နိုင်ငံတကာအစိုးရနှင့် မြန်မာနိုင်ငံအစိုးရ ပူးပေါင်းပြီး မူးယစ်ဆေးဝါးတားဆီး တိုက်ဖျက်မှုများသည် အရင်းအမြစ်မှ တိုက်ဖျက်ခြင်းမဟုတ်သည့်အတွက် ယနေ့အထိ ပပျောက်နိုင်ခြင်းမရှိကြောင်း တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) တွင် လက်မှတ်ရေးထိုးထားသော တိုင်းရင်းသားလက်နက်ကိုင်အဖွဲ့ တစ်ခုဖြစ်သည့် ရှမ်းပြည်ပြန်လည်ထူထောင်ရေးကောင်စီ (RCSS) က ဇွန် ၂၆ ရက်တွင် ကျရောက်သည့် အပြည်ပြည်ဆိုင်ရာ မူးယစ်ဆေးဝါးအလွဲသုံးမှုနှင့် တရားမဝင်ရောင်းဝယ်မှု တိုက်ဖျက်ရေးနေ့နှင့်ပတ်သက်၍ ကြေညာချက်ထုတ်ပြန်သည်။
နိုင်ငံတကာအစိုးရနှင့် မြန်မာနိုင်ငံ အစိုးရတို့ ပူးပေါင်းပြီး မူးယစ်ဆေးဝါး တားဆီးတိုက်ဖျက်ခဲ့မှုများသည် အရင်းအမြစ်မှ တိုက်ဖျက်ခြင်းမဟုတ်၊ အဖျားပိုင်းတိုက်ဖျက်မှုများ ဖြစ်နေခဲ့မှုကြောင့် မူးယစ်ဆေးဝါးသည် ယနေ့အချိန်ထိ ပပျောက်သွားနိုင်ခြင်းမရှိခဲ့ကြောင်း၊ မီးကိုရေဖြင့်လောင်းသတ်ရသလို မူးယစ်ဆေးဝါးကိုလည်း အဓိကစိုက်ပျိုးထုတ်လုပ်သည့် အမြစ်မှနေ၍ တားဆီးတိုက်ထုတ်ရမည်ဖြစ်ကြောင်း၊ အပြည်ပြည်ဆိုင်ရာ အစိုးရ၏ မူးယစ်ဆေးဝါးတိုက်ဖျက်နေမှုသည် မီးကိုရေဖြင့် မလောင်းဘဲ အခိုးအငွေ့များ ထွက်နေသည့် မီးခိုးငွေ့များကိုသာ လိုက်လံငြှိမ်းသတ်သလိုဖြစ်နေသည့်အတွက် မူးယစ်ဆေးမှာ အမှန်တကယ် မပျောက်ကွယ်နိုင်ဘဲရှိနေကြောင်း ယင်းထုတ်ပြန်ချက်တွင် ပါရှိသည်။
မူးယစ်ဆေးဝါး အမှန်တကယ်ပပျောက်အောင် တိုက်ဖျက်လိုပါက (၁) မူးယစ်ဆေးဝါးနှင့် ဆက်စပ်သည့်ဓာတုပစ္စည်းများအား တားမြစ်ပိတ်ပင်ခြင်း၊ (၂) မူးယစ်ဆေးဝါး ရောင်းဝယ်ဖောက်ကားသည့် မူးယစ်ဂိုဏ်ကြီး၊ ဂိုဏ်းငယ်များအား ဖော်ထုတ်အရေးယူခြင်း၊ ( ၃) ပြည်သူလူထုအား မူးယစ်ဆေးဝါးအန္တရာယ် နှင့်ပတ်သက်၍ အသိပညာပေးခြင်း၊ မှန်ကန်သည့် အသက်မွေးဝမ်းကျောင်း ရှိစေရန် လမ်းကြောင်းတည့်မတ်ခြင်း၊ (၄) ပြည်သူလူထုက မူးယစ်ဆေးဝါးတိုက်ဖျက်ရေးတွင် တာဝန်သိ ပြည်သူတစ်ဦးအဖြစ် ရပ်တည်ရန်၊ မူးယစ်ဆေးဝါးအား ပူးပေါင်းဆန့်ကျင်ရန် သက်ဆိုင်ရာ တာဝန်ရှိသူများထံ သတင်းပို့ရန်၊ (၅)ဘိန်းအစားထိုးစိုက်ပျိုးသည့် သီးနှံများထုတ်ပေးခြင်းနှင့် အဆိုပါသီးနှံများအတွက် ဈေးကွက်များ ထားရှိပေးခြင်း၊ (၆) မူးယစ်ဆေးဝါးနှင့် ပတ်သက်ပြီး လာဘ်ပေးလာဘ်ယူမှုများအား ထိရောက်စွာအရေးယူခြင်း စသည်တို့ ပြုလုပ်ရမည်ဖြစ်ကြောင်း RCSS အဖွဲ့က အကြံပြုထားသည်။
ထို့ပြင် ရှမ်းပြည်ပြန်လည်ထူထောင်ရေး ကောင်စီအနေနှင့် မူးယစ်ဆေးဝါးတားဆီးတိုက်ဖျက်ရေးကို ၁၉၉၉ ခုနှစ်မှစ၍ ပေါ်လစီ စတင်ချမှတ်ခဲ့ပြီး မူးယစ်ဆေးဝါးတားဆီး တိုက်ဖျက်ရေးလုပ်ငန်းများအား နှစ်စဉ်နှစ်တိုင်း မိမိတို့တတ်နိုင်သမျှ အစွမ်းကုန်ကြိုးစား ဆောင်ရွက်ခဲ့ကြောင်း၊ မူးယစ်ဆေးဝါးတိုက်ဖျက်ရာတွင် အစိုးရ၊ တပ်မတော်နှင့် RCSS တို့ ၂၀၁၂ ခုနှစ် ကျိုင်းတုံမြို့တွင် ပူးပေါင်းတိုက်ဖျက်ရေး ပေါ်လစီကို သဘောတူညီမှုရရှိခဲ့ကြောင်း၊ သဘောတူညီချက်အရ ပူးပေါင်းဆောင်ရွက်တိုက်ဖျက်ရန်ဖြစ်သော်လည်း လက်တွေ့တွင် အကောင်အထည်မဖော်နိုင်ခဲ့ကြောင်း ယင်းထုတ်ပြန်ချက်တွင် ရေးသားထားသည်။
ထို့အတူ မူးယစ်ဆေးဝါးတိုက်ဖျက်ရေးဆိုင်ရာ လုပ်ငန်းများပူးပေါင်းဆောင်ရွက်မှုနှင့်ပတ်သက်၍ ၂၀၁၂ ခုနှစ် အောက်တိုဘာ ၂၇ ရက်နှင့် ၂၈ရက်တို့တွင် တာချီလိတ်မြို့၌ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးအန္တရာယ်တားဆီးကာကွယ်ရေး ဗဟိုအဖွဲ့ (CCDAC) ၊ မြန်မာနိုင်ငံအခြေစိုက် မူးယစ်ဆေးဝါးနှင့် ရာဇဝတ်ဆိုင်ရာ ကုလသမဂ္ဂရုံး (UNODC) နှင့် RCSS တို့ သုံးပွင့်ဆိုင် အစည်းအဝေးတွင်မူအရ သဘောတူညီချက် ကိုးချက်ရရှိခဲ့သော်လည်း လက်တွေ့အကောင်အထည်ဖော်ဆောင်နိုင်မှု မရှိသေးကြောင်း သုံးသပ်ရရှိသည်ဟု အဆိုပါ ထုတ်ပြန်ချက်တွင် ဖော်ပြထားသည်။
သို့ဖြစ်၍ ရှမ်းပြည်သူလူထုအပါအဝင် နိုင်ငံတကာလူငယ်များ မူးယစ်ဆေးစွဲခြင်း၊ မူးယစ်ဆေးရောင်းဝယ်ပြီး ဝမ်းစာရှာဖွေနေမှုကြောင့် မူးယစ်ဆေး၏ သားကောင်ဘဝသို့ ရောက်ရှိနေသည့် ပြဿနာများလည်း ယခုအချိန်ထိထိရောက်မှန်ကန်သော နည်းလမ်းဖြင့် ဖြေရှင်းနိုင်ခြင်းမရှိသေးသည့် အတွက်လည်း လွန်စာစိတ်မကောင်း ဖြစ်မိကြောင်း၊ မူးယစ်ဆေးဝါးပေါများလာခြင်းနှင့် ပြည်သူလူထု၊ လူငယ်လူရွယ်များ ကျား၊ မ မရွေး မူးယစ်ဆေး သားကောင်ဘဝသို့ ပိုမိုကျရောက်နေခြင်းသည် တိုင်းပြည်အတွက် လွန်စွာထိခိုက်နစ်နာ ဆုံးရှုံးလျက်ရှိကြောင်း၊ ထိုကြောင့် မူးယစ်ဆေးသည် လူသားများအတွက် အဓိက အန္တရာယ်တစ်ခုဖြစ်ပြီး မူးယစ်ဆေးကြောင့် လူမျိုးတစ်မျိုးဘဝနေထိုင်မှု ပျက်စီးပျောက်ကွယ်နိုင်သောကြောင့် မူးယစ်ဆေးဝါးအား မိမိတို့ ရှမ်းပြည်ပြန်လည်ထူထောင်ရေး ကောင်စီအနေဖြင့် ပြင်းပြင်းထန်ထန် ကန့်ကွက်ကြောင်း RCSS အဖွဲ့၏ ကြေညာချက်တွင် ပါရှိသည်။
ထို့ပြင် NLD အစိုးရ နိုင်ငံတော် သမ္မတ ဦးဝင်းမြင့်လက်ထက်တွင် မူးယစ်ဆေးဝါး တားဆီးတိုက်ဖျက်ရေး ပေါ်လစီအား မိမိတို့ အနေဖြင့် လွန်စွာထောက်ခံဂုဏ်ယူမိကြောင်း RCSS က ထုတ်ပြန်သည်။
