ၊ ပညာရှင်များ ဦးဆောင်ကျင်းပသော ရွှေတိဂုံစေတီတော်နှင့် သိဂုၤတ္တရ ကုန်းမြေရေရှည် တည်တံ့ခိုင်မြဲရေးလုပ်ငန်း ညှိနှိုင်းအစည်းအဝေးတွင် ရွှေတိဂုံစေတီတော် ရွှေသင်္ကန်း ကပ်လှူရေး လုပ်ငန်းများနှင့် ပတ်သက်၍ ၂၀၁၈-၂၀၁၉ ခုနှစ် ရွှေသင်္ကန်းတော် ကပ်လှူပူဇော်သည့် ကာလတွင် ကိုယ်လုံးတော် ကြံ့ခိုင်ရေး လုပ်ငန်းများ စစ်ဆေးဆောင်ရွက်ရန် ဆုံးဖြတ်ခဲ့ကြောင်း၊ ရွှေတိဂုံ စေတီတော်မြတ်ကြီးအား ရွှေသင်္ကန်းတော် ကပ်လှူရာတွင် စေတီတော်ကြီး၏       ကိုယ်လုံးတော် ကြံ့ခိုင်ရေး စစ်ဆေးရာ၌ ဓာတ်ရောင်ခြည်ဖြင့် တိုင်းတာနည်း၊ အသံလှိုင်းဖြင့် တိုင်းတာနည်း၊ လျှပ်စစ်သံလိုက်ဖြင့် တိုင်းတာနည်း တို့ကိုသာ ဆောင်ရွက်မည်ဖြစ်ကြောင်း သိရသည်။

ထို့ကြောင့် ရွှေတိဂုံစေတီတော် ရွှေသင်္ကန်းကပ်လှူရေး လုပ်ငန်းများနှင့် ပတ်သက်၍ ပညာရှင်များ၏ အကြံပြုချက်များ၌ စေတီတော်ကြီး၏ ကိုယ်လုံးတော်အား ထွင်းဖောက်တိုင်းတာခြင်း ပြုလုပ်ရန် အစီအစဉ် မရှိပါကြောင်းနှင့် မဟုတ်မမှန် ကောလာဟလ သတင်းထုတ်လွှင့် ဖော်ပြမှုများကို သတိပြုရန် ထုတ်ပြန်ချက်တွင် ဖော်ပြထားသည်။

ရွှေတိဂုံစေတီတော်ကြီးအား မော်လမြိုင် ကျိုက်သလ္လံဘုရားကဲ့သို့ မြေပြိုမှုများ မဖြစ်ပွားစေရန် ရွှေတိဂုံဘုရား၏ ကြံ့ခိုင်မှုအတွက်  စစ်ဆေးမှုများ ပြုလုပ်သွားမည်ဖြစ်ကြောင်း ဆောက်လုပ်ရေး ဝန်ကြီးဌာန ဒုတိယဝန်ကြီး ဦးကျော်လင်းက ဇွန် ၂၄ ရက်တွင် ရွှေတိဂုံစေတီတော် ဂေါပကရုံးခန်းတွင် ပြုလုပ်သည့် ရွှေတိဂုံစေတီတော်နှင့် သိဂုၤတ္တရကုန်းမြေ ရေရှည်တည်တံ့ ခိုင်မြဲရေးအတွက် လုပ်ငန်းညှိနှိုင်း အစည်းအဝေးတွင် ပြောကြားခဲ့ခြင်းဖြစ်သည်။

အဆိုပါ အစည်းအဝေးသို့ ဆောက်လုပ်ရေး ဝန်ကြီးဌာနမှ တာဝန်ရှိသူများ၊ ရွှေတိဂုံဂေါပကအဖွဲ့မှ တာဝန်ရှိသူများ၊ ဆောက်လုပ်ရေး ပညာရှင်များ၊ ရန်ကုန်မြို့တော် စည်ပင်သာယာရေး ကော်မတီမှ တာဝန်ရှိသူများ တက်ရောက် ဆွေးနွေးခဲ့ပြီး အချက်သုံးချက်ကို အတည်ပြုခဲ့ကြောင်း သိရသည်။

ယင်းအချက်သုံးချက်သည် ရွှေတိဂုံစေတီတော် ကိုယ်လုံးတော် ကြံ့ခိုင်ရေး၊ ရင်ပြင်တော်တွင် မြေပြိုမှုများ မဖြစ်စေရန် လိုအပ်သည့် နေရာများတွင် ရေမြောင်းများ ပြုလုပ်ရန်နှင့် ဝတ္တကမြေ ၁၁၄ ဧကအား သန့်ရှင်းသာယာ လှပရေးနှင့် စနစ်တကျရှိရေးတို့ကို ဆောင်ရွက်ရန် အတည်ပြုခဲ့ကြောင်း သိရသည်။